విజయవాడలో ఘోర ప్రమాదం.. ఈవీ కారులో మంటలు చెలరేగి నలుగురు సజీవదహనం!

విజయవాడ బైపాస్‌లో ఘోర రోడ్డు ప్రమాదం జరిగింది. రెయిలింగ్‌ను ఢీకొని ఈవీ కారు పూర్తిగా తగలబడింది. ఈ ఘటనలో నలుగురు సజీవ దహనం అయ్యారు.

విజయవాడ నగర శివారులోని వెస్ట్ బైపాస్ రోడ్డుపై తీవ్ర విషాదం చోటుచేసుకుంది. తీవ్ర వేగంతో వెళ్తున్న ఒక ఎలక్ట్రిక్ వాహనం అదుపుతప్పి రహదారి పక్కన ఉన్న రెయిలింగ్‌ను బలంగా ఢీకొట్టింది. ఈ ప్రభావంతో కారులోని బ్యాటరీ వ్యవస్థలో ఒక్కసారిగా మంటలు చెలరేగాయి. ఈ ఘోర ప్రమాదంలో కారులో ప్రయాణిస్తున్న నలుగురు సజీవదహనం కాగా, మరొకరు తీవ్ర గాయాలతో ఆసుపత్రిలో మృత్యువుతో పోరాడుతున్నారు.

ఈవీ కారులో మంటలు

పోలీసులు వెల్లడించిన వివరాల ప్రకారం.. గుంటూరు జిల్లా నంబూరులో జరిగిన ఒక ఫంక్షన్‌కు హాజరై తిరుగు ప్రయాణమైన సమయంలో ఈ దుర్ఘటన జరిగింది. ప్రమాదాన్ని గమనించిన స్థానికులు వెంటనే స్పందించి పోలీసులకు, అగ్నిమాపక రెస్క్యూ సిబ్బందికి సమాచారం అందించారు. ఫైర్ ఇంజన్లతో హుటాహుటిన ఘటనా స్థలానికి చేరుకున్న అగ్నిమాపక సిబ్బంది మంటలను అదుపు చేసినప్పటికీ, అప్పటికే నలుగురు కాలిబూడిదయ్యారు.

ఈ ఘోర ప్రమాదంలో ప్రాణాలు కోల్పోయిన వారిని పోలీసు యంత్రాంగం గుర్తించింది. మృతులు నున్నకు చెందినవారిగా అధికారులు తెలుసుకున్నారు. చనిపోయినవారిలో కొమ్మారెడ్డి రాందేవ్, కొమ్మారెడ్డి అరుణ (రాందేవ్ తల్లి), ఒక చిన్నారి, తిగురు విజయ ఉన్నారు.

ప్రమాద సమాచారం అందుకున్న మృతుల బంధువులు ఘటనా స్థలానికి చేరుకుని కన్నీరుమున్నీరుగా విలపించారు. ప్రమాదంలో తీవ్రంగా గాయపడిన మరో వ్యక్తిని స్థానిక ఆసుపత్రి అత్యవసర విభాగానికి తరలించి చికిత్స అందిస్తున్నారు. ప్రసుతం అతని పరిస్థితి అత్యంత విషమంగా ఉందని వైద్యులు వెల్లడించారు.

వాహనం మితిమీరిన వేగంతో ప్రయాణించడమే ప్రమాదానికి ప్రాథమిక కారణమని విజయవాడ పోలీసులు తెలిపారు. వాహనం వేగంగా రెయిలింగ్‌ను ఢీకొనడంతో ఈవీ కారు బ్యాటరీ బ్యాక్‌పై తీవ్రమైన ప్రభావం పడి, క్షణాల వ్యవధిలోనే మంటలు వ్యాపించినట్లు భావిస్తున్నారు. ఈ ఘటనపై కేసు నమోదు చేసిన పోలీసులు సమగ్ర దర్యాప్తు జరుపుతున్నారు.