Railway Updates : నవంబర్ 10 నుంచి 48 రోజులు చాలా రైళ్ల రద్దు, దారిమళ్లింపులు!

Railway Updates : నవంబర్ 10 నుంచి రేణిగుంట రైల్వే స్టేషన్ యార్డ్ ఆధునీకరణ పనులు జరగనున్నాయి. దీంతో భారీగా రైళ్ల రద్దు, దారి మళ్లింపులు ఉన్నాయి.

ప్రముఖ పుణ్యక్షేత్రం తిరుపతి సమీపంలోని రేణిగుంట రైల్వేస్టేషన్ యార్డ్‌లో మౌలిక వసతుల పెంపు, ఇంటర్ లాకింగ్ పనుల దృష్ట్యా దక్షిణ కోస్తా రైల్వే కీలక నిర్ణయం తీసుకుంది. నవంబరు 10 నుంచి డిసెంబరు 27 వరకు దాదాపు 48 రోజుల పాటు పలు రైళ్లను రద్దు చేయడంతో పాటు మరికొన్ని రైళ్ల మార్గాలను మళ్లిస్తున్నట్లు దక్షిణ కోస్తా రైల్వే జోనల్ అధికారి విజయ్‌కిషన్ ఒక ప్రకటనలో వెల్లడించారు.

ప్రతీకాత్మక చిత్రం

రైలు మార్గాల ఆధునీకరణ పనుల కారణంగా నిత్యం ప్రయాణించే ప్రయాణికులు, ఉద్యోగులపై ప్రభావం పడే అవకాశం ఉంది. ప్యాసింజర్ రైళ్లు 48 రోజుల పాటు పూర్తిగా రద్దు చేశారు. కడప - అరక్కోణం, తిరుచానూరు - అరక్కోణం, చెన్నై - తిరుచానూరు, గూడూరు - రేణిగుంట, నెల్లూరు - రేణిగుంట మార్గాల్లో నిత్యం రాకపోకలు సాగించే రోజువారీ ప్యాసింజర్ రైళ్లను పూర్తిగా రద్దు చేశారు.

సప్తగిరి ఎక్స్‌ప్రెస్: చెన్నై - తిరుపతి నడుమ నిత్యం తిరిగే ప్రజాదరణ పొందిన సప్తగిరి ఎక్స్‌ప్రెస్‌ను మొత్తం 27 రోజుల పాటు నిలిపివేస్తున్నారు.

తిరుపతి - విశాఖ డబుల్ డెక్కర్: తిరుపతి మరియు విశాఖపట్నం మధ్య వారంలో మూడు రోజులు నడిచే డబుల్ డెక్కర్ ఎక్స్‌ప్రెస్‌ను డిసెంబరు 9 నుండి 26 వరకు (ఆది, సోమ, బుధ, గురు, శుక్ర, శనివారాల్లో) రద్దు చేశారు.

వీక్లీ రైళ్లు: తిరుచానూరు నుండి నాందేడ్, జాల్నా, కాచిగూడ, చర్లపల్లి వెళ్లే వారాంతపు ఎక్స్‌ప్రెస్‌లను రెండు సేవల చొప్పున నిలిపివేశారు. రేణిగుంట - మైసూర్ ఎక్స్‌ప్రెస్ డిసెంబరు 11, 12, 18, 19, 25, 26 తేదీల్లో నడవదు. తిరుపతి - భువనేశ్వర్ ఎక్స్‌ప్రెస్ డిసెంబరు 12, 13, 14, 19, 20, 21, 26, 27 తేదీల్లో రద్దు అయింది. రేణిగుంట - నిశ్చింతపూర్ మధ్య నడిచే 4 సరుకు రవాణా రైళ్లను రద్దు చేశారు.

రేణిగుంట జంక్షన్ మీదుగా దేశంలోని వివిధ ప్రాంతాలకు వెళ్లే దాదాపు 73 ఎక్స్‌ప్రెస్ రైళ్లను ప్రత్యామ్నాయ మార్గాల్లో నడపనున్నారు. ముంబాయి, హౌరా, ఢిల్లీ, కన్యాకుమారి, చెన్నై, త్రివేండ్రం, బెంగళూరు, మైసూర్ వైపు వెళ్లే రైళ్లు కొన్ని గుత్తి - ధర్మవరం మీదుగా, మరికొన్ని గూడూరు - పెరంబూరు మార్గాల్లో ప్రయాణిస్తాయి.

రేణిగుంట నుండి హజ్రత్ నిజాముద్దీన్ వెళ్లే దూద్ దొరంతో పాల రవాణా రైలును రేణిగుంట - ఎర్రగుంట్ల - నంద్యాల - గుంటూరు - విజయవాడ మార్గంలో మళ్లించారు. ఈ సుదీర్ఘ మరమ్మతుల దృష్ట్యా ప్రయాణికులు తమ ప్రయాణ ప్రణాళికలను సరిచూసుకుని, రైల్వే విచారణ కేంద్రం లేదా అధికారిక యాప్‌ల ద్వారా సమాచారం తెలుసుకుని ప్రయాణించాలని అధికారులు సూచించారు.