E-Paper
వీరికి రూ.2 లక్షల నగదు బహుమతి.. దరఖాస్తులు ఎలా చేయాలి?
జర్నలిస్టులకు ఏపీ ప్రభుత్వం ఒక వార్త తీసుకొచ్చింది. బెస్ట్ జర్నలిస్టులను ఎంపికం చేసి సత్కరించనుంది. మెుత్తం 12 విభాగాల్లో ఎంపికలు ఉంటాయి.
Prefer HTon Google
పాత్రికేయ రంగానికి అందించిన సేవలను, ప్రతిభను గుర్తించేందుకు ఆంధ్రప్రదేశ్ ప్రభుత్వం 2025 ఉత్తమ పాత్రికేయ పురస్కారాల కోసం దరఖాస్తులను ఆహ్వానించింది. ఈ పురస్కారాలు 12 విభాగాలలో అందిస్తారు. వీటిలో రూ.1 లక్ష నుండి రూ.2 లక్షల వరకు నగదు బహుమతులు ఉంటాయి.
అర్హులైన పాత్రికేయులు సెప్టెంబర్ 28వ తేదీ సాయంత్రం 5 గంటలలోపు, డైరెక్టర్, సమాచార, పౌర సంబంధాల శాఖ, రెండో అంతస్తు, ఎన్టీఆర్ పరిపాలనా భవనం, పండిట్ నెహ్రూ బస్ స్టేషన్, విజయవాడ-520013 చిరునామాకు దరఖాస్తులను సమర్పించాలని సమాచార, పౌర సంబంధాల శాఖ డైరెక్టర్ కె.ఎస్. విశ్వనాథన్ ఒక పత్రికా ప్రకటనలో తెలిపారు.
కాశీనాధుని నాగేశ్వరరావు పంతులు ఉత్తమ పాత్రికేయ పురస్కారంలో రూ.2 లక్షల నగదు బహుమతి ఉంటుంది. ఆంధ్రప్రదేశ్ నుండి ప్రచురితమయ్యే తెలుగు లేదా ఆంగ్ల వార్తాపత్రికలు లేదా పత్రికలలో పనిచేస్తున్న, కనీసం 10 సంవత్సరాల అనుభవం ఉన్న పూర్తికాల పాత్రికేయులు ఈ పురస్కారానికి అర్హులు.
ఖాసా సుబ్బారావు, ముట్నూరి కృష్ణారావు, మద్దూరి చంద్రశేఖర్ రావుల పేరిట ఉన్న మూడు ఉత్తమ గ్రామీణ జర్నలిస్ట్ అవార్డులకు ఒక్కొక్కదానికి రూ.1 లక్ష నగదు బహుమతి ఉంటుంది. సావిత్రిబాయి ఫూలే ఉత్తమ మహిళా జర్నలిస్ట్, ఉత్తమ కార్టూనిస్ట్, అబుల్ కలాం ఆజాద్ ఉత్తమ ఉర్దూ జర్నలిస్ట్, ఉత్తమ ఎలక్ట్రానిక్ మీడియా జర్నలిస్ట్, ఉత్తమ వీడియో జర్నలిస్ట్ అవార్డులకు ఒక్కొక్కదానికి రూ.1 లక్ష నగదు బహుమతి ఉంటుంది.
వి.ఆర్.నార్ల జీవిత సాఫల్య పురస్కారం, కొక్కు అహోబలరావు ఉత్తమ ఫోటో జర్నలిస్ట్, మద్దూరి అన్నపూర్ణయ్య అవార్డులను దరఖాస్తులు లేకుండా కమిటీ ఎంపిక చేస్తుంది. దరఖాస్తుదారులు తమ వివరాలతో పాటు 2025లో ప్రచురించిన లేదా ప్రసారం చేసిన కనీసం ఐదు రచనలను సమర్పించాలి. కమిటీ నిర్ణయాలే అంతిమం అని గుర్తుంచుకోవాలి.
