తెలుగు రాష్ట్రాల్లో భిన్నమైన వాతావరణ పరిస్థితులు కనిపిస్తున్నాయి. ఓవైపు పగటి ఉష్ణోగ్రతలు పెరుగుతుండగా... ఉక్కపోత కూడా ఎక్కువగా ఉంటోంది. అయితే ఇవాళ ఏపీలోని పలు ప్రాంతాల్లో వర్షం కురిసే అవకాశం ఉందని వాతావరణశాఖ అంచనా వేసింది.
వాతావరణ శాఖ అంచనాల ప్రకారం.... కొమోరియన్ ప్రాంతం నుండి తమిళనాడు, దక్షిణ అంతర్గత కర్ణాటక మీదుగా ఉత్తర అంతర్గత కర్ణాటక పై ఉన్న ఉపరితల ఆవర్తనం వరకు ఒక ద్రోణి సగటు సముద్ర మట్టానికి 0.9 కిలోమీటర్ల ఎత్తులో విస్తరించి ఉంది. దీని ప్రభావంతో ఆంధ్రప్రదేశ్, యానంలో దిగువ ట్రోపో ఆవరణంలో ఆగ్నేయ, నైరుతి దిశల నుంచి గాలులు వీస్తున్నాయి. ఇదే ప్రభావంతో వర్షాలు పడే సూచనలున్నాయి.
ఇవాళ (06-10-2026) కృష్ణా, అన్నమయ్య, చిత్తూరు జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ తెలిపింది. మిగతా జిల్లాల్లో చెదురుమదురుగా పిడుగులతో కూడిన తేలికపాటి వర్షాలు పడొచ్చని స్పష్టం చేసింది.
కోస్తా ఆంధ్రప్రదేశ్, యానాం ప్రాంతాల్లో రాగల మూడు రోజులు ఒకటి లేదా రెండు చోట్ల తేలికపాటి నుండి మోస్తరు వర్షాలు లేదా ఉరుములతో కూడిన జల్లులు పడే అవకాశముంది. గంటకు 30 నుండి 50 కిలోమీటర్ల వేగంతో బలమైన ఈదురుగాలులు వీచే వీలుంది. రాయలసీమ ప్రాంతంలో కూడా రాబోయే కొన్ని రోజుల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది.
తెలంగాణ వాతావరణం రిపోర్ట్....
హైదరాబాద్ వాతావరణ కేంద్రం తెలిపిన వివరాల ప్రకారం…. తెలంగాణ రాష్ట్రంలో రాగల కొన్ని రోజుల్లో ప్రధానంగా పొడి వాతావరణం ఏర్పడే అవకాశం ఉంది. అయితే అక్టోబర్ 7 నుంచి అక్టోబర్ 8 ఉదయం వరకు కొన్ని చోట్ల తేలికపాటి నుండి ఒక మోస్తరు వర్షాలు అక్కడక్కడ కురిసే సూచనలు ఉన్నాయి. ఎలాంటి హెచ్చరికలు లేవు. ఎండ, ఉక్కపోత ఎక్కువగా ఉండే సూచనలు కనిపిస్తున్నాయి.