సమగ్ర శిక్ష తెలంగాణ కోఆర్డినేటర్ పోస్టులకు అక్టోబర్ 5, 6 తేదీల్లో పరీక్షలు

సమగ్ర శిక్ష తెలంగాణ రాష్ట్ర, జిల్లా ప్రాజెక్ట్ కార్యాలయాల్లోని కోఆర్డినేటర్ పోస్టులకు, అలాగే డీఈఓ కార్యాలయాల్లోని జిల్లా సైన్స్ కోఆర్డినేటర్ పోస్టులకు అక్టోబర్ 5, 6 తేదీలలో ఆన్‌లైన్ పరీక్షలను నిర్వహించనుంది. అభ్యర్థులు అధికారిక వెబ్‌సైట్ నుంచి తమ హాల్ టికెట్లను డౌన్‌లోడ్ చేసుకోవచ్చు.

తెలంగాణ సమగ్ర శిక్షా విభాగంలో ఖాళీగా ఉన్న పలు కీలక పోస్టుల భర్తీ ప్రక్రియ తుది దశకు చేరుకుంది. సమగ్ర శిక్షా రాష్ట్ర, జిల్లా ప్రాజెక్టు కార్యాలయాలతో పాటు జిల్లా విద్యాశాఖాధికారుల పరిధిలోని కో-ఆర్డినేటర్ పోస్టుల నియామకం కోసం ఆన్‌లైన్ రాత పరీక్షల షెడ్యూల్‌ను అధికారులు అధికారికంగా ఖరారు చేశారు. ఈ పరీక్షలను అక్టోబర్ 5, 6 తేదీలలో నిర్వహించనున్నట్లు సమగ్ర శిక్షా ప్రకటించింది. దరఖాస్తు చేసుకున్న అభ్యర్థులు తమ హాల్ టికెట్లను సమగ్ర శిక్షా తెలంగాణ అధికారిక వెబ్‌సైట్ నుంచి డౌన్‌లోడ్ చేసుకోవచ్చని సూచించింది.

ప్రతీకాత్మక చిత్రం

ఈ ఆన్‌లైన్ కంప్యూటర్ ఆధారిత పరీక్షలు వివిధ విభాగాల వారీగా రెండు రోజుల పాటు వేర్వేరు షిఫ్టులలో జరగనున్నాయి. రాష్ట్ర ప్రాజెక్ట్ కార్యాలయంలోని కోఆర్డినేటర్ పోస్టులకు పోటీ చేసే అభ్యర్థులు అక్టోబర్ 5వ తేదీన ఉదయం 9 గంటల నుండి 11.30 గంటల వరకు పరీక్ష రాస్తారు. జిల్లా ప్రాజెక్ట్ కార్యాలయాల్లోని కోఆర్డినేటర్ల పరీక్ష ఆ తర్వాత మధ్యాహ్నం 2 గంటల నుండి 4.30 గంటల వరకు జరుగుతుంది. జిల్లా సైన్స్ కోఆర్డినేటర్లు అక్టోబర్ 6వ తేదీన ఉదయం 9 గంటల నుండి 11.30 గంటల వరకు తమ ఆన్‌లైన్ పరీక్ష రాస్తారు.

పరీక్షకు హాజరయ్యే అభ్యర్థులు తమ హాల్ టికెట్లను సులభమైన పద్ధతుల ద్వారా పొందే వెసులుబాటు ఉంది. పాఠశాల విద్య లేదా సమగ్ర శిక్షా తెలంగాణ అధికారిక వెబ్‌సైట్ https://www.samagrashiksha.telangana.gov.in/SamagraShiksha/ లోకి వెళ్లి డౌన్‌లోడ్ చేసుకోవచ్చు. అభ్యర్థి తన రిజిస్ట్రేషన్ నంబర్ / అప్లికేషన్ ఐడీ, పుట్టిన తేదీ వివరాలను నమోదు చేయాలి. వివరాలు సమర్పించిన వెంటనే హాల్ టికెట్ స్క్రీన్‌పై ప్రత్యక్షమవుతుంది. దానిని డౌన్‌లోడ్ చేసుకుని భవిష్యత్తు అవసరాల కోసం ప్రింటవుట్ తీసుకోవాలి.

అభ్యర్థులు తమకు కేటాయించిన పరీక్షా కేంద్రానికి కనీసం 45 నిమిషాల ముందే చేరుకోవాల్సి ఉంటుంది. హాల్ టికెట్‌తో పాటు ఆధార్ కార్డు, ఓటర్ ఐడీ లేదా పాన్ కార్డు వంటి ఏదైనా ఒక అసలు ప్రభుత్వ గుర్తింపు కార్డును తప్పనిసరిగా తీసుకెళ్లాలి. ఎలక్ట్రానిక్ పరికరాలు, మొబైల్ ఫోన్లు, క్యాలిక్యులేటర్లకు పరీక్ష కేంద్రంలోకి అనుమతి ఉండదు.