గోదావరిలో పెరుగుతున్న వరద ఉద్ధృతి - 6 జిల్లాలకు హెచ్చరికలు జారీ..!

ధవళేశ్వరం వద్ద గోదావరి వరద ఉధృతి ప్రమాదకరంగా పెరుగుతోంది. ఇన్ అండ్ ఔట్ ఫ్లో 5 లక్షల క్యూసెక్కులు దాటడంతో ఈ రాత్రికే మొదటి ప్రమాద హెచ్చరిక జారీ చేసే అవకాశం ఉంది. 6 జిల్లాలను విపత్తుల నిర్వహణ సంస్థ తీవ్రంగా అప్రమత్తం చేసింది.

ఎగువ ప్రాంతాల్లో కురుస్తున్న భారీ వర్షాలతో గోదావరి నది మళ్లీ ఉగ్రరూపం దాలుస్తోంది. నదిలో వరద నీటి మట్టం గంటగంటకూ వేగంగా పెరుగుతుండటంతో తీర ప్రాంత వాసుల్లో తీవ్ర ఆందోళన వ్యక్తమవుతోంది. రాజమహేంద్రవరం సమీపంలోని ధవళేశ్వరం సర్‌ ఆర్ధర్‌ కాటన్‌ బ్యారేజీ వద్దకు భారీగా వరద నీరు వచ్చి చేరుతోంది.

ఉగ్రరూపం దాల్చుతున్న గోదావరి

ప్రస్తుతం బ్యారేజీ వద్ద ఇన్ ఫ్లో, ఔట్ ఫ్లో 5 లక్షల క్యూసెక్కులుగా నమోదైంది. వరద ఉధృతి ఇదే రీతిలో కొనసాగితే, ఈరోజు రాత్రి నాటికి బ్యారేజీ వద్ద మొదటి ప్రమాద హెచ్చరికను జారీ చేసే అవకాశముందని అధికారులు అంచనా వేస్తున్నారు.

గోదావరి ప్రవాహం నిరంతరం పెరుగుతున్న నేపథ్యంలో ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) తక్షణ చర్యలు చేపట్టింది. పరిస్థితిని క్షేత్రస్థాయిలో నిరంతరం పర్యవేక్షిస్తూ యంత్రాంగాన్ని సమాయత్తం చేసింది. గోదావరి వరద ప్రభావం తీవ్రంగా ఉండే ఆరు ప్రధాన జిల్లాల కలెక్టర్లను, దిగువ స్థాయి యంత్రాంగాన్ని ముందస్తుగా అప్రమత్తం చేశారు.

ఈ జిల్లాలకు హెచ్చరికలు…

• పోలవరం
• తూర్పు గోదావరి
• కాకినాడ
• డాక్టర్ బి.ఆర్. అంబేద్కర్ కోనసీమ
• ఏలూరు
• పశ్చిమ గోదావరి

గోదావరి మధ్యలో ఉండే లంక గ్రామాలు వరద నీట మునిగే ముప్పు పొంచి ఉండటంతో ఆయా ప్రాంతాల ప్రజలు తగిన జాగ్రత్తలు తీసుకోవాలని విపత్తుల నిర్వహణ సంస్థ స్పష్టమైన ఆదేశాలు జారీ చేసింది. అత్యవసర పరిస్థితులు తలెత్తితే సురక్షిత ప్రాంతాలకు లేదా పునరావాస కేంద్రాలకు వెళ్లేందుకు సిద్ధంగా ఉండాలని సూచించింది.

• ప్రమాదకరమైన ప్రవాహాలు ఉన్నందున నదిలో స్నానాలు చేయడం లేదా చేపల వేటకు వెళ్లడం పూర్తిగా నిషేధం.
• వరద నీరు పారుతున్న రోడ్లు, కాజ్‌వేలు, ముంపు వంతెనలపై ప్రయాణాలు చేయడానికి సాహసించవద్దు.
• లోతట్టు ప్రాంతాల్లో ఉండే నివాసితులు అనుక్షణం అప్రమత్తంగా ఉంటూ, స్థానిక అధికారుల ఆదేశాలను పాటించాలి.
• నీటి ప్రవాహం వద్దకు వెళ్లడం లేదా సెల్ఫీలు దిగడం వంటి ప్రమాదకర పనులకు దూరంగా ఉండాలి.

ప్రభుత్వం అత్యవసర కంట్రోల్ రూమ్‌లను సైతం సిద్ధం చేసి… ఏ క్షణంలోనైనా సహాయక చర్యలు చేపట్టేలా ఎన్‌డీఆర్‌ఎఫ్‌ (NDRF), ఎస్‌డీఆర్‌ఎఫ్‌ (SDRF) బృందాలను సిద్ధంగా ఉంచింది.