E-Paper
భక్తి, పూజలు, నోములతో శ్రావణ మాసం సందడి.. ఈ నెలలోని ముఖ్యమైన రోజులు ఇవే!
ఆగస్టు 13, 2026 నుంచి సెప్టెంబర్ 11 వరకు శ్రావణమాసం కొనసాగనుంది. భక్తి, ఆధ్యాత్మికతకు ప్రత్యేకమైన ఈ మాసంలో నాలుగు మంగళవారాలు, నాలుగు శుక్రవారాలు రావడం విశేషం. మంగళ గౌరీ వ్రతం, వరలక్ష్మీ వ్రతం, రాఖీ పౌర్ణమి, సత్యనారాయణ వ్రతం, శ్రీకృష్ణ జన్మోత్సవం వంటి పర్వదినాలను భక్తిశ్రద్ధలతో జరుపుకుంటారు.
శ్రావణమాసం అంటే భక్తికి, ఆధ్యాత్మికతకు నెలవు. సంవత్సరంలో ఐదవ పవిత్రమైన మాసం శ్రావణమాసం. శ్రావణ మాసంలో చంద్రుడు శ్రవణా నక్షత్రంలో సంచరిస్తాడు కాబట్టి దీనికి శ్రావణమాసం అని పేరు. ఈ ఏడాది శ్రావణమాసం ఆగస్టు 13, గురువారం నుంచి ప్రారంభమవుతుంది. సెప్టెంబర్ 11, శుక్రవారంతో ముగుస్తుంది.
ఈసారి శ్రావణ మాసంలో నాలుగు శుక్రవారాలు వచ్చాయి. పౌర్ణమి తిథి కూడా శుక్రవారం వచ్చింది. సాధారణంగా చూసినట్లయితే, శ్రావణ పౌర్ణమి కంటే ముందు వచ్చే శుక్రవారం నాడు వరలక్ష్మీ వ్రతాన్ని ఆచరిస్తాము. ఈ ఏడాది పౌర్ణమి శుక్రవారం రావడంతో, ఆ ముందు వారం వరలక్ష్మీ వ్రతాన్ని జరుపుకోవాలని, పౌర్ణమి నాడు శుక్రవారం రావడంతో ఆ రోజు కూడా పున్నమి గడియలు దాటకుండా వ్రతం చేయొచ్చు.
శ్రావణ మంగళవారాలు, శుక్రవారాలు
ఈసారి శ్రావణ మంగళవారాలు 4 వచ్చాయి. ఆ నాలుగు మంగళవారాల్లో మంగళ గౌరీ వ్రతం చేసుకోవచ్చు. సెప్టెంబర్ 11, శుక్రవారం వచ్చింది. కానీ అమావాస్యతో శ్రావణ మాసం పూర్తవుతుంది. భాద్రపద మాసం వస్తుంది.
శ్రావణమంతా సందడి
శ్రావణమాసం అంటే నిజంగా ఒక సందడి అని చెప్పొచ్చు. సాంప్రదాయ వస్త్రాలను కట్టుకుని ఆడపడుచులు పూజలు, నోములు వంటివి చేస్తారు. శ్రావణ మాసం చాలా విశేషమైనది. శ్రవణం విష్ణుమూర్తి జన్మ నక్షత్రం కూడా. పార్వతీ పరమేశ్వరులతో పాటు లక్ష్మీదేవిని, శ్రీమన్నారాయణుడిని ఈ నెలలో కొలిస్తే ఏ విశేషమైన ఫలితాలను చూడొచ్చు.
అలాగే, శ్రావణ మాసంలో వచ్చే సోమవారం నాడు శివుడిని ఆరాధించే రుద్రాభిషేకాలు చేయించడం వలన అద్భుతమైన ఫలితాలను చూడొచ్చు. ఆ పరమేశ్వరుడికి పాలు, నీళ్లతో అభిషేకం చేస్తే చాలా మంచిది.
మంగళ గౌరీ వ్రతం
శ్రావణమాసంలో వచ్చే మంగళవారాల నాడు మంగళ గౌరీ వ్రతాన్ని జరుపుతారు. ఆరోజు మంగళ గౌరీ దేవిని భక్తిశ్రద్ధలతో ఆరాధించి, దీప, ధూప, నైవేద్యాలను సమర్పించాలి. అలాగే ముత్తైదువులకు వాయనాన్ని ఇవ్వాలి. సాక్షాత్తూ శ్రీకృష్ణుడే ద్రౌపతికి వివరించినట్లు నారద పురాణం చెప్తోంది. ఐదేళ్లపాటు ఈ మంగళ గౌరీ వ్రతాన్ని ఆచరిస్తే, ఆ మంగళ గౌరీ దేవి అనుగ్రహంతో సంతోషంగా ఉండొచ్చు.
రాఖీ పౌర్ణమి, శ్రీకృష్ణ జన్మోత్సవం
శ్రావణమాసంలో వచ్చే పౌర్ణమిని రాఖీ పౌర్ణమి లేదా జంధ్యాల పౌర్ణమి అని అంటారు. వేద అధ్యయనం చేసిన వారందరూ కొత్త యజ్ఞోపవీతాన్ని ధరిస్తారు. విష్ణు అవతారమైనటువంటి హయగ్రీవుడు కూడా అదే రోజు అవతరించాడని పురాణాలు చెబుతున్నాయి.
పౌర్ణమి నాడు సత్యనారాయణ వ్రతం చేసుకుంటే కూడా చాలా మంచిది.
శ్రావణ మాసంలో వచ్చే బహుళ అష్టమి నాడు కృష్ణుడు జన్మించాడు. ఆరోజు కృష్ణుడిని ఆరాధిస్తే చాలా మంచిది. కృష్ణ మందిరాల్లో స్వామిని అందంగా అలంకరించి, వైభవంగా ఉత్సవాలను జరుపుతారు.
