E-Paper
ఏపీలో ‘సర్’ గడువు పొడిగింపు - అక్టోబర్ 9న తుది ఓటర్ల జాబితా విడుదల
Special Intensive Revision AP : ఆంధ్రప్రదేశ్ ఓటర్ల జాబితా ప్రత్యేక సమగ్ర సవరణ గడువును ఈ నెల 10 వరకు కేంద్ర ఎన్నికల సంఘం పొడిగించింది. ఈ మేరకు కొత్త షెడ్యూల్ ఖరారైంది.
Prefer HTon Google
Special Intensive Revision AP : ఓటర్ల జాబితా ప్రత్యేక సమగ్ర సవరణ (సర్)లో భాగంగా క్లెయిమ్లు, అభ్యంతరాల స్వీకరణ గడువును ఈ నెల 10 వరకు ఈసీ పొడిగించింది. ముందుగా ప్రకటించిన షెడ్యూల్ మేరకు ఈ గడువు ఆగస్టు 30తో ముగిసింది. మరికొంత సమయం ఇవ్వాలంటూ వచ్చిన విజ్ఞప్తులను పరిగణనలోకి తీసుకున్న ఈసీ… ఈ మేరకు నిర్ణయం తీసుకుంది.
అర్హులైన ఓటర్లెవరూ జాబితా నుంచి తొలగిపోకుండా, తిరిగి తమ పేర్లను నమోదు చేసుకోవడానికి ఈ 11 రోజుల అదనపు సమయాన్ని కేటాయించింది. ఈ విషయాన్ని రాష్ట్ర ప్రధాన ఎన్నికల అధికారి (సీఈఓ) వివేక్ యాదవ్ మంగళవారం (సెప్టెంబరు 1) ఓ ప్రకటన ద్వారా పేర్కొన్నారు.
తొలుత ప్రకటించిన షెడ్యూల్ ప్రకారం…… జూలై 31న ప్రారంభమైన ఈ క్లెయిమ్లు, అభ్యంతరాల స్వీకరణ గడువు ఆగస్టు 30తో ముగియాల్సి ఉంది. అయితే క్షేత్రస్థాయి పరిశీలనలో పలువురు అర్హులైన పౌరులకు ఇంకా సమయం అవసరమని గుర్తించారు. వివిధ రాజకీయ పక్షాల ప్రతినిధులు, జిల్లాల కలెక్టర్లు (జిల్లా ఎన్నికల అధికారులు) నుంచి వచ్చిన అభ్యర్థనలను సీఈఓ వివేక్ యాదవ్ కేంద్ర ఎన్నికల సంఘం దృష్టికి తీసుకెళ్లారు. ఈ వినతులపై సానుకూలంగా స్పందించిన కేంద్రం ఎన్నికల సంఘం…. సవరించిన షెడ్యూల్కు ఆమోదం తెలిపింది.
"2026 జూలై 1 నాటికి అర్హత కలిగిన పౌరులందరినీ పరిగణనలోకి తీసుకుంటూ, రాష్ట్రంలోని అన్ని శాసనసభ నియోజకవర్గాల్లో క్లెయిమ్లు మరియు అభ్యంతరాల స్వీకరణ సమయాన్ని సెప్టెంబరు 10వ తేదీ వరకు పొడిగించాం" అని సీఈఓ వివేక్ యాదవ్ పేర్కొన్నారు.
- నోటీసుల జారీ, క్లెయిమ్లు మరియు అభ్యంతరాల పరిష్కార గడువును అక్టోబరు 5 వరకు పొడిగించారు.
- అక్టోబరు 9న తుది ఓటర్ల జాబితాను అధికారికంగా విడుదల చేస్తారు.
ఓటర్లు ఏం చేయాలి…?
ముసాయిదా ఓటర్ల జాబితాలో పేర్లు లేనివారు, వివరాల్లో తప్పులు ఉన్నవారు లేదా కొత్తగా ఓటు హక్కు పొందాలనుకునే వారు ఈ పొడిగించిన సమయాన్ని సద్వినియోగం చేసుకోవాలని అధికారులు సూచించారు.
- ఫారం-6 : జాబితా నుంచి తొలగించిన నిజమైన ఓటర్లు లేదా కొత్తగా ఓటు పొందాలనుకునేవారు తగిన డిక్లరేషన్ ఫారంతో పాటు ఫారం-6 సమర్పించి పేరు చేర్పించుకోవచ్చు.
- ఫారం-7 - 8: వివరాల సవరణకు ఫారం-8, అనర్హుల పేర్ల తొలగింపునకు ఫారం-7 ద్వారా దరఖాస్తు చేసుకోవచ్చు.
