ISKCON Tirupati : ఇస్కాన్ తిరుపతి శ్రీ కృష్ణ జన్మాష్టమి వేడుకల పోస్టర్ విడుదల

తిరుపతిలోని ఇస్కాన్‌లో శ్రీ కృష్ణ జన్మాష్టమి 2026 వేడుకలను ఘనంగా నిర్వహించనున్నారు. ఈ మేరకు పోస్టర్‌ను ఆవిష్కరించారు.

తిరుపతిలోని ఇస్కాన్ (ISKCON) ఆలయంలో ఈ ఏడాది శ్రీకృష్ణ జన్మాష్టమి మహోత్సవాలను అత్యంత వైభవంగా నిర్వహించేందుకు ఏర్పాట్లు శరవేగంగా జరుగుతున్నాయి. ఈ వేడుకలకు సంబంధించిన పోస్టర్‌ను ఇస్కాన్ ఆలయ ప్రాంగణంలోని గౌరాంగ భవన్ కాన్ఫరెన్స్ హాల్‌లో ఆలయ ఛైర్మన్ రేవతి రమణ ప్రభు ఘనంగా విడుదల చేశారు. ఈ కార్యక్రమంలో ఆలయ వైస్ ఛైర్మన్ రూపేష్ చైతన్య ప్రభుతో పాటు ఇతర ప్రతినిధులు, భక్తులు విశేషంగా పాల్గొన్నారు.

ఇస్కాన్ తిరుపతి

సెప్టెంబర్ 4వ తేదీన జరిగే ప్రధాన శ్రీకృష్ణ జన్మాష్టమి పర్వదినాన్ని పురస్కరించుకుని ఆలయంలో ఆగస్టు 23 నుండి వైవిధ్యమైన ఆధ్యాత్మిక, సాంస్కృతిక, భక్తి కార్యక్రమాలను నిర్వహించనున్నట్లు నిర్వాహకులు వెల్లడించారు.

ఆధ్యాత్మిక ఉత్సవాల పూర్తి వివరాలు

శ్రీకృష్ణ చైతన్య అమృతాన్ని భక్తులకు అందించేందుకు భాగంలో శ్రీ శ్రీ రాధా గోవిందజీ ఉంజల్ సేవ (డోలోత్సవం) ఆగస్టు 23 నుంచి 28వ తేదీ వరకు ప్రతిరోజూ సాయంత్రం 7:00 గంటల నుండి రాత్రి 8:30 గంటల వరకు ఆలయంలో వైభవంగా జరగనుంది. భక్తులు ఈ డోలోత్సవంలో పాల్గొని స్వామివారి కృపకు పాత్రులు కావచ్చు.

శ్రీకృష్ణుని నిత్య అగ్రజన్ముడు, మొదటి సేవకుడైన బలరామ భగవానుడి ఆవిర్భావ దినోత్సవాన్ని ఆగస్టు 28న ఆలయంలో ఎంతో భక్తిశ్రద్ధలతో నిర్వహించనున్నారు.

జన్మాష్టమి వేడుకల ముందస్తు సన్నాహాల్లో భాగంగా సెప్టెంబర్ 3న గోపూజ మహోత్సవం, అధివాస మహోత్సవాలు నిర్వహిస్తారు. శ్రీకృష్ణుని జీవితంలో, ఆయన బోధనల్లో ఆవుల సంరక్షణకు, గోసేవకు ప్రత్యేక స్థానం ఉందని ఈ సందర్భంగా ఆలయ ప్రతినిధులు గుర్తుచేశారు.

సెప్టెంబర్ 4న లోకరక్షకుడైన శ్రీకృష్ణుని దివ్య ఆవిర్భావ దినోత్సవమైన 'శ్రీకృష్ణ జన్మాష్టమి'ని వేడుకగా నిర్వహించనున్నారు. ఈ పవిత్ర పర్వదినాల్లో భక్తులందరూ విశేష సంఖ్యలో పాల్గొని, భగవంతుని సేవలో తరించి దివ్యానుభూతిని పొందాలని ఇస్కాన్ ప్రతినిధులు కోరారు.

సెప్టెంబర్ 4న జరగనున్న జన్మాష్టమి వరకు అనేక ఆధ్యాత్మిక కార్యక్రమాలు నిర్వహిస్తారు. ఇస్కాన్ సభ్యుల ప్రకారం జన్మాష్టమి అనేది శ్రీకృష్ణుని దివ్య ఆవిర్భావాన్ని స్మరించుకునే పవిత్రమైన సందర్భం.