E-Paper
AP Municipal Election Results 2026 : మున్సిపల్ ఎన్నికల ఫలితాలు - మెజార్టీ స్థానాల్లో కూటమి అభ్యర్థుల హవా..!
ఆంధ్రప్రదేశ్ మున్సిపల్ ఎన్నికల ఓట్ల లెక్కింపులో ఎన్డీయే కూటమి అభ్యర్థులు ఆధిక్యంలో ఉన్నారు. కుప్పం సీటును టీడీపై కైవసం చేసుకుంది.
Prefer HTon Google
ఆంధ్రప్రదేశ్ వ్యాప్తంగా ఉత్కంఠ రేపిన మున్సిపల్ ఎన్నికల ఓట్ల లెక్కింపు ప్రక్రియ అత్యంత వేగంగా కొనసాగుతోంది. ఉదయం కౌంటింగ్ ప్రారంభం కాగానే అధికారులు మొదట పోస్టల్ బ్యాలెట్ ఓట్లను లెక్కించారు. ఆ తర్వాత వార్డులు, డివిజన్ల వారీగా సాధారణ ఓట్ల లెక్కింపును చేపట్టారు. ఓటింగ్ ప్రారంభమైన తొలి గంట నుంచే రాష్ట్రవ్యాప్తంగా అధికార ఎన్డీయే కూటమి (తెలుగుదేశం, జనసేన, భారతీయ జనతా పార్టీ) అభ్యర్థులు స్పష్టమైన ఆధిక్యాన్ని ప్రదర్శిస్తూ విజయపథంలో దూసుకుపోతున్నారు.
కార్పొరేషన్లలో మెజార్టీ దిశగా కూటమి మేయర్ అభ్యర్థులు
రాష్ట్రంలోని కీలక నగర పాలక సంస్థల (కార్పొరేషన్లు) ఫలితాల్లో కూటమి మేయర్ అభ్యర్థులు తమ ప్రత్యర్థులపై భారీ ఆధిక్యంలో కొనసాగుతున్నారు. విశాఖపట్నం కార్పొరేషన్‌లో కూటమి మేయర్ అభ్యర్థి ముక్కా శ్రావణి విజయం వైపు అడుగులు వేస్తున్నారు. గుంటూరులో కోవెలమూడి లక్ష్మీ అపర్ణ, విజయనగరంలో అవనాపు భార్గవి, చిత్తూరులో కఠారి హేమలత, కర్నూలులో విజయ ప్రత్యూష తమ సమీప ప్రత్యర్థులపై స్పష్టమైన లీడ్‌ సాధించారు.
కేవలం కార్పొరేషన్లకే పరిమితం కాకుండా రాష్ట్ర వ్యాప్తంగా ఉన్న మెజారిటీ మున్సిపాలిటీల్లోనూ ఎన్డీయే కూటమి జెండా ఎగురుతోంది. పలు నియోజకవర్గాల్లో ప్రత్యర్థి వైఎస్సార్‌సీపీ అభ్యర్థులకు ఏమాత్రం అవకాశం ఇవ్వకుండా కూటమి శ్రేణులు ఆధిక్యాన్ని కనబరుస్తున్నాయి.
మరోవైపు కూటమి భాగస్వామ్య పక్షమైన జనసేన పార్టీ అమలాపురం, మడకశిర, నరసాపురం, తిరువూరు, గొల్లప్రోలు, సామర్లకోట మున్సిపాలిటీలలో లీడ్‌లో ఉంది. అదేవిధంగా భారతీయ జనతా పార్టీ (భాజపా) గిద్దలూరు, ఎలమంచిలి మున్సిపాలిటీల్లో తన ఆధిక్యాన్ని ప్రదర్శిస్తూ విజయం దిశగా పయనిస్తోంది. కౌంటింగ్ కేంద్రాల వెలుపల కూటమి నాయకులు, కార్యకర్తలు ఇప్పటికే సంబరాలు ప్రారంభించారు.
టీడీపీ ఖాతాలోకి కుప్పం…
ఉదయం 8 గంటలకే కౌంటింగ్ ప్రారంభం కాగా…. తొలుత పోస్టల్ బ్యాలెట్ ఓట్లు లెక్కించారు. ఇప్పటి వరకు వెల్లడైన ఫలితాల ప్రకారం.. మెజార్టీ చోట్లా కూటమి ఆధిక్యంలో కొనసాగుతోంది. మరోవైపు కుప్పం మున్సిపాలిటీని తెలుగుదేశం పార్టీ కైవసం చేసుకుంది. సూళ్లూరుపేట మున్సిపాలిటీతో పాటు వెంకటగిరి, గుత్తి, పెనుకొండ మున్సిపాలిటీలు కూడా కూటమి కైవసం చేసుకుంది. పుంగనూరు మున్సిపాలిటీపై టీడీపీ జెండా ఎగిరింది.
