Hyderabad ORR Road Accident :హైదరాబాద్ నగర శివార్లలో అర్థరాత్రి వేళ ఘోర రోడ్డు ప్రమాదం చోటుచేసుకుంది. ఔటర్ రింగ్ రోడ్డు రాజేంద్రనగర్ పోలీసు స్టేషన్ పరిధిలోని అప్పా జంక్షన్ వద్ద వేగంగా వస్తున్న ఆటో, ముందు వెళ్తున్న డీసీఎం వాహనాన్ని వెనుక నుంచి బలంగా ఢీకొట్టింది. ఈ ఘటనలో ముగ్గురు అక్కడికక్కడే దుర్మరణం పాలవగా….. మరో ఇద్దరి పరిస్థితి అత్యంత విషమంగా ఉంది.
ఎగ్జిట్ వద్ద ప్రమాదం…
ప్రమాద సమయంలో ఆటోలో పెయింటింగ్ పనులు ముగించుకుని తిరిగి వస్తున్న కార్మికులు ఉన్నారు. వీరంతా శంషాబాద్ వైపు నుంచి మొయినాబాద్‌కి ప్రయాణిస్తున్నారు. ఔటర్ రింగ్ రోడ్డు నుంచి అప్పా జంక్షన్ వద్ద ఎగ్జిట్ అవుతుండగా ఈ దుర్ఘటన జరిగింది.
సాధారణంగా పరిమిత సంఖ్యలోనే ప్రయాణికులను తీసుకెళ్లాల్సిన ఆటోలో ఏకంగా 15 మందికిపైగా ప్రయాణిస్తున్నట్లు సమాచారం. పరిమితికి మించి ప్రయాణికులను ఎక్కించుకోవడం, రాత్రి వేళ కావడం వల్ల అదుపుతప్పి ముందు వెళ్తున్న డీసీఎంను ఢీకొట్టినట్లు ప్రాథమికంగా భావిస్తున్నారు.
స్థానికులు, తోటి వాహనదారులు అందించిన సమాచారంతో రాజేంద్రనగర్ పోలీసులు వెంటనే ఘటనా స్థలానికి చేరుకుని సహాయక చర్యలు చేపట్టారు. తీవ్రంగా గాయపడిన వారిని చికిత్స నిమిత్తం సమీపంలోని ఆసుపత్రికి తరలించారు. వీరిలో ఇద్దరి పరిస్థితి నిలకడగా లేకపోవడంతో వైద్యులు అత్యవసర చికిత్స అందిస్తున్నారు.
ఈ ప్రమాదంలో మృతి చెందిన వారిని సురేశ్‌, పెంటయ్య, లింగరాజుశెట్టిగా పోలీసులు ప్రాథమికంగా గుర్తించారు. ఈ ఘటనపై రాజేంద్రనగర్ పోలీసులు కేసు నమోదు చేసి దర్యాప్తు ప్రారంభించారు. ప్రమాదానికి గల ఖచ్చితమైన కారణాలపై ఆరా తీస్తున్నారు.