మీ ఇంటికి మీ డాక్టర్ మొబైల్ యూనిట్‌ ప్రారంభం.. ఎలా పనిచేస్తుందంటే?

mee intiki mee doctor : తిరుపతిలో ‘మీ ఇంటికి మీ డాక్టర్’ కార్యక్రమం కింద ఒక మొబైల్ యూనిట్ ప్రారంభమైంది. ఇది గ్రామాల్లోకి వెళ్లి జనాలకు సేవలు అందిస్తుంది.

వెనుకబడిన ప్రాంతాల్లోని ప్రజలకు వారి ఇంటి వద్దకే ఉచిత వైద్య సంరక్షణను అందించేందుకు, తిరుపతి జిల్లా యంత్రాంగం మీ ఇంటికి మీ డాక్టర్ కార్యక్రమం కింద ఒక మొబైల్ యూనిట్ ప్రారంభించింది. జిల్లా కలెక్టర్ డాక్టర్ ఎస్. వెంకటేశ్వర్, ఇండియన్ రెడ్ క్రాస్ సొసైటీ తిరుపతి ఛైర్మన్ డాక్టర్ డి. శ్రీహరి రావు, జిల్లా వైద్య, ఆరోగ్య అధికారి డాక్టర్ వి. బాలకృష్ణ నాయక్‌లతో కలిసి ఈ యూనిట్‌ను ప్రారంభించారు.

మీ ఇంటికి మీ డాక్టర్

జిల్లాలోని గ్రామీణ ప్రాంతాల్లో ఆరోగ్య సంరక్షణ అందుబాటును మెరుగుపరిచేందుకు, రూరల్ ఎలక్ట్రిఫికేషన్ కార్పొరేషన్ సహకారంతో ఇండియన్ రెడ్ క్రాస్ సొసైటీ ఈ కార్యక్రమాన్ని అమలు చేస్తోందని కలెక్టర్ తెలిపారు. ఈ యూనిట్ ప్రధానంగా ఎస్సీ, ఎస్టీ నివాస ప్రాంతాలను కవర్ చేస్తుంది. ప్రతిరోజూ సుమారు 100 మంది రోగులకు ఔట్ పేషెంట్ సంరక్షణ, మందులను అందిస్తుందని అధికారులు చెబుతున్నారు.

ఈ మొబైల్ యూనిట్‌లో ఒక డాక్టర్, ఒక నర్సు, ఇద్దరు ఫార్మసిస్టులు, ఒక డ్రైవర్ ఉంటారు. వీరు ఒక నిర్ణీత షెడ్యూల్ ప్రకారం ప్రతిరోజూ రెండు నుండి మూడు గ్రామాలను సందర్శిస్తారు. రోగుల తదుపరి పర్యవేక్షణ కోసం ఈ మెుబైల్ యూనిట్ టీమ్ ఆశా(ASHA), ఏఎన్ఎం (ANM) కార్యకర్తలతో సమన్వయం చేసుకుంటుంది. తదుపరి చికిత్స అవసరమైన వారిని ప్రాథమిక ఆరోగ్య కేంద్రాలు, కమ్యూనిటీ ఆరోగ్య కేంద్రాలు, ప్రాంతీయ ఆసుపత్రులు, ప్రభుత్వ జనరల్ ఆసుపత్రులకు పంపిస్తారు.

తిరుపతితో సహా ఏడు జిల్లాల్లో రూ.8.40 కోట్ల వ్యయంతో ఇలాంటి మొబైల్ యూనిట్లను ప్రవేశపెట్టినట్లు డాక్టర్ వెంకటేశ్వర్ తెలిపారు. ఈ కార్యక్రమం టీకా కవరేజీని మెరుగుపరచడం, డెంగ్యూ, మలేరియా వంటి వ్యాధులను తగ్గించడం కూడా లక్ష్యంగా పెట్టుకుంది. తిరుపతి రెడ్ క్రాస్‌లో ప్లేట్‌లెట్లు, ప్లాస్మాను వేరుచేసే సౌకర్యాలతో ఒక బ్లడ్ బ్యాంక్‌ను ఏర్పాటు చేశారని తెలిపారు. కళాశాలలు, సంస్థలలో రక్తదానాలను ప్రోత్సహించడానికి మొబైల్ బ్లడ్ బ్యాంక్‌ను ప్రవేశపెట్టేందుకు ప్రణాళికలు జరుగుతున్నాయి.