E-Paper
యాదగిరిగుట్టలో టీటీడీ మోడల్.. భూములపై సీఎం రేవంత్ కీలక ఆదేశాలు
తిరుమలలో భూమి కేటాయింపు విషయంలో తిరుమల తిరుపతి దేవస్థానం(టీటీడీ) అనుసరించిన విధానాన్ని యాదగిరిగుట్టలో కూడా అమలు చేసేందుకు చూడాలని సీఎం రేవంత్ రెడ్డి అన్నారు. సంబంధిత అధికారులు అధ్యయనం చేయాలని ఆదేశించారు.
యాదగిరిగుట్ట లక్ష్మీనరసింహ స్వామి దేవస్థాన అభివృద్ధి, భూ కేటాయింపులపై ముఖ్యమంత్రి రేవంత్ రెడ్డి కీలక సమీక్ష నిర్వహించారు. హైదరాబాద్లోని మర్రి చెన్నారెడ్డి మానవ వనరుల అభివృద్ధి సంస్థ(MCRHRD) బోధి పవిలియన్లో జరిగిన ఈ ఉన్నత స్థాయి సమావేశంలో ఆలయ అభివృద్ధి పనులను ఆయన నిశితంగా పరిశీలించారు. యాదగిరిగుట్టలో భూముల కేటాయింపునకు సంబంధించి తిరుమల తిరుపతి దేవస్థానం(టీటీడీ) అనుసరిస్తున్న విధానాలను అధ్యయనం చేసి, ఇక్కడ కూడా అదే తరహా పద్ధతిని అమలు చేయాలని అధికారులను ఆదేశించారు.
ఈ సమీక్షా సమావేశంలో సీఎం రేవంత్ రెడ్డి మాట్లాడుతూ.. హరే రామ హరే కృష్ణ ఫౌండేషన్కు మార్కెట్ ధర ప్రకారమే భూమిని కేటాయించాలని స్పష్టం చేశారు. అలాగే ఆలయ పరిధిలో వివిధ మఠాలకు, కుల సంఘాలకు భూములు కేటాయించే విషయంలో స్పష్టమైన నిబంధనలతో కూడిన ఒక నిర్దిష్టమైన విధానాన్ని రూపొందించాలని అధికారులకు సూచించారు. అయితే ఎవరికి భూములు కేటాయించినప్పటికీ.. ఆ భూములపై పూర్తి యాజమాన్య హక్కులు మాత్రం యాదగిరిగుట్ట దేవస్థానం వద్దే ఉండాలని చెప్పారు.
యాదగిరిగుట్ట కొండపై అతిథి గృహాల నిర్మాణానికి ముందుకు వచ్చిన దాతలు, ప్రముఖుల జాబితాను సిద్ధం చేయాలని ముఖ్యమంత్రి ఆదేశించారు. ఈ గెస్ట్ హౌస్ల నిర్మాణ అనుమతులను విడతల వారీగా మంజూరు చేయాలని, వీటి నిర్మాణ శైలిలోనూ తిరుమల మోడల్నే అనుసరించాలని పేర్కొన్నారు. అంతేకాకుండా భూసేకరణ ప్రక్రియకు అవసరమైన నిధులను తక్షణమే మంజూరు చేయాలని అధికారులను ఆదేశించారు. టీటీడీ భూకేటాయింపుల విధానంపై పరిశీలన చేయాలన్నారు.
యాదగిరిగుట్టపై ఆలయ నిర్మాణానికి సంబంధించి ఇంజనీర్ల కమిటీ ఇచ్చిన నివేదికను క్షుణ్ణంగా పరిశీలించి, వారం రోజుల్లోగా సమగ్ర నివేదికను తనకు సమర్పించాలని సీఎం రేవంత్ రెడ్డి గడువు విధించారు. యాదగిరిగుట్టను ఆధ్యాత్మికంగానే కాకుండా పర్యాటక కేంద్రంగానూ తీర్చిదిద్దేందుకు ప్రభుత్వ-ప్రైవేట్ భాగస్వామ్యం ప్రాతిపదికన ఒక 'టూరిజం సర్క్యూట్'ను ఏర్పాటు చేయాలని ఈ సందర్భంగా అధికారులకు దిశానిర్దేశం చేశారు.
