E-Paper
హైదరాబ్ వేదికగా భారత్ సమ్మిట్‌ - రాహుల్ గాంధీ రాక..! గిగ్ వర్కర్లతో ప్రత్యేక సమావేశం
నవంబర్ 13, 14 తేదీల్లో హైదరాబాద్ వేదికగా జరగనున్న భారత్ సమిట్‌కు రాహుల్ గాంధీ హాజరుకానున్నారు. ఈ పర్యటనలో గిగ్ వర్కర్లతో ఆయన ప్రత్యేక్షంగా భేటీ అయ్యే అవకాశముందని టీపీసీసీ అధ్యక్షుడు మహేష్ కుమార్ గౌడ్ వెల్లడించారు.
Prefer HTon Google
కాంగ్రెస్ అగ్రనేత, లోక్‌సభ ప్రతిపక్ష నేత రాహుల్ గాంధీ నవంబర్ 13 లేదా 14వ తేదీల్లో హైదరాబాద్‌లో పర్యటించనున్నారు. నగరంలో ప్రతిష్టాత్మకంగా నిర్వహిస్తున్న 'భారత్ సమిట్' అంతర్జాతీయ సదస్సులో ఆయన పాల్గొంటారు. ఈ పర్యటన సందర్భంగా రాష్ట్రంలో అత్యంత కీలకమైన గిగ్ వర్కర్లతో (స్విగ్గీ, జొమాటో, ర్యాపిడో, డెలివరీ అగ్రిగేటర్ కార్మికులు) ప్రత్యేకంగా సమావేశమై వారితో నేరుగా మాట్లాడాలని రాహుల్ గాంధీ నిర్ణయించినట్లు తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు బి. మహేష్ కుమార్ గౌడ్ మంగళవారం ఢిల్లీలో వెల్లడించారు.
ఢిల్లీలో రాహుల్ గాంధీని ఆయన నివాసంలో కలిసిన అనంతరం మహేష్ కుమార్ గౌడ్ మీడియాతో మాట్లాడారు. తెలంగాణలో కాంగ్రెస్ ప్రభుత్వం ఇటీవల గిగ్ వర్కర్ల సంక్షేమం, సామాజిక భద్రత కోసం చట్టం రూపొందించిన విషయాన్ని రాహుల్ గాంధీకి వివరించినట్లు తెలిపారు. ఈ క్రమంలోనే గిగ్ వర్కర్ల సమస్యలు, వారి హక్కులు, చట్టం అమలుపై వారితో ఒక సమావేశం ఏర్పాటు చేయాలని రాహుల్ స్వయంగా సూచించారని చెప్పారు. భారత్ సమిట్ కార్యక్రమంతో పాటే ఈ సభ కూడా నిర్వహించేందుకు సన్నాహాలు చేస్తున్నట్లు వివరించారు.
బీసీ ర్యాలీకి ఆహ్వానం….
రాష్ట్రంలో కాంగ్రెస్ పార్టీ చేపడుతున్న వివిధ సంస్థాగత, అభివృద్ధి కార్యక్రమాలను రాహుల్ గాంధీకి పీసీసీ చీఫ్ నివేదించారు. తెలంగాణలో త్వరలోనే నిర్వహించతలపెట్టిన భారీ 'మెగా బీసీ ర్యాలీ'కి హాజరుకావాల్సిందిగా ఆయనను అధికారికంగా ఆహ్వానించినట్లు పేర్కొన్నారు.
ప్రపంచ రాజకీయాలు, భౌగోళిక పరిస్థితుల్లో వస్తున్న వేగవంతమైన మార్పులు, నూతన ప్రపంచ వ్యవస్థ రూపకల్పన, భారతదేశ వ్యూహాత్మక అడుగులు వంటి అంశాలపై చర్చించేందుకు కాంగ్రెస్ పార్టీ 'భారత్ సమిట్' సదస్సును నిర్వహిస్తోంది. దీనితో పాటు సహకార సమాఖ్య విధానం, ఎన్నికల ప్రక్రియలో పారదర్శకత వంటి అంశాలపైనా ఇందులో సుదీర్ఘంగా చర్చించనున్నారు.
ఈ సదస్సులో ప్రపంచవ్యాప్తంగా 70కి పైగా దేశాల నుంచి దాదాపు 1,000 మంది ప్రతినిధులు, అంతర్జాతీయ నిపుణులు, విధానకర్తలు పాల్గొంటారని కాంగ్రెస్ విదేశీ వ్యవహారాల విభాగం అధ్యక్షుడు, సీనియర్ నాయకుడు సల్మాన్ ఖుర్షీద్ తెలిపారు. ఈ గ్లోబల్ కాన్ఫరెన్స్ ద్వారా "అవర్ వరల్డ్" పేరుతో ఒక నూతన థింక్ ట్యాంక్‌ను కూడా ప్రారంభించనున్నట్లు ఆయన వెల్లడించారు.
కాంగ్రెస్ అధ్యక్షుడు మల్లికార్జున ఖర్గే, రాహుల్ గాంధీ సహా పలువురు సీనియర్ నాయకులు, అంతర్జాతీయ ప్రగతిశీల ఉద్యమాల ప్రతినిధులు ఈ సమ్మిట్‌లో పాలుపంచుకోనున్నారు. కాగా…. మార్చి నెలలో తెలంగాణ శాసనసభ గిగ్ వర్కర్ల రిజిస్ట్రేషన్, సామాజిక భద్రత, సంక్షేమ బిల్లును ఆమోదించిన సంగతి తెలిసిందే.
