E-Paper
కార్తీక మాసం.. మిడిల్ క్లాస్ బడ్జెట్‌లో పంచారామాలు, శబరిమలకు ఏపీఎస్ఆర్టీసీ ప్రత్యేక బస్సులు
APSRTC Karthika Masam special buses : కార్తీక మాసం సందర్భంగా ఏపీఎస్ఆర్టీసీ ప్రత్యేక బస్సు సర్వీసులను నడపనుంది. ఆధ్యాత్మిక క్షేత్రాలకు మిడిల్ క్లాస్ బడ్జెట్‌ ధరలో ప్యాకేజీలను అందిస్తోంది.
Prefer HTon Google
కార్తీక మాస మహోత్సవాలు, శబరిమల అయ్యప్ప స్వామి మండల పూజల కాలం ప్రారంభమవుతున్న నేపథ్యంలో భక్తుల సౌకర్యార్థం ఏపీఎస్ఆర్టీసీ ప్రత్యేక ప్యాకేజీ బస్సు సర్వీసులను అందుబాటులోకి తెచ్చింది. ఏలూరు జిల్లా నుంచి శబరిమలతో పాటు ప్రసిద్ధ పంచారామ క్షేత్ర దర్శనాల కోసం ఈ ప్రత్యేక బస్సులను నడుపుతున్నట్లు ఏలూరు జిల్లా డిస్ట్రిక్ట్ పబ్లిక్ ట్రాన్స్‌పోర్ట్ ఆఫీసర్ ఎస్.కె. షబ్నం వెల్లడించారు.
భక్తులు ఎలాంటి ఇబ్బందులు లేకుండా సురక్షితంగా, సునాయాసంగా తమ ఆధ్యాత్మిక యాత్రను పూర్తి చేసుకునేలా ఆర్టీసీ యాజమాన్యం ప్రత్యేక ఏర్పాట్లు చేసిందని అధికారులు తెలిపారు. శబరిమల వెళ్లే అయ్యప్ప భక్తుల కోసం రోజుల వ్యవధిని బట్టి మూడు రకాల ప్యాకేజీలను ఆర్టీసీ నిర్ణయించింది.
4 రోజుల శబరిమల ప్యాకేజీ: రూ. 5,200
6 రోజుల శబరిమల ప్యాకేజీ: రూ. 6,000
10 రోజుల శబరిమల ప్యాకేజీ: రూ. 9,000
ఇక కార్తీక మాసంలో ఎంతో విశిష్టమైన పంచారామ క్షేత్రాల దర్శనం కోసం వెళ్లే భక్తులకు బస్సు రకాన్ని బట్టి ఛార్జీలను ఖరారు చేశారు.
అల్ట్రా డీలక్స్ బస్సు: రూ. 1,100
సూపర్ లగ్జరీ బస్సు: రూ. 1,200
పంచారామ క్షేత్రాల ప్రత్యేక బస్సులు ప్రతి ఆదివారం రాత్రి 8 గంటలకు ప్రారంభమై, మరుసటి రోజు అంటే సోమవారం సాయంత్రానికి తిరిగి ఏలూరు చేరుకునేలా టైమ్ షెడ్యూల్ రూపొందించారు. ఈ ప్రత్యేక సర్వీసులు ఏలూరు జిల్లాలోని ఏలూరు డిపోతో పాటు నూజివీడు, జంగారెడ్డిగూడెం డిపోల నుంచి భక్తులకు అందుబాటులో ఉంటాయని అధికారులు తెలిపారు.
పవిత్రమైన కార్తీక మాసంలోనూ, శబరిమల యాత్రలోనూ ప్రయాణికులు సొంత వాహనాల కన్నా ఆర్టీసీ సురక్షిత సర్వీసులను వినియోగించుకోవాలని అధికారులు కోరారు. సీట్ల బుకింగ్ కోసం సమీపంలోని ఆర్టీసీ డిపోలను గానీ లేదా అధికారిక వెబ్‌సైట్‌ను గానీ సంప్రదించవచ్చని సూచించారు.
