పండుగల కోసం 700కు పైగా ప్రత్యేక రైళ్లు.. వారం రోజుల్లో సుమారు 4 లక్షల అదనపు ప్రయాణికులు

దక్షిణ మధ్య రైల్వే ప్రయాణికుల రద్దీ కోసం ప్రత్యేక రైళ్లను నడుపుతోంది. అంతేకాదు.. ప్రయాణికులకు ఇబ్బందులు కలగకుండా చేసిన ఏర్పాట్ల గురించి వెల్లడించింది.

దసరా, దీపావళి, ఛత్ పూజ పండుగల సమయంలో పెరిగే అదనపు ప్రయాణికుల రద్దీని ఎదుర్కొనేందుకు దక్షిణ మధ్య రైల్వే సిద్ధమైంది. పెరిగిన ప్రయాణ డిమాండ్‌ను తీర్చడానికి, ప్రయాణికుల రాకపోకలను సులభతరం చేయడానికి ఈ పండుగ, సెలవు దినాల సీజన్‌లో దేశవ్యాప్తంగా వివిధ ముఖ్య గమ్యస్థానాలను కలుపుతూ 700కు పైగా ప్రత్యేక రైళ్లను ఎస్‌సీఆర్ నడుపుతోంది.

దక్షిణ మధ్య రైల్వే ప్రత్యేక రైళ్లు

ఈ రైళ్లు దక్షిణ మధ్య రైల్వేలోని ముఖ్యమైన స్టేషన్ల నుండి ప్రయాగ్‌రాజ్, దానాపూర్, సంత్రాగచ్చి, నిజాముద్దీన్, తిరువణ్ణామలై, బ్రహ్మపూర్, సంత్రాగచ్చి, నాగర్‌కోయిల్, ఛప్రా, బెంగళూరు, మంగళూరు, కొల్లాం, పాలన్‌పూర్, తిరుపతి, నరసపూర్, కాకినాడ, విశాఖపట్నం, శ్రీకాకుళం రోడ్ మొదలైన డిమాండ్ ఉన్న గమ్యస్థానాలకు నడపుతున్నారు.

అంతేకాకుండా పండుగ రద్దీని సమర్థవంతంగా నిర్వహించడానికి, ప్రయాణికుల రాకపోకలు సజావుగా సాగేలా చూసేందుకు జోన్ వ్యాప్తంగా ఉన్న ముఖ్యమైన రైల్వే స్టేషన్లలో ఎస్సీఆర్ విస్తృతమైన భద్రతా చర్యలను చేపట్టింది. అధిక రద్దీ ఉండే స్టేషన్లలో జనసమూహ నిర్వహణ, ప్రయాణికుల సౌకర్యం, భద్రతా ఏర్పాట్లపై ప్రత్యేక శ్రద్ధ వహిస్తున్నారు.

భద్రతా ఏర్పాట్లను పటిష్టం చేయడానికి స్టేషన్లలో అదనపు ఆర్పీఎఫ్ సిబ్బందిని మోహరించారు. అంతేకాకుండా ప్రయాణికుల రాకపోకలను పర్యవేక్షించడానికి, ఏర్పాట్లను సమన్వయం చేయడానికి, ప్రయాణికుల అవసరాలను తీర్చడానికి ప్రధాన స్టేషన్లలో వాణిజ్య శాఖ అధికారులను, ఇతర ముఖ్యమైన, చిన్న స్టేషన్లలో పర్యవేక్షకులను కూడా మోహరించారు.

వెయిట్‌లిస్ట్‌లో ఉన్న ప్రయాణికులు తమ గమ్యస్థానాలకు సౌకర్యవంతంగా చేరుకునేలా చూసేందుకు, సాధ్యమైన చోటల్లా రైళ్లకు అదనపు కోచ్‌లను జతచేస్తున్నారు. సికింద్రాబాద్ (4), హైదరాబాద్ (2), కాచిగూడ (2), లింగంపల్లి (2), చర్లపల్లి (2) వంటి ప్రధాన స్టేషన్లలో అదనపు టికెట్ కౌంటర్లు అందుబాటులోకి వచ్చాయి.

ప్రధాన రైల్వే స్టేషన్లలో అదనపు ఆటోమేటిక్ టికెట్ వెండింగ్ మెషీన్‌లను(ATVMలను) ఏర్పాటు చేసి, వాటిని వినియోగంలోకి తెచ్చారు. ప్రయాణికులకు యూటీఎస్ మొబైల్ యాప్ గురించి అవగాహన కల్పించడానికి, రైల్వే స్టేషన్ కౌంటర్ల వద్ద క్యూలో నిలబడకుండా UTS యాప్ ద్వారా జనరల్ టిక్కెట్లను కొనుగోలు చేసేలా వారిని ప్రోత్సహించడానికి సిబ్బందిని నియమించారు.

స్టేషన్ ప్రాంగణంలోని టికెట్ కౌంటర్ల వద్ద ఇతర ప్రముఖ ప్రదేశాలలో క్యూఆర్ కోడ్‌లను ప్రదర్శించడం, తద్వారా ప్రయాణికులు యూటీఎస్ యాప్ ద్వారా స్కాన్ చేసి సాధారణ టిక్కెట్లను సులభంగా కొనుగోలు చేయగలగడం అవుతుంది. మహిళా ప్రయాణికుల అవసరాలను తీర్చడానికి, వారికి భద్రత, సౌకర్యం, సౌలభ్యం కల్పించడానికి సికింద్రాబాద్, హైదరాబాద్, కాచిగూడ స్టేషన్లలో ప్రత్యేక మహిళా సిబ్బందిని నియమించారు.

ప్రత్యేక రైళ్లలోని ఖాళీ బెర్త్ స్థానాల సమాచారాన్ని వివిధ ప్లాట్‌ఫారమ్‌ల ద్వారా తెలియజేస్తున్నారు అధికారులు. ప్రత్యేక రైళ్లను నడపడం గురించి డిస్‌ప్లే బోర్డులను ఏర్పాటు చేసి, పబ్లిక్ అడ్రస్ సిస్టమ్ ద్వారా తరచుగా ప్రకటనలు చేస్తున్నారు. ప్రధాన స్టేషన్లలో, ప్రయాణికులకు మార్గదర్శనం చేయడానికి అదనపు విచారణ, సహాయ కౌంటర్లను ఏర్పాటు చేశారు. ప్రయాణికులలో అవగాహన కల్పించి, గందరగోళాన్ని నివారించడానికి ప్లాట్‌ఫాం నంబర్లు, కోచ్ స్థానం గురించి తరచుగా ప్రకటనలు చేస్తున్నారు.

వాహనాల రాకపోకలు సజావుగా సాగేందుకు సికింద్రాబాద్, చర్లపల్లి మొదలైన చోట్ల యాక్సెస్ కంట్రోల్ సిస్టమ్‌ను ప్రవేశపెట్టారు. ఇతర స్టేషన్లలో, సర్క్యులేటింగ్ ఏరియాలో రద్దీని నివారించడానికి వాహనాలు, ఆటోలను నియంత్రించేందుకు ఆర్‌పీఎఫ్ సిబ్బందిని మోహరించారు. గత వారం రోజుల్లో ఈ జోన్ సుమారు 4 లక్షల అదనపు ప్రయాణికులను రవాణా చేసింది .