హైదరాబాద్-బెంగళూరు హైవేపై వంతెన పైనుంచి కిందపడ్డ బస్సు, వాహనం.. 20 మందికి గాయాలు!

హైదరాబాద్ నుంచి బెంగళూరు వెళ్తున్న ప్రైవేట్ ట్రావెల్ బస్సును ఐషర్ వాహనం ఢీకొట్టంది. ఈ ఘటనలో కనీసం 20 మంది ప్రయాణికులు తీవ్రంగా గాయపడ్డారు.

హైదరాబాద్-బెంగళూరు జాతీయ రహదారిపై దారుణ రోడ్డు ప్రమాదం చోటుచేసుకుంది. అనంతపురం జిల్లా పామిడి మండలం పొగరు గ్రామం సమీపంలోని వంతెన (కల్వర్టు) వద్ద ప్రైవేటు ట్రావెల్స్ బస్సును ఐషర్ వాహనం వెనుక నుంచి బలంగా ఢీకొట్టింది. ఈ ప్రమాద ధాటికి రెండు వాహనాలు తీవ్రంగా దెబ్బతిని, నియంత్రణ కోల్పోయి వంతెన పైనుంచి కిందకు పడిపోయాయి. ఈ ఘోర ప్రమాదంలో బస్సులోని ప్రయాణికులతో పాటు ఇరు వాహనాల డ్రైవర్లు కలిపి దాదాపు 20 మంది తీవ్రంగా గాయపడ్డారు.

అనంతపురంలో రోడ్డు ప్రమాదం

పోలీసులు, స్థానికులు అందించిన ప్రాథమిక సమాచారం ప్రకారం, ఆదివారం తెల్లవారుజామున హైదరాబాద్ నుంచి బెంగళూరు వైపు వెళ్తున్న ఒక ప్రైవేట్ ట్రావెల్స్ బస్సు పొగరు వంతెనపైకి రాగానే, ఒక ఐషర్ వాహనం దానిని ఢీకొట్టింది. ప్రమాదం జరిగిన సమయంలో బస్సులో మొత్తం 40 మంది ప్రయాణికులు ఉన్నారు. ఢీకొన్న తీవ్రత చాలా ఎక్కువగా ఉండటంతో బస్సు, ఐషర్ వాహనం రెండూ వంతెన రక్షణ గోడను దాటుకుని కిందకు పడిపోయాయి.

అతివేగం, డ్రైవర్ నిద్రమత్తు కారణంగానే ఈ ప్రమాదం జరిగి ఉండవచ్చని పోలీసులు ప్రాథమికంగా అనుమానిస్తున్నారు. హైవేపై వెళ్తున్న ఇతర వాహనదారులు ప్రమాదాన్ని గమనించి వెంటనే స్పందించారు. ప్రమాద తీవ్రతను చూసి వారు వెంటనే స్థానిక పోలీసులకు సమాచారం అందించారు.

సమాచారం అందుకున్న వెంటనే పామిడి పోలీసులు హుటాహుటిన ఘటనా స్థలానికి చేరుకుని సహాయక చర్యలు ప్రారంభించారు. వాహనాల్లో ఇరుక్కుపోయిన డ్రైవర్లను స్థానికుల సహాయంతో పోలీసులు ఎంతో శ్రమించి సురక్షితంగా వెలికితీశారు.

తీవ్రంగా గాయపడిన ప్రయాణికులను మొదట పామిడిలోని ప్రభుత్వ ఆసుపత్రికి తరలించి ప్రాథమిక చికిత్స అందించారు. ఆ తర్వాత మెరుగైన వైద్య చికిత్స కోసం బాధితులను అనంతపురం జిల్లా కేంద్ర ఆసుపత్రికి తరలించారు. ఈ ఘటనపై పోలీసులు కేసు నమోదు చేసుకుని లోతుగా విచారణ జరుపుతున్నారు. దెబ్బతిన్న వాహనాలను జేసీబీ సాయంతో తొలగించి, హైవేపై ట్రాఫిక్‌ను పునరుద్ధరించారు. ప్రమాదానికి సంబంధించిన మరిన్ని వివరాలు తెలియాల్సి ఉంది. బాధితుల కుటుంబ సభ్యులకు సమాచారం అందించినట్లు అధికారులు తెలిపారు. అయితే ఇందులో కొందరి పరిస్థితి విషమంగా ఉన్నట్టుగా సమాచారం.