TGSRTC Bus Charges : ఆ బస్సుల్లో 40 శాతం ఛార్జీలు తగ్గింపు.. టీజీఎస్ఆర్టీసీ నిర్ణయం

TGSRTC Bus Charges : హైదరాబాద్‌లోని పలు ప్రాంతాల నుంచి శంషాబాద్‌ ఎయిర్‌పోర్ట్‌కు నడిచే పుష్పక్‌ ఏసీ బస్సుల ఛార్జీలను టీజీఎస్‌ఆర్టీసీ భారీగా తగ్గించింది. 40 శాతం వరకు ఛార్జీ తగ్గిస్తూ ప్రకటన విడుదల చేసింది. అక్టోబర్ 7 నుంచే కొత్త ఛార్జీలు అమలులోకి వచ్చాయి.

జూన్ 2025లో టికెట్ ధరల పెంపుతో ప్రయాణికులు తీవ్ర ఇబ్బందులు ఎదుర్కొన్న విషయం తెలిసిందే. దీనిపై చర్చ నడిచింది. అయితే తాజాగా తెలంగాణ రాష్ట్ర రోడ్డు రవాణా సంస్థ (TGSRTC) కీలక నిర్ణయం తీసుకుంది. హైదరాబాద్ శివార్లలోని రాజీవ్ గాంధీ అంతర్జాతీయ విమానాశ్రయానికి (RGIA) నడిచే పుష్పక్ ఏసీ బస్సుల ఛార్జీలను 40 శాతం వరకు తగ్గిస్తున్నట్లు ప్రకటించింది. ఈ సవరించిన ధరలు అక్టోబర్ 7 నుండి అమల్లోకి వస్తాయి.

టీజీఎస్ఆర్టీసీ

మియాపూర్ నుండి ఎయిర్‌పోర్ట్‌కు నడిచే సర్వీసుల విషయానికొస్తే.. మియాపూర్ క్రాస్‌రోడ్స్ నుండి ఛార్జీని రూ.350 నుండి రూ.250కి, JNTU నుండి ఛార్జీని రూ.350 నుండి రూ.200కి తగ్గించారు. అలాగే శిల్పారామం నుండి ఛార్జీని రూ.300 నుండి రూ.200కి, గచ్చిబౌలి నుండి ఛార్జీని రూ.300 నుండి రూ.150కి తగ్గించారు.

అదేవిధంగా లింగంపల్లి నుండి విమానాశ్రయానికి నడిచే పుష్పక్ సర్వీసుల ఛార్జీలను కూడా తగ్గించారు. లింగంపల్లి నుండి ఛార్జీని రూ.300 నుండి రూ.200కి, అల్విన్ ఎక్స్-రోడ్ నుండి రూ.350 నుండి రూ.200కి తగ్గించారు. కొండాపూర్ నుండి ఛార్జీని రూ.300 నుండి రూ.200కి తగ్గించగా, కొత్తగూడ, గచ్చిబౌలి వద్ద బస్సు ఎక్కే ప్రయాణికులు ఇకపై రూ.300కి బదులుగా రూ.150 చెల్లిస్తే సరిపోతుంది.

గత ఏడాది టీజీఎస్ఆర్టీసీ అంతర్గత చర్చల తర్వాత ఛార్జీలు పెంటారు. అప్పట్లో, ధరలలో మార్పు లేకపోవడం, బస్సుల్లో ప్రయాణికుల సంఖ్య తక్కువగా ఉండటం వంటి అంశాలు నిర్వహణ వ్యయాలపై ప్రభావం చూపుతున్నాయని అధికారులు ఆందోళన వ్యక్తం చేశారు.

ఎయిర్‌పోర్ట్‌కు రాకపోకలు సాగించే ప్రయాణికులు తగ్గించిన ఛార్జీలను ఉపయోగించుకోవాలని అధికారులు కోరారు. ప్రయాణికులకు సౌకర్యవంతమైన, చౌకైన ప్రజా రవాణా అందించాలని తమ ఉద్దేశమని పేర్కొన్నారు. ఎయిర్‌పోర్టుకు కనెక్టివిటీ చేసే పుష్పక్ బస్సు సర్వీసుల్లో ఛార్జీల తగ్గింపులతో ప్రయాణికులకు భారం తగ్గనుంది.