E-Paper
విశాఖపట్నం-కిరండూల్ రైలుకు అదనపు విస్టాడోమ్ కోచ్.. అరకు అందాలను చూస్తూ ప్రయాణం
Araku Train : అరకు రైలులో విస్టాడోమ్ కోచ్‌ను జతచేస్తున్నట్టుగా రైల్వే అధికారులు ప్రకటించారు. ప్రయాణికులు ప్రకృతిని ఆస్వాదిస్తూ.. వెళ్లవచ్చు.
Prefer HTon Google
సెలవుల కారణంగా తూర్పు కనుమల వైపు ప్రయాణించేవారి సంఖ్య కూడా ఎక్కువగా ఉంటుంది. దీంతో రైల్వే శాఖ కీలక నిర్ణయం తీసుకుంది. అరకు రైలుగా ప్రసిద్ధి చెందిన రైలు నెం. 58501 విశాఖపట్నం-కిరండూల్ ప్యాసింజర్‌కు తాత్కాలికంగా ఒక అదనపు విస్టాడోమ్ కోచ్‌ను జతచేస్తున్నట్లు దక్షిణ తీర రైల్వే (SCoR) ప్రకటించింది. దసరా పండుగ సమయంలో ప్రయాణికుల రద్దీని తట్టుకునేందుకు glass-domed ఆకారంలో ఉండే ఈ కోచ్‌ను అక్టోబర్ 13 నుండి 20, 2026 వరకు ఈ సర్వీసుకు జతచేస్తారు.
అడవులు, లోతైన లోయలు, సొరంగాల గుండా, బొర్రా గుహలు, జలపాతాలు, అరకు లోయ ప్రాంతం మీదుగా సాగే ఈ మార్గం పర్యాటకులను ఆకర్షిస్తుందని రైల్వే అధికారులు తెలిపారు. ఈ అదనపు విస్టాడోమ్ కోచ్ వెయిటింగ్ లిస్టులు తొలగిపోయి, కొత్తవలస-కిరండూల్ లైన్ వెంబడి ఉన్న దృశ్యాలను మరింత మంది పర్యాటకులు ఆస్వాదించడానికి వీలు కల్పిస్తుందని భావిస్తున్నారు. ప్రయాణికులు ఈ సర్వీసును ఉపయోగించుకోవాలని, తమ ప్రయాణాలను ముందుగానే ప్లాన్ చేసుకోవాలని అధికారులు కోరారు.
విహారయాత్రల కోసం నిర్మించే LHB ఆధారిత విస్టాడోమ్ టూరిస్ట్ కోచ్‌లకు విద్యుత్ నియంత్రిత యాంటీ-గ్లేర్ స్క్రీన్‌లతో కూడిన గాజు పైకప్పు, విశాల దృశ్యాలను వీక్షించడానికి వీలుగా అదనపు పెద్ద సైడ్ కిటికీలు ఉంటాయి. వీటిలో 44 పుష్‌బ్యాక్ రిక్లైనింగ్ సీట్లు ఉంటాయి. ఇవి ప్రయాణ దిశ వైపు లేదా పరిసరాల వైపు చూసేందుకు 180 డిగ్రీల వరకు తిరుగుతాయి. దీంతో సీటులో కూర్చున్నవారు ప్రకృతిని ఆస్వాదిస్తూ.. ప్రయాణం చేయవచ్చు.
కోచ్ వెనక భాగంలో విశాలమైన కిటికీలతో ఉన్న అబ్జర్వేషన్ లాంజ్ నుండి వంతెనలు, చుట్టుపక్కల కొండల దృశ్యాలను చూడవచ్చు. ఇతర సౌకర్యాలలో ఆటోమేటిక్ స్లైడింగ్ డోర్లు, జీపీఎస్ ఆధారిత పబ్లిక్ అడ్రస్, ప్యాసింజర్ ఇన్ఫర్మేషన్ సిస్టమ్స్, ఎల్ఈడీ లైటింగ్, మైక్రోవేవ్ ఓవెన్లు, కాఫీ మేకర్లతో కూడిన మినీ-ప్యాంట్రీలు, సీసీటీవీ నిఘా, బయో-టాయిలెట్లు, అగ్ని ప్రమాద గుర్తింపు వ్యవస్థలు ఉంటాయి.
