ప్రయాణికులకు అలర్ట్... ఈనెల 13 నుంచి విజయవాడ - తిరుపతి మధ్య ప్రత్యేక రెళ్లు! హాల్ట్ లిస్ట్

Vijayawada Tirupati special Trains : విజయవాడ - తిరుపతి మధ్య అక్టోబర్ 13 నుంచి 16 వరకు ప్రత్యేక రైళ్లను నడుపుతున్నట్లు దక్షిణ కోస్తా రైల్వే ప్రకటించింది. రైళ్ల వేళలు, ఆగు స్టేషన్ల పూర్తి వివరాలు ఇవే…

Vijayawada Tirupati special Trains : దసరా, దీపావళి పండుగల వేళ స్వగ్రామాలకు వెళ్లే ప్రయాణికులతో రైళ్లు, బస్సులు కిక్కిరిసిపోతున్నాయి. ముఖ్యంగా తెలుగు రాష్ట్రాల పరిధిలో ప్రధాన నగరాల మధ్య ప్రయాణించే వారి సంఖ్య రోజురోజుకూ భారీగా పెరుగుతోంది. ఈ పండుగ ప్రయాణికుల రద్దీని తగ్గించేందుకు దక్షిణ కోస్తా రైల్వే మరో కీలక నిర్ణయం తీసుకుంది.

ప్రత్యేక రైళ్లు

ఈ ప్రత్యేక రైలు సేవలు అక్టోబర్ 13వ తేదీ నుంచి అక్టోబర్ 16వ తేదీ వరకు కొనసాగుతాయి. నాలుగు రోజుల పాటు నడిచే ఈ రైళ్ల ద్వారా ఇరువైపులా ప్రయాణించే వేలాది మంది ప్రయాణికులకు తీవ్ర ఊరట లభించనుంది.

టైమింగ్స్ వివరాలు…

• రైలు నంబర్ 07249 (విజయవాడ - తిరుపతి) : ఈ ప్రత్యేక రైలు విజయవాడ జంక్షన్ నుంచి ఉదయం 9:30 గంటలకు బయలుదేరుతుంది. ప్రయాణికులను తీసుకెళ్తూ అదే రోజు రాత్రి 7:00 గంటలకు తిరుపతి చేరుకుంటుంది.
• రైలు నంబర్ 07250 (తిరుపతి - విజయవాడ ): తిరుగు ప్రయాణంలో ఈ రైలు తిరుపతి నుంచి రాత్రి 9:10 గంటలకు బయలుదేరి, మరుసటి రోజు ఉదయం 5:30 గంటలకు విజయవాడ చేరుకుంటుంది.

హాల్టింగ్ లిస్ట్…..

ఈ ప్రత్యేక రైళ్లు మార్గమధ్యంలో పలు ముఖ్యమైన రైల్వే స్టేషన్లలో ఆగుతాయి. ఈ లిస్టులో పెదవడ్లపూడి, దుగ్గిరాల , తెనాలి, నిడుబ్రోలు , బాపట్ల , చీరాల , చిన్నగంజాం, ఒంగోలు, సింగరాయకొండ, కావలి, నెల్లూరు, గూడూరు, వెంకటగిరి, శ్రీకాళహస్తి, రేణిగుంట స్టేషన్లున్నాయి.

ఈ ప్రత్యేక రైళ్లలో ప్రయాణికుల అవసరాలకు అనుగుణంగా వివిధ శ్రేణుల బోగీలను కేటాయించారు. మొత్తం 19 ఐసీఎఫ్ (ICF) కోచ్‌లతో నడిచే ఈ రైలులో ఒక ఏసీ సెకండ్ క్లాస్, రెండు ఏసీ థర్డ్ క్లాస్, రెండు రిజర్వ్డ్ స్లీపర్ క్లాస్ , నాలుగు అన్‌రిజర్వ్‌డ్ స్లీపర్, ఎనిమిది జనరల్ సెకండ్ క్లాస్ (8 GS), రెండు ఎస్‌ఎల్‌ఆర్ (2 SLR) బోగీలు ఉంటాయి. పండుగ వేళ తిరుమల శ్రీవారి దర్శనానికి వెళ్లే భక్తులకు, ఇతర ప్రాంతాలకు ప్రయాణించే వారికి ఈ రైళ్లు ఎంతగానో ఉపయోగపడతాయని అధికారులు తెలిపారు. ప్రయాణికులు ఈ ప్రత్యేక రైలు సేవలను వినియోగించుకోవాలని దక్షిణ తీర రైల్వే అధికారులు విజ్ఞప్తి చేశారు.