ఆంధ్రప్రదేశ్‌కు వాతావరణ శాఖ అలర్ట్ - ఈనెల 18 వరకు వర్షాలు

ఆంధ్రప్రదేశ్‌లోని కోస్తాంధ్ర, రాయలసీమతో పాటు యానాంలో అక్టోబర్ 18 వరకు వర్షాలు కురిసే అవకాశం ఉంది. కొన్ని జిల్లాలకు హెచ్చరికలు జారీ అయ్యాయి.

ఆంధ్రప్రదేశ్ కు వాతావరణశాఖ ముఖ్యమైన అలర్ట్ ఇచ్చింది. కోస్తాంధ్ర, రాయలసీమ ప్రాంతాల్లో 2 రోజుల పాటు వర్షాలు కురిసే అవకాశం ఉంది. అక్టోబర్ 18 వరకు పలు ప్రాంతాల్లో భారీ వర్షాలు కురిసే సూచనలున్నాయని అమరావతి వాతావరణ కేంద్రం శుక్రవారం వెల్లడించింది.

ఏపీకి వర్ష సూచన

కోస్తాంధ్ర, రాయలసీమతో పాటు కేంద్రపాలిత ప్రాంతమైన యానాంలో అక్కడక్కడా కుండపోత వర్షాలు పడవచ్చు. వర్షంతో పాటు ఉరుములు, మెరుపులు వచ్చే ప్రమాదం ఉంది. ఈ 3 రోజుల కాలంలో గంటకు 50 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉంటుంది. పిడుగులు పడే అవకాశం ఉన్నందున ప్రజలు చెట్ల కింద నిలబడకూడదని, విద్యుత్ స్తంభాలకు దూరంగా ఉండాలని అధికారులు విజ్ఞప్తి చేస్తున్నారు.

అకస్మాత్తుగా వీచే బలమైన ఈదురుగాలుల వల్ల చేతికొచ్చిన పంటలకు నష్టం వాటిల్లే ప్రమాదం ఉన్నందున రైతులు తగిన ముందస్తు జాగ్రత్తలు తీసుకోవాలని అధికారులు సూచించారు. సముద్రంలో వేటకు వెళ్లే మత్స్యకారులు కూడా అప్రమత్తంగా ఉండాలని…. తీరం దాటి ముందుకు వెళ్లవద్దని వర్ష హెచ్చరికల్లో పేర్కొన్నారు. వాగులు, వంకలు పొంగిపొర్లే అవకాశం ఉన్నందున లోతట్టు ప్రాంతాల ప్రజలను కూడా అధికారులు ముందస్తుగా హెచ్చరిస్తున్నారు.

ఇవాళ ఈ జిల్లాల్లో వర్షాలు…

ఏపీ విపత్తుల నిర్వహణ సంస్థ ప్రకటనలోని వివరాల ప్రకారం….. ద్రోణి ప్రభావంతో శనివారం(అక్టోబర్ 17, 2026) ఉత్తరాంధ్ర, రాయలసీమ జిల్లాలతో పాటు కాకినాడ, గుంటూరు, బాపట్ల, పల్నాడు, మార్కాపురం, ప్రకాశం , నెల్లూరు జిల్లాల్లో జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉంది. మిగతా జిల్లాల్లో తేలికపాటి వర్షాలు కురిసే అవకాశం ఉందని…. ప్రజలు అప్రమత్తంగా ఉండి తగిన జాగ్రత్తలు తీసుకోవాలని సూచించింది.