ఆంధ్రప్రదేశ్ మున్సిపల్ ఎన్నికల్లో బిగ్ ట్విస్ట్.. 19 పురపాలికల్లో ఎన్నికలు పెండింగ్

ఆంధ్రప్రదేశ్ స్థానిక సంస్థల ఎన్నికల్లో కీలక పరిణామం చోటుచేసుకుంది. 19 పురపాలికల్లో కలెక్టర్లు, ఎస్పీల నుంచి నివేదిక తెప్పించుకుని దాని ఆధారంగా ఎన్నికలపై నిర్ణయం తీసుకోనుంది రాష్ట్ర ఎన్నికల సంఘం.

ఆంధ్రప్రదేశ్‌లో స్థానిక సంస్థల ఎన్నికల నడుమ అత్యంత కీలకమైన పరిణామం చోటుచేసుకుంది. రాష్ట్రంలో 19 పురపాలికలు మినహాయించి, మిగిలిన అన్ని కార్పొరేషన్లు, మున్సిపాలిటీలు, ఎంపీటీసీ, జడ్పీటీసీ స్థానాల్లో ఎన్నికల ప్రక్రియను యథావిధిగా కొనసాగించాలని రాష్ట్ర ఎన్నికల సంఘం సంచలన నిర్ణయం తీసుకుంది.

19 మున్సిపాలిటీల్లో ఎన్నికలు పెండింగ్

ఈ మేరకు ఎన్నికల నిర్వహణపై రాష్ట్ర ఎన్నికల కమిషనర్ అనిల్ చంద్ర పునేఠా వివిధ జిల్లాల కలెక్టర్లు, ఎస్పీలు, ఎన్నికల అధికారులతో అత్యవసర వీడియో కాన్ఫరెన్స్ నిర్వహించి కీలక మార్గదర్శకాలు జారీ చేశారు.

రాష్ట్రంలోని పల్నాడు, రాయలసీమ జిల్లాల్లోని కొన్ని ప్రాంతాల్లో నామినేషన్ల ఘట్టం రణరంగాన్ని తలపించడం, ఘర్షణలు చోటుచేసుకోవడంతో 19 స్థానిక సంస్థల ఎన్నికలపై అనిశ్చితి నెలకొంది. ఈ 19 పురపాలికలకు సంబంధించి జిల్లా కలెక్టర్లు, సూపరింటెండెంట్ ఆఫ్ పోలీస్ ఇచ్చే సమగ్ర క్షేత్రస్థాయి నివేదికల ఆధారంగానే తదుపరి నిర్ణయం తీసుకోనున్నట్లు ఎస్‌ఈసీ స్పష్టం చేసింది.

నిర్ణయం పెండింగ్‌లో ఉన్న 19 పురపాలికలు ఇవే

తిరుపతి, కడప, పులివెందుల, రాజంపేట, ప్రొద్దుటూరు, రాయచోటి, బద్వేల్‌, జమ్మలమడుగు, మైదుకూరు, కమలాపురం, ఎర్రగుంట్ల, పుంగనూరు, పిడుగురాళ్ల, గురజాల, దాచేపల్లి, కనిగిరి, దర్శి, గుత్తి, తాడిపత్రిలోని పరిస్థితులపై ఎస్ఈసీ నివేదిక తెప్పించుకుని నిర్ణయం తీసుకుంటుంది.

ఈ జిల్లాల పరిధిలోని కలెక్టర్లు, పోలీసు అధికారుల నుంచి తుది నివేదికలు వచ్చిన తర్వాతే ఈ ప్రాంతాల్లో పోలింగ్ సజావుగా సాగేందుకు అనుకూలమైన పరిస్థితులు ఉన్నాయో లేదో సమీక్షించి నిర్ణయిస్తారు. పోటీ చేసే అభ్యర్థులపై దాడులు, బెదిరింపులు జరుగుతున్నాయనే ఫిర్యాదులపై రాష్ట్ర ఎన్నికల కమిషనర్ అనిల్ చంద్ర పునేఠా తీవ్రంగా స్పందించారు. శాంతిభద్రతల పరిరక్షణ విషయంలో రాజీపడేది లేదని అధికారులకు చెప్పారు.

ఎంపీటీసీ, జడ్పీటీసీ, మున్సిపల్ అభ్యర్థులు స్వేచ్ఛగా, ప్రశాంతమైన వాతావరణంలో నామినేషన్లు వేసేలా చర్యలు తీసుకోవాలన్నారు. సమస్యాత్మక ప్రాంతాల్లో పోటీ చేసే అభ్యర్థులకు, ముఖ్యంగా ప్రతిపక్ష, స్వతంత్ర అభ్యర్థులకు తగిన రక్షణ కల్పించాలని పోలీసు రంగానికి స్పష్టమైన ఆదేశాలు ఇచ్చారు. ఎన్నికల ప్రక్రియ అంతా అత్యంత పారదర్శకంగా, శాంతియుతంగా పూర్తయ్యేలా కలెక్టర్లు, ఎస్పీలు నిరంతరం పర్యవేక్షణ చేయాలని స్పష్టం చేశారు.

ఏపీ స్థానిక పోరులో నామినేషన్ల నాటి నుంచి వాతావరణం వేడెక్కిన నేపథ్యంలో ఎస్‌ఈసీ తీసుకున్న ఈ నిర్ణయం రాష్ట్ర రాజకీయాల్లో సంచలనంగా మారింది. 19 పురపాలికలపై కలెక్టర్లు ఎలాంటి నివేదికలు ఇవ్వబోతున్నారనే దానిపై సర్వత్రా ఉత్కంఠ నెలకొంది.