APPSC Forest Recruitment : ఆంధ్రప్రదేశ్ అటవీ శాఖలో థానేదార్ ఉద్యోగాల భర్తీ ప్రక్రియకి సంబంధించి మరో అప్డేట్ వచ్చేసింది. రాత పరీక్షలో అర్హత సాధించిన అభ్యర్థులకు నవంబర్ 30వ తేదీన నడక పరీక్ష (వాకింగ్ టెస్ట్), వైద్య పరీక్షలు నిర్వహించనున్నట్లు ఆంధ్రప్రదేశ్ పబ్లిక్ సర్వీస్ కమిషన్ (APPSC) అధికారికంగా ప్రకటించింది. ఈ మేరకు పరీక్షా కేంద్రాల వివరాలను కమిషన్ వెల్లడించింది.
పరీక్షా కేంద్రాలు ఇవే

అభ్యర్థులకు రాజమహేంద్రవరం కేంద్రంగా ఈ ఎంపిక ప్రక్రియ జరగనుంది. రాజమహేంద్రవరంలోని రాష్ట్ర అటవీ అకాడమీతో పాటు మహా పుష్కర వనంలో నడక పరీక్షను నిర్వహిస్తారు. అనంతరం అభ్యర్థులకు రాజమహేంద్రవరంలోని ప్రభుత్వ జనరల్ ఆసుపత్రిలో (GGH) వైద్య పరీక్షలు పూర్తి చేస్తారు.
నడక పరీక్ష, వైద్య పరీక్షల్లో విజయవంతంగా అర్హత సాధించిన అభ్యర్థులను తదుపరి దశకు ఎంపిక చేస్తారు. వీరు తప్పనిసరిగా ధ్రువపత్రాల పరిశీలనకు (సర్టిఫికెట్ వెరిఫికేషన్) హాజరు కావాల్సి ఉంటుందని ఏపీపీఎస్సీ స్పష్టం చేసింది. అభ్యర్థులు తమ హాల్ టికెట్లు, అవసరమైన ఒరిజినల్ సర్టిఫికెట్లతో సకాలంలో పరీక్షా కేంద్రాలకు చేరుకోవాలని అధికారులు సూచించారు.
సెప్టెంబర్ 9, 2025 నాటి నోటిఫికేషన్ నంబర్ 13/2025 ద్వారా చేపట్టిన థానేదార్ నియామక ప్రక్రియకు సంబంధించి ఇప్పటికే రాత పరీక్ష ఫలితాలను ప్రకటించారు. తదుపరి దశకు తాత్కాలికంగా ఎంపికైన అభ్యర్థుల జాబితాను అధికారిక వెబ్సైట్ https://psc.ap.gov.in లో అందుబాటులో ఉంచారు. వీరంతా కూడా నడక టెస్టుకు హాజరయ్యే అవకాశం ఉంటుంది.