E-Paper
TG TET January 2027 : తెలంగాణ టెట్ నోటిఫికేషన్ విడుదల.. జనవరి 3 నుంచి పరీక్షలు.. పూర్తి షెడ్యూల్
TG TET January 2027 Notification : తెలంగాణ టెట్ నోటిఫికేషన్ విడుదలైంది. జనవరి 3 నుంచి పరీక్షలు నిర్వహించనున్నారు. పూర్తి షెడ్యూల్ చూడండి.
Prefer HTon Google
ఉపాధ్యాయ కొలువుల కోసం ప్రిపేర్ అవుతున్న అభ్యర్థులకు తెలంగాణ విద్యాశాఖ తీపి కబురు అందించింది. ఎంతోకాలంగా ఎదురుచూస్తున్న తెలంగాణ ఉపాధ్యాయ అర్హత పరీక్ష(TG TET - January 2027) నోటిఫికేషన్‌ను పాఠశాల విద్యాశాఖ డైరెక్టర్ డాక్టర్ నవీన్ నికోలస్ విడుదల చేశారు. రాష్ట్రవ్యాప్తంగా అర్హులైన అభ్యర్థుల నుంచి ఆన్‌లైన్ ద్వారా దరఖాస్తులను ఆహ్వానిస్తున్నట్లు ప్రకటించారు.
టెట్ పరీక్షను పూర్తిగా ఆన్‌లైన్ కంప్యూటర్ బేస్డ్ టెస్ట్ (CBT) విధానంలోనే నిర్వహించనున్నారు. నవంబర్ 16వ తేదీ నుంచి అప్లికేషన్ల ప్రక్రియ ప్రారంభం కానుండగా 2027 జనవరి 3 నుంచి 15వ తేదీ వరకు పరీక్షలు జరగనున్నాయి.
TG TET 2027 ముఖ్యమైన తేదీలు
ఇన్ఫర్మేషన్ బులెటిన్ అండ్ దరఖాస్తుల ప్రారంభం-నవంబర్ 16
ఆన్‌లైన్ దరఖాస్తులకు చివరి తేదీ - డిసెంబర్ 10
హాల్ టికెట్ల డౌన్‌లోడ్ - డిసెంబర్ 28 నుంచి
TG TET పరీక్షల తేదీలు - జనవరి 3 నుండి జనవరి 15, 2027 వరకు
ఫలితాల విడుదల - ఫిబ్రవరి రెండో వారం
రెండు పేపర్లు
తెలంగాణ టెట్ పరీక్షను రెండు పేపర్లుగా నిర్వహిస్తారు. ప్రతి పేపర్ పరీక్ష సమయం 2 గంటల 30 నిమిషాలు ఉంటుంది. రోజుకు రెండు సెషన్లలో (ఉదయం 9:00 నుండి 11:30 వరకు, మధ్యాహ్నం 2:00 నుండి 4:30 వరకు) పరీక్షలు జరుగుతాయి.
పేపర్-1 (Paper-I): 1వ తరగతి నుండి 5వ తరగతి వరకు (ప్రైమరీ స్కూల్) బోధించాలనుకునే అభ్యర్థుల కోసం.
పేపర్-2 (Paper-II): 6వ తరగతి నుండి 8వ తరగతి వరకు (అప్పర్ ప్రైమరీ) బోధించాలనుకునే అభ్యర్థుల కోసం.
రెండు పేపర్లు: అర్హత కలిగిన అభ్యర్థులు 1 నుండి 8వ తరగతి వరకు బోధించేందుకు వీలుగా రెండు పేపర్లకు కూడా దరఖాస్తు చేసుకోవచ్చు.
దరఖాస్తు ఫీజు
కేటగిరీల వారీగా పరీక్ష ఫీజు వివరాలను విద్యాశాఖ వెల్లడించింది: జనరల్, బీసీ అభ్యర్థులు ఏదైనా ఒక పేపర్‌కు రూ. 750, రెండు పేపర్లకు కలిపి రూ. 1,000 చెల్లించాలి. ఎస్సీ, ఎస్టీ, దివ్యాంగులు ఒక పేపర్‌కు రూ. 700, రెండు పేపర్లకు కలిపి రూ. 950 ఫీజుగా నిర్ణయించారు.
నవంబర్ 16వ తేదీ నుంచి తెలంగాణ పాఠశాల విద్యాశాఖ అధికారిక వెబ్‌సైట్ https://schooledu.telangana.gov.in లో పూర్తి స్థాయి ఇన్ఫర్మేషన్ బులెటిన్ అందుబాటులోకి వస్తుంది.
