E-Paper
2 డీఏల విడుదలకు ప్రభుత్వం గ్రీన్ సిగ్నల్.. నెలాఖరు నాటికి పీఆర్సీ నివేదిక!
రెండు డీఏలు ఇచ్చేందుకు తెలంగాణ సర్కార్ అంగీకరించింది. ఈ విషయాన్ని ఉద్యోగ సంఘాలు చెప్పాయి. అంతేకాదు పీఆర్సీ నివేదిక కూడా ఈ నెల ఆఖరు వరకు వచ్చే అవకాశం ఉంది.
Prefer HTon Google
పెండింగ్లో ఉన్న కరువు భత్యం (DA) విడుదల, వేతన సవరణ (PRC) నివేదికపై తెలంగాణ ప్రభుత్వ ఉద్యోగులకు ఊరట లభించింది. రాష్ట్రంలో ఉద్యోగుల సమస్యల పరిష్కారం దిశగా అడుగులు వేస్తూ, ప్రభుత్వ ప్రధాన కార్యదర్శి సంజయ్ జాజు సచివాలయంలో ఉద్యోగ సంఘాల ప్రతినిధులతో కీలక భేటీ నిర్వహించారు. ఈ చర్చల అనంతరం ప్రభుత్వ ఉద్యోగులకు రెండు డీఏలను మంజూరు చేసేందుకు రాష్ట్ర ప్రభుత్వం అధికారికంగా అంగీకరించినట్లు ఉద్యోగ సంఘాల నేతలు స్పష్టం చేశారు.
క్యాబినెట్ స్థాయి మార్గదర్శకాలకు అనుగుణంగా ఉద్యోగ సంఘాల డిమాండ్లపై సానుకూలంగా స్పందించిన ప్రభుత్వం రెండు డీఏల ప్రకటనకు ఆమోదం తెలిపింది. మొదటి డీఏ 3.46 శాతం చొప్పున విడుదల చేసేందుకు ప్రభుత్వం ఆమోదముద్ర వేసింది.
రెండో డీఏ 2.74 శాతం చొప్పున ఇచ్చేందుకు అంగీకరించింది. ఉద్యోగ సంఘాల నాయకులు మొత్తం మూడు డీఏలను వెంటనే విడుదల చేయాలని కోరినప్పటికీ, ప్రభుత్వం రెండు డీఏలకు తక్షణ గ్రీన్ సిగ్నల్ ఇచ్చింది. మిగిలిన మూడో డీఏను రాబోయే 3 నుండి 4 నెలల వ్యవధిలో విడుదల చేస్తామని ప్రభుత్వం నుంచి స్పష్టమైన హామీ లభించింది.
వేతన సవరణ కమిషన్(Pay Revision Commission) నివేదిక సమర్పణపై కూడా ఈ సమావేశంలో స్పష్టత వచ్చింది. పీఆర్సీ ప్రక్రియ తుది దశకు చేరుకుందని, ఈ నెలాఖరు నాటికి కమిషన్ తన సమగ్ర నివేదికను ప్రభుత్వానికి అందజేసే అవకాశం ఉందని సీఎస్ సంజయ్ జాజు తెలిపారని ఉద్యోగ సంఘాలు పేర్కొన్నాయి. పీఆర్సీ రిపోర్టు చేతికి అందగానే దాని ఆధారంగా ఉద్యోగుల జీతభత్యాల పెంపుపై తక్షణ చర్యలు తీసుకుంటామని ప్రభుత్వం హామీ ఇచ్చింది.
కంట్రిబ్యూటరీ పెన్షన్ స్కీమ్ (CPS)ను రద్దు చేసి, పాత పెన్షన్ విధానం (OPS) పునరుద్ధరణ అంశంపై ప్రభుత్వం స్పష్టమైన కార్యాచరణను ప్రకటించింది. ఓపీఎస్ అమలుకు ఉన్న అవకాశాలను, ఇతర రాష్ట్రాల్లో అమలవుతున్న విధానాలను సమగ్రంగా పరిశీలించడానికి ఉద్యోగ సంఘాల ప్రతినిధులు, ప్రభుత్వ ఉన్నతాధికారులతో కూడిన ప్రత్యేక ఉమ్మడి కమిటీని ఏర్పాటు చేయాలని నిర్ణయించారు. ఈ కమిటీ వివిధ రాష్ట్రాల్లో క్షేత్రస్థాయి అధ్యయనం జరిపి ప్రభుత్వానికి నివేదికను అందిస్తుంది.
భేటీ అనంతరం మీడియాతో మాట్లాడిన ఉద్యోగ సంఘాల ప్రతినిధులు ప్రభుత్వ తీరుపై సంతృప్తి వ్యక్తం చేశారు. గతంలో ప్రతి నెలా ఒకటో తారీఖున జీతాలు పొందడానికి ఎన్నో ఆందోళనలు, పోరాటాలు చేయాల్సి వచ్చిందని, అయితే ప్రస్తుత ప్రభుత్వం అధికారంలోకి వచ్చిన నాటి నుంచి ప్రతి నెల 1వ తేదీనే సక్రమంగా జీతాలు చెల్లిస్తోందని గుర్తుచేశారు. ఉద్యోగులకు ఎదురవుతున్న ప్రతి సమస్యను ప్రాధాన్యత క్రమంలో పరిష్కరిస్తున్నందుకు ముఖ్యమంత్రి రేవంత్ రెడ్డి, సీఎస్ సంజయ్ జాజుకి ఉద్యోగ సంఘాల నేతలు కృతజ్ఞతలు చెప్పారు.
