సామాన్య, మధ్యతరగతి ప్రజలకు నిత్యావసరమైన విజయ పాల ధరలు పెరిగాయి. ఈ మేరకు తెలంగాణ పాడి పరిశ్రమాభివృద్ధి సహకార సమాఖ్య లిమిటెడ్ (TGDDCF) కీలక నిర్ణయం తీసుకుంది. విజయ తెలంగాణ బ్రాండ్ కింద విక్రయించే స్టాండర్డైజ్డ్ మిల్క్ మరియు హోల్ మిల్క్ రకాలపై 500 మి.లీ (అర లీటరు) ప్యాకెట్‌కు రూ. 1 చొప్పున ధరను సవరించింది. ఈ పెంచిన సవరించిన ధరలు అక్టోబర్ 17 నుంచే (అక్టోబర్ 16 రాత్రి సప్లైల నుంచి) అమల్లోకి వస్తున్నాయని అధికారిక ప్రకటనలో స్పష్టం చేసింది.
ధరల వివరాలు:
- స్టాండర్డైజ్డ్ మిల్క్ (500 మి.లీ ): ఇప్పటివరకు అర లీటరు ప్యాకెట్ ఎంఆర్‌పీ రూ. 34 ఉండగా, తాజా పెంపుతో ఇది రూ. 35కి చేరింది.
- హోల్ మిల్క్ (500 మి.లీ) : గతంలో ఈ అర లీటరు ప్యాకెట్ ఎంఆర్‌పీ రూ. 39 ఉండగా, సవరించిన ధరల ప్రకారం రూ. 40కి పెరిగింది.
అర లీటరుపై రూపాయి పెరగా… లీటర్ పై రూ. 2 పెంపు ఉంటుంది. ఇక ఈ కొత్త ధరల మార్పును సాధారణ వినియోగదారులు, పాల వ్యాపారులు, డిస్ట్రిబ్యూటర్లు, విద్యా సంస్థలు/రైస్ మిల్లులు వంటి అనుబంధ సంస్థలు, మోడరన్ రిటైల్ మాల్స్, క్విక్ కామర్స్ ఆన్‌లైన్ యాప్‌ల యాజమాన్యాలు గమనించాలని జనరల్ మేనేజర్ సూచించారు. పాల సేవలు, వినియోగదారుల సందేహాల నివృత్తి కోసం హెల్ప్‌లైన్ ఫోన్ నంబర్లను 040-27019851-54 సంప్రదించవచ్చని కోరారు.
గ్రామీణ ప్రాంతాల్లో పాడి రైతుల నుంచి పాల సేకరణ వ్యయం పెరగడం, రవాణా ఖర్చులు తీవ్రంగా కావడం మరియు నిర్వహణ వ్యయంలో వస్తున్న హెచ్చుతగ్గుల వల్లే ఈ నిర్ణయం తీసుకోక తప్పలేదని డెయిరీ వర్గాలు స్పష్టం చేశాయి. పాడి పరిశ్రమను లాభసాటిగా నడపడంతో పాటు రైతులకు మద్దతుగా నిలిచేందుకే స్వల్పంగా ధరలను పెంచినట్లు వివరించాయి.