AP Local Body Elections Schedule : 23 పట్టణ స్థానిక సంస్థలు, పంచాయతీ ఎన్నికల షెడ్యూల్ విడుదల

AP Local Body Elections Schedule : ఆంధ్రప్రదేశ్‌లో పెండింగ్‌లో ఉన్న 23 పట్టణ స్థానిక సంస్థలు, 3 విడతల గ్రామ పంచాయతీ ఎన్నికలకు ఎస్ఈసీ అనీల్ చంద్ర పునేఠా షెడ్యూల్ విడుదల చేశారు. నవంబర్ 26న పోలింగ్, 30న కౌంటింగ్ జరగనుంది.

ఆంధ్రప్రదేశ్ రాష్ట్రంలో స్థానిక సంస్థల ఎన్నికల సందడి మొదలైంది. పెండింగ్‌లో ఉన్న 23 పట్టణ స్థానిక సంస్థల ఎన్నికలతో పాటు గ్రామ పంచాయతీ, పట్టణ స్థానిక సంస్థలకు రాష్ట్ర ఎన్నికల సంఘం నోటిఫికేషన్ విడుదల చేసింది. విజయవాడలోని కార్యాలయంలో రాష్ట్ర ఎన్నికల కమిషనర్ అనీల్ చంద్ర పునేఠా ఈ ఎన్నికలకు సంబంధించిన పూర్తిస్థాయి షెడ్యూల్‌ను అధికారికంగా ప్రకటించారు.ఈ నెల 26వ తేదీన తొలి విడత గ్రామ పంచాయతీ ఎన్నికలతో పాటే 23 పట్టణ స్థానిక సంస్థలకు కూడా పోలింగ్ నిర్వహించనున్నారు.

ఆంధ్రప్రదేశ్ రాష్ట్ర ఎన్నికల కమిషనర్ అనిల్ చంద్ర పునేఠా

ఎన్నికల షెడ్యూల్ విడుదల కావడంతో రాష్ట్రవ్యాప్తంగా ఎన్నికల ప్రవర్తనా నియమావళి అమల్లోకి వచ్చింది. దీంతో గ్రామీణ, పట్టణ ప్రాంతాల్లో రాజకీయ వాతావరణం వేడెక్కింది.

నవంబర్ 13న గ్రామ పంచాయతీ ఎన్నికల మొదటి విడత నోటిఫికేషన్, నవంబర్ 16న రెండో విడత, నవంబర్ 19న మూడో విడత పంచాయతీ నోటిఫికేషన్ ఎన్నికల నోటిఫికేషన్ వెలువడుతుంది. నవంబర్ 19న ఎంపీపీ, నవంబర్ 20న జెడ్పీపీ ఎన్నికల నిర్వహణకు ఏర్పాట్లు చేశారు.

తొలి విడత పంచాయతీ ఓట్ల లెక్కింపును నవంబర్ 26నే చేపడతారు. రెండో విడత పంచాయతీ ఎన్నికల ఫలితాల నవంబర్ 29న వెల్లడిస్తారు. డిసెంబర్ 2న మూడో విడత పంచాయతీ ఓట్ల లెక్కింపు చేస్తారు. నవంబర్ 30న పట్టణ స్థానిక సంస్థల కౌంటింగ్ జరగనుంది. ఇక డిసెంబర్ 3న పట్టణ స్థానిక సంస్థలకు పరోక్ష ఎన్నికల (మేయర్/ఛైర్‌పర్సన్) నిర్వహస్తారు.

సాంకేతిక, న్యాయపరమైన కారణాలతో గతంలో నిలిచిపోయిన 23 మున్సిపాలిటీలు, నగర పంచాయతీల్లో రాజకీయం వేడెక్కింది. నవంబర్ 26న పోలింగ్ ముగిసిన తర్వాత, 30న ఓట్లను లెక్కిస్తారు. అనంతరం డిసెంబర్ 3న ఆయా సంస్థలకు మేయర్, ఛైర్‌పర్సన్లు, వైస్ ఛైర్‌పర్సన్ల ఎంపిక కోసం పరోక్ష ఎన్నికలు నిర్వహిస్తారు. పంచాయతీ ఎన్నికలను సజావుగా నిర్వహించేందుకు ఎన్నికల సంఘం మూడు విడతలను ఎంచుకుంది. నవంబర్ 13న తొలి విడత నోటిఫికేషన్‌తో నామినేషన్ల పర్వం ప్రారంభం కానుంది.

శ్రీకాకుళం, కాకినాడ, రాజమహేంద్రవరం (రాజమండ్రి), మంగళగిరి - తాడేపల్లి మున్సిపల్ కార్పొరేషన్లలో ఎన్నికలు జరగనున్నాయి. ఆముదాలవలస, రాజాం, పాలకొల్లు, భీమవరం, తాడేపల్లిగూడెం, తణుకు, చింతలపూడి, గుడివాడ, తాడిగడప, పొన్నూరు, నర్సరావుపేట, బాపట్ల, కందుకూరు, పొదిలి, కావలి, గూడూరు, అల్లూరు, శ్రీకాళహస్తి, బి.కొత్తకోటలో ఎన్నికలు నిర్వహిస్తారు.