టీసీ కోసం వస్తే ప్రిన్సిపాల్ లైంగిక దాడి.. ప్రైవేట్ పార్ట్ కొరికిన విద్యార్థి!

నాగర్‌కర్నూల్ జిల్లా కొల్లాపూర్ ప్రభుత్వ పీజీ కాలేజీలో దారుణమైన ఘటన జరిగింది. టీసీ కోసం వచ్చిన విద్యార్థిపై లైంగిక దాడికి ప్రయత్నించాడు ప్రిన్సిపాల్. దీంతో విద్యార్థి అతడి ప్రైవేట్ పార్ట్ కొరికేశాడు.

విద్యాబుద్ధులు నేర్పి సమాజంలో ఉన్నత స్థానంలో నిలబెట్టాల్సిన ఒక కాలేజ్ ప్రిన్సిపాల్ దారుణంగా వ్యవహరించాడు. కామాంధుడిగా మారి విద్యార్థి జీవితంతో ఆడుకునే ప్రయత్నం చేశాడు. ఈ దారుణమైన ఘటన నాగర్‌కర్నూల్ జిల్లా కొల్లాపూర్ ప్రభుత్వ పీజీ కళాశాలలో జరిగింది. టీసీ కోసం వచ్చిన ఒక విద్యార్థిపై ప్రిన్సిపాల్ లైంగిక వేధింపులకు పాల్పడ్డాడు. దీనిని సహించని విద్యార్థి ప్రిన్సిపాల్ ప్రైవేట్ పార్ట్ కొరికేశాడు.

ప్రతీకాత్మక చిత్రం

పాలమూరు యూనివర్సిటీ పరిధిలోని కొల్లాపూర్ ప్రభుత్వ పీజీ కాలేజీలో ఉన్నత విద్య పూర్తి చేసుకున్నాడు ఓ విద్యార్థి. ట్రాన్స్‌ఫర్ సర్టిఫికెట్(టీసీ) కోసం కళాశాల చుట్టూ తిరుగుతున్నాడు. కానీ ప్రిన్సిపాల్ మాత్రం టీసీ ఇవ్వకుండా అడ్డుపడుతున్నాడు. ఇదే అదనుగా భావించిన సదరు ప్రిన్సిపాల్ కొంతకాలంగా ఆ విద్యార్థిని శారీరకంగా, మానసికంగా తీవ్రంగా వేధిస్తున్నాడు.

అయితే మంగళవారం రాత్రి సుమారు 10 గంటల సమయంలో విద్యార్థిని కాలేజీలోనే ఉన్న తన వ్యక్తిగత గదికి ప్రిన్సిపాల్ పిలిపించుకున్నాడు. సర్టిఫికెట్ ఇవ్వాలంటే తను చెప్పినట్టు చేయాలని, విద్యార్థిపై బలవంతంగా లైంగిక దాడికి ప్రయత్నించాడు. ప్రిన్సిపాల్ చేస్తున్న అకృత్యాలను, చిత్రహింసలను భరించలేకపోయిన బాధితుడు.. ఆ నరకం నుంచి ఎలాగైనా తప్పించుకోవాలనుకున్నాడు. ఆత్మరక్షణ కోసం తీవ్ర ఆగ్రహంతో ప్రిన్సిపాల్ ప్రైవేట్ పార్ట్‌ను గట్టిగా కొరికేశాడు.

నొప్పితో ప్రిన్సిపాల్ అక్కడే ఉన్నాడు. బాధితుడు అక్కడి నుంచి చాకచక్యంగా తప్పించుకుని తోటి విద్యార్థుల వద్దకు చేరుకుని జరిగిన విషయాన్ని చెప్పాడు. ఆగ్రహం కట్టలు తెంచుకున్న విద్యార్థులంతా కలిసి వెంటనే ప్రిన్సిపాల్ ఉన్న దగ్గరకు చేరుకున్నాడు. భారీ సంఖ్యలో విద్యార్థులు రావడంతో భయంతో నగ్నంగానే అక్కడి నుంచి చీకట్లోకి పారిపోయాడు ప్రిన్సిపాల్.

విద్యార్థుల సాయంతో బాధితుడు స్థానిక పోలీస్ స్టేషన్‌కు చేరుకుని ప్రిన్సిపాల్‌పై ఫిర్యాదు చేశాడు. నిందితుడైన ప్రిన్సిపాల్‌ను తక్షణమే అరెస్ట్ చేయాలని, ఉద్యోగం నుంచి సస్పెండ్ చేయాలని విద్యార్థులు డిమాండ్ చేశారు.