మెగా డీఎస్సీ ప్రక్రియపై వైఎస్సార్ కాంగ్రెస్ పార్టీ (వైఎస్సార్సీపీ) అధినేత, మాజీ ముఖ్యమంత్రి వైఎస్ జగన్ మోహన్ రెడ్డి మరోసారి ఫైర్ అయ్యారు. ముఖ్యమంత్రి నారా చంద్రబాబు నాయుడు నేతృత్వంలోని ఎన్డీయే కూటమి ప్రభుత్వం భారీ అక్రమాలకు పాల్పడిందని…. ఈ స్కామ్పై తక్షణమే కేంద్ర దర్యాప్తు సంస్థ (సిబిఐ) చేత స్వతంత్ర విచారణ జరిపించాలని డిమాండ్ చేశారు. నియామకాల్లో జరుగుతున్న అక్రమాలను కప్పిపుచ్చుకునేందుకు కూటమి ప్రభుత్వం 'డిజిటల్ సెన్సార్షిప్'కు పాల్పడుతోందని ఆరోపించారు.
"డీఎస్సీ 2025 నియామకాల కుంభకోణం రోజురోజుకు బట్టబయలవుతోంది. రాష్ట్రంలోని వివిధ ప్రాంతాల నుంచి రోజూ కొత్త ఆధారాలు, వాస్తవాలు వెలుగులోకి వస్తూ తీవ్రమైన అక్రమాలను బహిర్గతం చేస్తున్నాయి. దీనిపై చంద్రబాబు నేతృత్వంలోని ప్రభుత్వం సమాధానం చెప్పాలి," అని జగన్ నిలదీశారు. వాస్తవాలను వెలికితీసేందుకు సీబీఐ విచారణకు అంగీకరించాల్సింది పోయి, ప్రశ్నించే వారి గొంతు నొక్కేందుకు ప్రభుత్వం ప్రయత్నిస్తోందని ఆయన మండిపడ్డారు. "లీగల్ రిక్వైర్మెంట్స్ (చట్టపరమైన అవసరాలు)" పేరుతో మెటా (ఫేస్బుక్, ఇన్స్టాగ్రామ్) ప్లాట్ఫారమ్లలో ప్రతిపక్షాలు, మీడియా ఖాతాలపై నిబంధనలు విధిస్తూ, కంటెంట్ను తొలగించడం లేదా జియో-బ్లాకింగ్ చేయడం దారుణమని ధ్వజమెత్తారు.
"ఈ అణచివేత కేవలం డీఎస్సీ కుంభకోణంతోనే ఆగిపోలేదు. కూటమి ప్రభుత్వ అవినీతి, వైఫల్యాలు, సూపర్ సిక్స్ మరియు సూపర్ సెవెన్ ఎన్నికల హామీల అమల్లో దగా, ప్రభుత్వ పెద్దల అహంకారం, అధికార దుర్వినియోగాన్ని ప్రశ్నిస్తున్న ప్రతి ఒక్కరినీ టార్గెట్ చేస్తున్నారు. మీ వద్ద ప్రశ్నలకు సమాధానాలు లేనప్పుడు, ప్రశ్నించే వారి నోళ్లు మూయిస్తున్నారు. ఇది ఎంతమాత్రం సుపరిపాలన అనిపించుకోదు, పక్కా సెన్సార్షిప్ అవుతుంది. రాజ్యాంగం పౌరులకు ప్రసాదించిన భావప్రకటనా స్వేచ్ఛ ప్రాథమిక హక్కు. రాజకీయం గా ఇబ్బందికరమైన ప్రశ్నలు అడిగినంత మాత్రాన ప్రతిపక్షాలను, మీడియాను, పౌరులను నోరెత్తకుండా చేసే హక్కు ఏ ప్రభుత్వానికీ లేదు" అని వైఎస్ జగన్ స్పష్టం చేశారు.
విచారణకు భయమెందుకు..?
