బంగాళాఖాతంలో అల్పపీడనం... తుఫాన్ గా మారే ఛాన్స్ - ఈ తేదీల్లో కోస్తాంధ్రకు భారీ వర్ష సూచన..!

ఆగ్నేయ బంగాళాఖాతంలో ఏర్పడిన అల్పపీడనం నవంబర్ 16 నాటికి తుఫానుగా బలపడనుంది. దీని ప్రభావంతో నవంబర్ 18, 19 తేదీల్లో కోస్తాంధ్ర, ఒడిశాలో భారీ వర్షాలు కురుస్తాయని ఐఎండీ హెచ్చరించింది.

బంగాళాఖాతంలో మరోసారి వాతావరణం మారుతోంది. ఆగ్నేయ బంగాళాఖాతంలో ఏర్పడిన అల్పపీడనం క్రమంగా బలపడుతూ నవంబర్ 16 సాయంత్రం నాటికి మధ్య బంగాళాఖాతంలో తుఫానుగా మారే అవకాశం ఉందని భారత వాతావరణ శాఖ (IMD) తాజాగా ప్రకటించింది. మధ్య అండమాన్ సముద్రం, దాని పరిసర అండమాన్ నికోబార్ దీవులపై కొనసాగుతున్న ఉపరితల ఆవర్తన ప్రభావంతో ఈ అల్పపీడనం రూపుదిద్దుకుంది.

బంగాళాఖాతంలో మరో తుఫాను

తుఫాను గమనం ఇలా..

వాతావరణ శాఖ అంచనాల ప్రకారం…… ఈ అల్పపీడనం వాయువ్య దిశగా కదులుతూ నవంబర్ 15 నాటికి తీవ్ర అల్పపీడనంగా మారుతుంది. ఆ తర్వాత మరింత బలపడి వాయుగుండంగా రూపాంతరం చెందుతుంది. అనంతరం ఉత్తర-వాయువ్య దిశగా ప్రయాణిస్తూ నవంబర్ 16 సాయంత్రం కల్లా మధ్య బంగాళాఖాతంలో తుఫానుగా మారనుంది.

కోస్తాంధ్ర, ఒడిశాకు భారీ వర్ష సూచన

ఈ తుఫాన్ ప్రభావంతో అండమాన్ నికోబార్ దీవుల్లో నవంబర్ 16 వరకు భారీ వర్షాలు కురుస్తాయి. ఆ తర్వాత దీని ప్రభావం తూర్పు తీర రాష్ట్రాలపై పడనుంది. ముఖ్యంగా నవంబర్ 18, 19 తేదీల్లో కోస్తా ఆంధ్రప్రదేశ్, ఒడిశా రాష్ట్రాల్లో భారీ వర్షాలు కురిసే అవకాశం ఉందని వాతావరణ శాఖ స్పష్టం చేసింది. దీనితో తీర ప్రాంత ప్రజలు, రైతులు అప్రమత్తంగా ఉండాల్సిన అవసరం ఏర్పడింది.

తుఫాను నేపథ్యంలో సముద్రం అల్లకల్లోలంగా మారనుంది. అలల ఉధృతి మరింత పెరిగే ప్రమాదం ఉండటంతో వాతావరణ శాఖ మత్స్యకారులకు కఠిన హెచ్చరికలు జారీ చేసింది.

• ఇప్పటికే వేటకు వెళ్లిన మత్స్యకారులు నవంబర్ 15 లోగా తీరానికి చేరుకోవాలి.
• నవంబర్ 17 వరకు అండమాన్ సముద్రం, అండమాన్ నికోబార్ దీవుల తీర ప్రాంతాల్లో వేటకు వెళ్లకూడదు.
• నవంబర్ 15 నుంచి 18 వరకు ఆగ్నేయ బంగాళాఖాతంలోకి, నవంబర్ 16 నుంచి 19 వరకు మధ్య బంగాళాఖాతంలోకి మత్స్యకారులు ఎట్టి పరిస్థితుల్లోనూ వెళ్లరాదని అధికారులు సూచించారు

ఇటీవల విరుచుకుపడిన 'అర్నబ్ ', 'మురసు' తుఫానులు పలు రాష్ట్రాల్లో పెను విధ్వంసం సృష్టించాయి. ఒడిశా, ఆంధ్రప్రదేశ్, తమిళనాడు తీరాలను తాకిన ఈ తుఫానుల కారణంగా భారీగా ప్రాణ, ఆస్తి నష్టం సంభవించింది. ముఖ్యంగా 'అర్ణబ్' తుఫాను మిగిల్చిన విషాదం నుంచి ప్రజలు ఇంకా కోలుకోలేదు.