TG DOST 2026 Web Options : డిగ్రీ అడ్మిషన్ల కోసం దోస్త్ లో రిజిస్ట్రేషన్ చేసుకున్న అభ్యర్థులకు కీలక అప్డేట్. ఇప్పటికే మొదటి విడత రిజిస్ట్రేషన్లు పూర్తి అయిన నేపథ్యంలో…. వెబ్ ఆప్షన్లు ఎంచుకోవాల్సి ఉంటుంది. అయితే ఈ గడువు కూడా నేటితో (మే 08) పూర్తి కానుంది. కాబట్టి ఫస్ట్ ఫేజ్ కింద రిజిస్ట్రేషన్ చేసుకున్న విద్యార్థులు… తప్పకుండా వెబ్ ఆప్షన్లు ఎంచుకోవాలని అధికారులు సూచిస్తున్నారు.
దోస్త్ ప్రక్రియలో వెబ్ ఆప్షన్ల ఎంపిక అత్యంత కీలకమైన ప్రాసెస్. విద్యార్థులు ఇచ్చే ప్రాధాన్యత క్రమం ఆధారంగానే సీట్ల కేటాయింపు జరుగుతుంది. అభ్యర్థులు ఎన్ని ఆప్షన్లనైనా ఇచ్చుకోవచ్చు. ఒక్కసారి ఆప్షన్లు ఇచ్చాక… గడువు ముగిసే వరకు వాటిని ఎన్నిసార్లైనా మార్చుకునే సదుపాయం ఉంటుంది. కానీ వెబ్ ఆప్షన్లు ఎంచుకోకపోతే సీట్ల కేటాయింపు ఉండదు. కాబట్టి ఆయా విద్యార్థులు ఈ ప్రాసెస్ తప్పకుండా నిర్దేశిత సమయంలో పూర్తి చేసుకోవాల్సి ఉంటుంది.
ఈనెల 14న సీట్ల కేటాయింపు…
డిగ్రీ మొదటి విడత సీట్ల కేటాయింపు మే 14వ తేదీన ఉంటుంది. ఆన్లైన్ సెల్ఫ్ రిపోర్టింగ్ మే 15 నుంచి 23వ తేదీ వరకు ఉంటుంది. గత ఏడాది లెక్కల ప్రకారం దోస్త్, నాన్-దోస్త్, రెసిడెన్షియల్ కళాశాలల్లో కలిపి రాష్ట్రంలో మొత్తం 4.40 లక్షల సీట్లు అందుబాటులో ఉన్నాయి.
దోస్త్ ద్వారా తెలంగాణలోని ఉస్మానియా యూనివర్సిటీ, కాకతీయ వర్సిటీ, తెలంగాణ వర్సిటీ, పాలమూరు వర్సిటీ, మహాత్మాగాంధీ, శాతవాహన విశ్వవిద్యాలయాల పరిధిలోని డిగ్రీ కాలేజీల్లో సీట్లను భర్తీ చేస్తారు. అంతేకాకుండా చాకలి ఐలమ్మ మహిళా వర్సిటీ, కొత్తగూడెంలోని మన్మోహన్సింగ్ ఎర్త్ సైన్సెస్ వర్సిటీ, జేఎన్టీయూ పరిధిలోని కాలేజీల్లో బీఏ, బీకాం, బీఎస్సీ, బీబీఏ, బీబీఎం, బీసీఏ, బీఎస్డబ్ల్యూ వంటి కోర్సుల్లో సీట్లను ఈ ప్రక్రియ ద్వారా భర్తీ చేస్తారు.
- దోస్త్ ముఖ్యమైన తేదీలు ఇవే:
- వెబ్ ఆప్షన్ల నమోదుకు చివరి తేదీ : మే 8, 2026 వరకు
- మొదటి విడత సీట్ల కేటాయింపు: మే 14, 2026
- ఆన్లైన్ సెల్ఫ్ రిపోర్టింగ్: మే 15 నుండి మే 23, 2026 వరకు
- అధికారిక వెబ్ సైట్ - https://dost.cgg.gov.in