"చంద్రబాబు గారు.. మిమ్మల్ని భయపెడుతున్నది ఏంటి? అడుగుతున్న ప్రశ్నలా లేక రాబోయే సమాధానాలా? డీఎస్సీ నియామకాలపై ప్రతిరోజూ బయటపడుతున్న ఆధారాలు తప్పయితే, ప్రజల ముందుకు వచ్చి ఆధారాలతో సహా వాటిని తప్పు అని నిరూపించవచ్చు కదా! సీబీఐ విచారణకు ఎందుకు నిరాకరిస్తున్నారు? అక్రమాలను బయటపెడుతున్న వారిని ఎందుకు భయపెడుతున్నారు? ఖాతాలను ఎందుకు బ్లాక్ చేస్తున్నారు? ఒక పోస్టును డిలీట్ చేసినంత మాత్రాన ఆధారాలు చెరిగిపోవు, ఒక అకౌంట్ను బ్లాక్ చేసినంత మాత్రాన సత్యాన్ని సమాధి చేయలేరు. ప్రతిపక్షాన్ని రాజకీయంగా ఎదుర్కోండి, ప్రజలకు ప్రజాస్వామ్యబద్ధంగా సమాధానం చెప్పండి, రాజ్యాంగబద్ధంగా పాలన సాగించండి," అని చురకలు వేశారు.
{{/usCountry}}"చంద్రబాబు గారు.. మిమ్మల్ని భయపెడుతున్నది ఏంటి? అడుగుతున్న ప్రశ్నలా లేక రాబోయే సమాధానాలా? డీఎస్సీ నియామకాలపై ప్రతిరోజూ బయటపడుతున్న ఆధారాలు తప్పయితే, ప్రజల ముందుకు వచ్చి ఆధారాలతో సహా వాటిని తప్పు అని నిరూపించవచ్చు కదా! సీబీఐ విచారణకు ఎందుకు నిరాకరిస్తున్నారు? అక్రమాలను బయటపెడుతున్న వారిని ఎందుకు భయపెడుతున్నారు? ఖాతాలను ఎందుకు బ్లాక్ చేస్తున్నారు? ఒక పోస్టును డిలీట్ చేసినంత మాత్రాన ఆధారాలు చెరిగిపోవు, ఒక అకౌంట్ను బ్లాక్ చేసినంత మాత్రాన సత్యాన్ని సమాధి చేయలేరు. ప్రతిపక్షాన్ని రాజకీయంగా ఎదుర్కోండి, ప్రజలకు ప్రజాస్వామ్యబద్ధంగా సమాధానం చెప్పండి, రాజ్యాంగబద్ధంగా పాలన సాగించండి," అని చురకలు వేశారు.
{{/usCountry}}డీఎస్సీ నియామకాల్లో జరిగిన లోపాలను ఎత్తిచూపుతూ.. "పరీక్షలు రాయకుండానే ఉపాధ్యాయ ఉద్యోగాలు ఇవ్వడాన్ని మీరు ఎలా సమర్థించుకుంటారు? టెట్ (TET) అర్హత సాధించని వారికి కూడా టీచర్ పోస్టులు కట్టబెట్టడం ఏ రకమైన న్యాయం? స్పోర్ట్స్ కోటా జీవోలు ఇవ్వడం, నియామకాలు పూర్తయ్యాక ఆ జీవోలను రద్దు చేయడం, అయినా ఆ జీవోల కింద ఎంపికైన వారు ఉద్యోగాల్లో కొనసాగడం చూస్తుంటే ఈ నియామకాల ప్రక్రియ అంతా అవినీతిమయంగా మారిందని స్పష్టమవుతోంది," అని దుయ్యబట్టారు.
ఈ అక్రమాలకు నైతిక బాధ్యత వహిస్తూ విద్యాశాఖ మంత్రి నారా లోకేష్ తక్షణమే తన పదవికి రాజీనామా చేయాలని జగన్ డిమాండ్ చేశారు. "సెన్సార్షిప్ ద్వారా నిలిపివేసిన ప్రతి సోషల్ మీడియా అకౌంట్ను, తొలగించిన ప్రతి పోస్టును వెంటనే పునరుద్ధరించాలి. డీఎస్సీ 2025 నియామకాలు పారదర్శకంగా జరిగాయని భావిస్తే, ప్రభుత్వం వెంటనే సీబీఐ విచారణకు ఆదేశించాలి. మీ వద్ద దాచడానికి ఏమీ లేకపోతే ఈ భయం ఎందుకు?" అని జగన్ సవాల్ విసిరారు.