అక్టోబర్ 1న 2 డీఏలకు తెలంగాణ కేబినెట్ ఆమోదం.. 15 రోజుల్లోగా పీఆర్‌సీ రిపోర్ట్

దసరా పండుగకు తెలంగాణ ప్రభుత్వ ఉద్యోగులకు 2 డీఏలను ఇచ్చేందుకు ప్రభుత్వం అంగీకరించింది. అయితే అక్టోబర్1న జరిగే కేబినెట్ సమావేశంలో దీనికి ఆమోదం లభించనుంది.

తెలంగాణ రాష్ట్ర ప్రభుత్వ ఉద్యోగులకు రాష్ట్ర ప్రభుత్వం తీపి కబురు అందించేందుకు సిద్ధమైంది. దీర్ఘకాలంగా పెండింగ్‌లో ఉన్న కరువు భత్యం (Dearness Allowance - DA) వాయిదాల విడుదలపై ప్రభుత్వంతో ఉద్యోగ సంఘాల జాయింట్ యాక్షన్ కమిటీ నాయకులు జరిపిన చర్చలు సఫలమైన విషయం తెలిసిందే. అక్టోబర్ 1వ తేదీన జరగనున్న రాష్ట్ర కేబినెట్ సమావేశంలో రెండు డీఏల విడుదలకు ఆమోదం లభించే అవకాశం ఉంది.

తెలంగాణలో 2 డీఏలు

ఉద్యోగ సంఘాల నాయకులతో ప్రభుత్వం జరిపిన చర్చల ఆధారంగా, ప్రభుత్వం రెండు విడతల డీఏలను పండుగ కానుకలుగా అందించాలని ప్రణాళిక రూపొందించింది. రాబోయే దసరా పండుగ సందర్భంగా డీఏలు విడుదల చేయనున్నారు. అయితే వచ్చే ఏడాది జనవరిలో సంక్రాంతి పండుగ సందర్భంగా కూడా మరో డీఏ మంజూరు చేయాలని ప్రభుత్వం పరిశీలిస్తోందని అంటున్నారు.

ప్రభుత్వంతో జేఏసీ నాయకులు నిర్వహించిన ఉన్నత స్థాయి సమావేశంలో సానుకూల నిర్ణయం వెలువడింది. రెండు డీఏల మంజూరుకు హామీ లభించింది. ప్రభుత్వ ఉద్యోగులకు అత్యంత కీలకమైన వేతన సవరణ కమిషన్ అంశంపై కూడా ప్రభుత్వం ఉద్యోగ ప్రతినిధులకు స్పష్టమైన హామీ ఇచ్చింది.

తదుపరి 15 రోజుల్లోగా పీఆర్‌సీ నివేదిక ప్రభుత్వాకి అందుతుందని, నివేదిక రాగానే దాని అమలుపై తక్షణ నిర్ణయం తీసుకుంటామని అధికారులు తెలిపారు. సీపీఎస్ స్థానంలో పాత పెన్షన్ విధానం పునరుద్ధరణ అంశాన్ని పరిశీలించడానికి ఒక ప్రత్యేక కమిటీని త్వరలోనే ఏర్పాటు చేస్తామని వెల్లడించారు.

ఉద్యోగులు, పింఛనుదారులకు రావాల్సిన దాదాపు రూ. 10,000 కోట్ల పెండింగ్ బకాయిలను మార్చి 2027 నాటికి విడతల వారీగా పూర్తిగా చెల్లిస్తారని భావిస్తున్నారు. ప్రభుత్వం నుంచి దసరా డీఏ విడుదలతో పాటు పీఆర్‌సీ, పెన్షన్ల బకాయిలపై హామీ లభించడంతో ఉద్యోగ సంఘాల నాయకులు హర్షం వ్యక్తం చేశారు. ఈ సానుకూల పరిణామాల నేపథ్యంలో, జేఏసీ నాయకులు తమ భవిష్యత్ కార్యాచరణను వాయిదా వేశారు. ప్రభుత్వ సానుకూల వైఖరితో రాష్ట్రంలోని లక్షలాది మంది ఉద్యోగ, ఉపాధ్యాయ, పెన్షనర్ల కుటుంబాల్లో సంతోషం వ్యక్తమవుతోంది.