తెలంగాణ వెదర్ అప్డేట్ - ఇవాళ, రేపు వర్షాలు, ఈ జిల్లాలకు ఎల్లో హెచ్చరికలు

తెలంగాణలో రెండు రోజుల పాటు ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. కొన్ని జిల్లాలకు గంటకు 30-40 కి.మీ వేగంతో ఈదురుగాలులు వీచే అవకాశం ఉందని హెచ్చరించింది.

రాష్ట్రంలో రాబోయే మూడు రోజుల పాటు అక్కడక్కడా తేలికపాటి నుండి ఒక మోస్తరు వర్షాలు కురిసే అవకాశం ఉంది. ముఖ్యంగా పలు జిల్లాల్లో ఉరుములు, మెరుపులు మరియు ఈదురుగాలులతో కూడిన వర్షాలు పడే సూచనలున్నాయి. పలు జిల్లాలకు ఎల్లో హెచ్చరికలు జారీ అయ్యాయి.

తెలంగాణకు వర్ష సూచన

ఇవాళ జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, రంగారెడ్డి, వికారాబాద్, మహబూబ్ నగర్, నాగర్ కర్నూల్, వనపర్తి, జోగులాంబ గద్వాల జిల్లాల్లో అక్కడక్కడా ఉరుములు, మెరుపులు మరియు ఈదురుగాలులతో కూడిన వర్షాలు కురుస్తాయి.

రేపు జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, మహబూబ్ నగర్, నాగర్ కర్నూల్ జిల్లాల్లో వానలు పడే సూచనలున్నాయి.

ఈ తేదీ నుంచి పొడి వాతావరణం…..

అక్టోబర్ 7వ తేదీ ఉదయం 08:30 గంటల తర్వాత తెలంగాణలో వాతావరణం మారనుంది. అక్టోబర్ 7 నుండి అక్టోబర్ 11వ తేదీ వరకు రాష్ట్రమంతటా పొడి వాతావరణం ఏర్పడే అవకాశం ఉందని, ఆ రోజుల్లో ఎలాంటి ప్రత్యేక హెచ్చరికలు లేవు.

వానల ప్రభావంతో లోతట్టు ప్రాంతాలు జలమయం అయ్యే ప్రమాదం ఉంది. రోడ్లపై ట్రాఫిక్ అంతరాయం కలగడం, చెట్లు లేదా విద్యుత్ స్తంభాలు పడిపోవడం వంటి సమస్యలు తలెత్తవచ్చు. ప్రజలు విద్యుత్ స్తంభాలు, పాత భవనాల వద్ద జాగ్రత్తగా ఉండాలని, మున్సిపల్ అధికారులతో పాటు అత్యవసర సేవల సిబ్బంది అప్రమత్తంగా ఉన్నారని అధికారులు వెల్లడించారు.