ఆంధ్ర విశ్వవిద్యాలయం డిస్టెన్స్ పరీక్షలు వాయిదా.. నూతన తేదీల ప్రకటన!

ఆంధ్ర విశ్వవిద్యాలయం డిస్టెన్స్ పరీక్షలు వాయిదా వేశారు. జులై 24న బంద్ కారణంగా కొత్త తేదీలను ఏయూ ప్రకటించింది. అవేంటో చూడండి.

జులై 24 రాష్ట్రవ్యాప్త బంద్ పిలుపు నేపథ్యంలో ఆంధ్ర విశ్వవిద్యాలయం(AU) కీలక నిర్ణయం తీసుకుంది. సెంటర్ ఫర్ డిస్టెన్స్ అండ్ ఆన్‌లైన్ ఎడ్యుకేషన్ (CDOE) ద్వారా నిర్వహించాల్సిన పలు దూరవిద్య పరీక్షలను వాయిదా వేస్తున్నట్లు ప్రకటించింది. ఈ మేరకు విశ్వవిద్యాలయ వర్గాలు అధికారిక సమాచారాన్ని విడుదల చేశాయి.

ఆంధ్ర యూనివర్సిటీ డిస్టెన్స్ ఎడ్యుకేషన్

జులై 24 (శుక్రవారం) నాడు జరగాల్సిన అన్ని దూరవిద్య పరీక్షలను వాయిదా వేస్తున్నట్లు దూరవిద్య కేంద్రం (CDOE) డైరెక్టర్ ఒక ప్రకటనలో స్పష్టం చేశారు. జులై 24 (శుక్రవారం) నుంచి జరగాల్సిన పరీక్షలు.. పునఃప్రారంభమయ్యే సవరించిన తేదీ ఆగస్టు 4 (మంగళవారం)గా ఉంది.

మిగిలిన పరీక్షలు మాత్రం ముందస్తు షెడ్యూల్ ప్రకారమే ఎలాంటి మార్పులు లేకుండా యథాతథంగా కొనసాగుతాయి. విద్యార్థులు మార్చిన తేదీలను గమనించి, దానికి అనుగుణంగా ప్రయాణ, పరీక్షల ఏర్పాట్లు చేసుకోవాలని విశ్వవిద్యాలయ అధికారులు సూచించారు. ఏదైనా సందేహాలు ఉంటే ఏయూ అధికారిక వెబ్‌సైట్ లేదా సంబంధిత నోటీస్ బోర్డులను నిరంతరం తనిఖీ చేయాలని దూరవిద్య కేంద్రం డైరెక్టర్ కోరారు.

రాష్ట్రవ్యాప్తంగా విద్యాసంస్థల బంద్ వాతావరణం నెలకొనడంతో ఒక్క ఆంధ్ర విశ్వవిద్యాలయమే కాకుండా రాయలసీమ, కోస్తాంధ్ర ప్రాంతాల్లోని ఇతర ప్రధాన విశ్వవిద్యాలయాలు కూడా ముందస్తు జాగ్రత్త చర్యలు చేపట్టాయి.

బంద్ కారణంగా రవాణా వ్యవస్థకు ఆటంకం కలగకుండా ఉండేందుకు జులై 24న జరగాల్సిన పలు డిగ్రీ, పీజీ సెమిస్టర్ పరీక్షలను వాయిదా వేసి, వాటికి సంబంధించిన సవరించిన షెడ్యూల్‌ను త్వరలోనే విడుదల చేస్తామని శ్రీ వేంకటేశ్వర విశ్వవిద్యాలయం (తిరుపతి) తెలిపింది. ఆచార్య నాగార్జున విశ్వవిద్యాలయం, యోగి వేమన విశ్వవిద్యాలయం, ప్రైవేట్, ప్రభుత్వ రవాణా సేవలు నిలిచిపోయే అవకాశం ఉండటంతో విద్యార్థుల ఇబ్బందులను పరిగణనలోకి తీసుకుని ఆ రోజు నాటి పరీక్షలను తాత్కాలికంగా వాయిదా వేస్తున్నట్లు ప్రకటించాయి.

శాంతిభద్రతలు, రవాణా సౌకర్యాల దృష్ట్యా విద్యార్థులు ఇబ్బంది పడకూడదనే ఉద్దేశంతోనే ఈ నిర్ణయాలు తీసుకున్నట్లు వర్సిటీల రిజిస్ట్రార్లు వెల్లడించారు. పరీక్ష రాసే విద్యార్థులందరూ తదుపరి తాజా సమాచారం, సవరించిన టైమ్ టేబుల్స్ కోసం కేవలం విశ్వవిద్యాలయాల అధికారిక వెబ్‌సైట్లను మాత్రమే ప్రామాణికంగా తీసుకోవాలని అధికారులు స్పష్టం చేశారు. సామాజిక మాధ్యమాల్లో వచ్చే పుకార్లను నమ్మవద్దని విజ్ఞప్తి చేశారు.