లేపాక్షి ఉత్పత్తులపై క్యూఆర్ కోడ్ సిస్టమ్.. స్కాన్ చేస్తే పూర్తి సమాచారం

రాష్ట్ర హస్తకళలకు అంతర్జాతీయ గుర్తింపు తీసుకువచ్చేందుకు ఆంధ్రప్రదేశ్ హస్తకళల అభివృద్ధి సంస్థ క్యూఆర్ కోడ్ వ్యవస్థను ప్రారంభించింది. దీంతో హస్తకళలకు సంబంధించిన పూర్తి సమాచారం అందులో దొరుకుతుంది.

ఆంధ్రప్రదేశ్ ప్రాచీన హస్తకళలు, సాంప్రదాయ కళారూపాలకు ప్రపంచస్థాయిలో ప్రాచుర్యం కల్పించేందుకు ఆంధ్రప్రదేశ్ హస్తకళల అభివృద్ధి సంస్థ(లేపాక్షి) ఒక వినూత్న అడుగు వేసింది. రాష్ట్రంలోని విశిష్ట కళాఖండాల సమగ్ర వివరాలను, వాటిని రూపొందించిన హస్తకళాకారుల సమాచారాన్ని ప్రపంచానికి పరిచయం చేసేందుకు గాను నూతనంగా క్యూఆర్ కోడ్ విధానాన్ని అధికారికంగా అందుబాటులోకి తీసుకువచ్చింది.

రాష్ట్ర హస్తకళలపై క్యూఆర్ కోడ్

ఈ నూతన సాంకేతిక విధానం రాష్ట్ర ఉప ముఖ్యమంత్రి, పంచాయతీ రాజ్, గ్రామీణాభివృద్ధి, అటవీ, పర్యావరణ శాఖల మంత్రి పవన్ కళ్యాణ్ ఆలోచన నుండి రూపుదిద్దుకుందని ఎపీ హస్తకళల అభివృద్ధి సంస్థ ఒక ప్రకటనలో తెలిపింది.

వినియోగదారులు లేదా పర్యాటకులు లేపాక్షి షోరూమ్‌లలో కళాఖండాలపై ఉండే క్యూఆర్ కోడ్‌ను తమ స్మార్ట్‌ఫోన్ ద్వారా స్కాన్ చేయగానే ఆ ఉత్పత్తికి సంబంధించిన పూర్తి వివరాలు డిజిటల్ రూపంలో స్క్రీన్‌పై ప్రత్యక్షమవుతాయి. ఆ వస్తువు ప్రాముఖ్యత, దాని తయారీలో ఉపయోగించిన ముడిపదార్థాలు ఉంటాయి. వస్తువును రూపొందించడానికి పట్టిన సమయం, దాని విశిష్టత తెలుస్తుంది.

ఆ కళాఖండాన్ని ప్రాణం పోసి తయారుచేసిన హస్తకళాకారుడి పేరు, వారి నివాస ప్రాంతం, అనుభవం కూడా ఉంటుంది. క్యూఆర్ కోడ్ విధానంలో ప్రముఖ కళాకారుడు బోనుమద్ది మురళి అత్యంత నైపుణ్యంతో చెక్కిన బొబ్బిలి వీణ వివరాలు. ప్రముఖ హస్తకళాకారుడు సి. సుబ్రమణ్యం రూపుదిద్దిన మహాభారతం, కృష్ణలీలలు, సంపూర్ణ రామాయణం వంటి పౌరాణిక ఘట్టాల ఆధారిత కలంకారీ చిత్రాల సమాచారం ఉంటుంది.

ఈ క్యూఆర్ కోడ్ విధానం వల్ల ఆంధ్రప్రదేశ్ హస్తకళలకు అంతర్జాతీయ స్థాయిలో నమ్మకం పెరగడమే కాకుండా పలు కీలక ప్రయోజనాలు కలగనున్నాయి. మార్కెట్‌లో లభించే నకిలీ కళాఖండాల నుండి వినియోగదారులకు రక్షణ లభిస్తుంది. లేపాక్షి ద్వారా విక్రయించే ఉత్పత్తులు అసలైన చేతివృత్తుల వారివేనని ధృవీకరించబడుతుంది. తెరవెనుక ఉండి అద్భుతమైన కళాఖండాలను సృష్టించే గ్రామీణ చేతివృత్తుల కళాకారుల శ్రమకు తగిన గుర్తింపు, ఆదరణ లభిస్తాయి.

విదేశీ పర్యాటకులు, కొనుగోలుదారులు కళాఖండం చారిత్రక ప్రాధాన్యతను క్యూఆర్ కోడ్ ద్వారా సులభంగా తెలుసుకుని కొనుగోలు చేయడానికి ఆసక్తి చూపుతారు. కొండపల్లి బొమ్మలు, ఏటికొప్పాక లక్క బొమ్మలు, ఉదయగిరి చెక్క వస్తువులు, మచిలీపట్నం కలంకారీ వంటి రాష్ట్రంలోని ఇతర ప్రసిద్ధ ఉత్పత్తులకు కూడా ఈ సాంకేతికతను విస్తరించి, డిజిటల్ మార్కెటింగ్ ద్వారా అంతర్జాతీయ స్థాయికి తీసుకెళ్లడమే లక్ష్యంగా ప్రభుత్వం అడుగులు వేస్తోంది.