TG Special TET Notification :తెలంగాణలోని ఇన్-సర్వీస్ ఉపాధ్యాయులకు రాష్ట్ర విద్యాశాఖ తీపి కబురు అందించింది. ఇప్పటికే సర్వీస్లో ఉన్న ఉపాధ్యాయుల కోసం ప్రత్యేకంగా ఉపాధ్యాయ అర్హత పరీక్ష (TET) నిర్వహించేందుకు ప్రభుత్వం కసరత్తు పూర్తి చేసింది. ఇందులో భాగంగా అక్టోబర్ 1వ తేదీన ఇన్-సర్వీస్ టీచర్ల టెట్ నోటిఫికేషన్ను అధికారికంగా విడుదల చేయనున్నారు. నోటిఫికేషన్ వచ్చిన వెంటనే దరఖాస్తు ప్రక్రియను ప్రారంభించి…. నవంబర్ నెలలోనే(16 నుంచి 21 ) పరీక్షను పూర్తి చేయాలని విద్యాశాఖ నిర్ణయించింది.
ఏడాదికి రెండుసార్లు….
ప్రభుత్వ ప్రాథమిక, ఉన్నత పాఠశాలల్లో పనిచేస్తున్న ఇన్-సర్వీస్ టీచర్ల ప్రమోషన్లు, ఇతర సర్వీసు అంశాల్లో టెట్ అర్హత కీలకంగా మారింది. ఈ నేపథ్యంలో ఉపాధ్యాయులకు ఇబ్బంది కలగకుండా ఉండేందుకు ప్రత్యేక చర్యలు చేపట్టారు. ఇకపై ఇన్-సర్వీస్ టీచర్ల కోసం క్రమం తప్పకుండా ఏడాదికి రెండుసార్లు టెట్ పరీక్షను నిర్వహిస్తామని విద్యాశాఖ వర్గాలు స్పష్టం చేశాయి. ప్రభుత్వ ఈ నిర్ణయంతో వేలాది మంది ఉపాధ్యాయులకు లబ్ధి చేకూరనుంది.
గతంలో క్రమం తప్పకుండా టెట్ నిర్వహించకపోవడం వల్ల పదోన్నతుల సమయంలో ఉపాధ్యాయులు తీవ్ర ఇబ్బందులు ఎదుర్కొన్నారు. ప్రస్తుతం విద్యాశాఖ తీసుకున్న ఈ నిర్ణయం వల్ల అర్హత సాధించాలనుకునే ఉపాధ్యాయులకు తగినన్ని అవకాశాలు లభిస్తాయి. అక్టోబర్ 1న వచ్చే నోటిఫికేషన్లో పరీక్ష తేదీలు, సిలబస్, దరఖాస్తు రుసుము, అర్హతల వివరాలను స్పష్టంగా వెల్లడించనున్నారు.
ఇక ఇటీవలే ఇన్ సర్వీస్ టీచర్ల కోసం విద్యాశాఖ నిర్వహించిన ప్రత్యేక టెట్ ఫలితాలు శనివారం విడుదలయ్యాయి. పరీక్ష రాసిన వారిలో15,749 (70.07 శాతం) మంది ఉపాధ్యాయులు మాత్రమే క్వాలిఫై అయ్యారు. ఈనెల 8,9 తేదీల్లో మూడు సెషన్లలో ఎగ్జామ్ నిర్వహించగా… మొత్తం 22,477 మంది హాజరయ్యారు. వీరిలో 70.07 శాతం మంది ఉత్తీర్ణత సాధించారు. ఈ ఫలితాలను https://tgtet.aptonline.in/ వెబ్ సైట్ ద్వారా చెక్ చేసుకోవచ్చు.