సింగరేణి ప్రైవేటీకరణ ప్రసక్తే లేదు.. కేటీఆర్ చెప్పినవి అబద్ధాలు : మంత్రి శ్రీధర్ బాబు

సింగరేణి ప్రైవేటీకరణ ప్రసక్తే లేదని మంత్రి శ్రీధర్ బాబు స్పష్టం చేశారు. కేటీఆర్ చెప్పినవన్నీ అబద్ధాలని పేర్కొన్నారు. గతంలో బీఆర్ఎస్ సింగరేణిని ఏటీఎంలా వాడుకుందని ఆరోపణలు చేశారు.

సింగరేణి సంస్థను ప్రైవేటీకరించే ప్రసక్తే లేదని, ఈ విషయంలో తప్పుడు ప్రచారం చేస్తే చూస్తూ ఊరుకోబోమని రాష్ట్ర పరిశ్రమలు, సమాచార సాంకేతిక శాఖ మంత్రి శ్రీధర్ బాబు స్పష్టం చేశారు. మీడియాతో మాట్లాడిన ఆయన.. బీఆర్‌ఎస్ వర్కింగ్ ప్రెసిడెంట్ కేటీఆర్‌పై తీవ్రస్థాయిలో విరుచుకుపడ్డారు.

మంత్రి శ్రీధర్ బాబు

పదేళ్ల పాలన తర్వాత ఇప్పుడు కేటీఆర్‌కు సింగరేణి గుర్తుకురావడం విడ్డూరంగా ఉందని మంత్రి శ్రీధర్ బాబు వ్యాఖ్యానించారు. గత బీఆర్ఎస్ ప్రభుత్వం సింగరేణిని తమ రాజకీయ ప్రయోజనాల కోసం ఏటీఎంలా వాడుకుందని ఆరోపించారు. గత పదేళ్లలో సింగరేణి కార్మికులకు ఇచ్చిన హామీలను బీఆర్ఎస్ ఏ ఒక్కటి నెరవేర్చలేదని విమర్శించారు.

నిజానికి సింగరేణిలోని ‘తాడిచర్ల కోల్ బ్లాక్’ను ప్రైవేటు సంస్థకు కట్టబెట్టింది కేటీఆర్, బీఆర్ఎస్ ప్రభుత్వమేనని శ్రీధర్ బాబు అన్నారు. గత ప్రభుత్వ హయాంలో సింగరేణి సంస్థకు వేల కోట్ల రూపాయల బకాయిలను చెల్లించకుండా కొండగా మార్చారని దుయ్యబట్టారు.

కాంగ్రెస్ ప్రభుత్వం అధికారంలోకి వచ్చిన తర్వాత సింగరేణిలో ప్రతి ప్రక్రియ పారదర్శకంగా జరుగుతోందని మంత్రి తెలిపారు. బీఆర్ఎస్ హయాంలో కాంట్రాక్టులన్నీ తమ అనుచరులకే కట్టబెట్టారని, కానీ ఇప్పుడు ప్రతిదీ నిబంధనల ప్రకారమే జరుగుతోందన్నారు.

సింగరేణిలో బొగ్గు మాయమైందనడం కేవలం రాజకీయ ప్రయోజనాల కోసం చేస్తున్న అసత్య ఆరోపణ మాత్రమేనని మంత్రి శ్రీధర్ బాబు కొట్టిపారేశారు. బొగ్గు ఉత్పత్తి నుంచి రవాణా, సరఫరా వరకు అధునాతన సాంకేతికతతో పర్యవేక్షణ ఉందన్నారు.

యాదాద్రి థర్మల్ పవర్ ప్లాంట్‌కు ఏటా 14 మిలియన్ టన్నుల బొగ్గు అవసరం ఉంటే, దాని ఉత్పత్తిపై గత ప్రభుత్వం దృష్టి సారించకపోవడం వల్లే సమస్యలు వచ్చాయని మంత్రి శ్రీధర్ బాబు తెలిపారు. కేసీఆర్ ప్రభుత్వం కొత్త బొగ్గు గనుల ఆవిష్కరణను పూర్తిగా నిర్లక్ష్యం చేసిందని మండిపడ్డారు. కాంగ్రెస్ ప్రభుత్వం అధికారంలోకి వచ్చాక ఒడిశాలోని నైనీ కోల్ బ్లాక్ నుంచి బొగ్గును వేగంగా తరలించి యాదాద్రి థర్మల్ పవర్ ప్లాంట్‌కు నిరంతరాయంగా సరఫరా చేస్తున్నామని శ్రీధర్ బాబు వివరించారు.