రైల్వే ప్రయాణికులకు అలర్ట్…. వికారాబాద్, షాద్‌నగర్‌లలో పలు రైళ్లకు తాత్కాలిక హాల్టింగ్!

కన్హా శాంతివనంలో జరగనున్న ఆధ్యాత్మిక సదస్సు నేపథ్యంలో పలు ఎక్స్‌ప్రెస్ రైళ్లకు వికారాబాద్, షాద్‌నగర్ స్టేషన్లలో తాత్కాలిక స్టాపేజ్ కేటాయిస్తూ దక్షిణ మధ్య రైల్వే నిర్ణయం తీసుకుంది. ఈ మేరకు ప్రకటన విడుదలైంది.

తెలుగు రాష్ట్రాల మీదుగా ప్రయాణించే రైల్వే ప్రయాణికులకు దక్షిణ మధ్య రైల్వే ముఖ్యమైన అప్డేట్ అందించింది. రంగారెడ్డి జిల్లా నందిగామ మండలంలోని కన్హా శాంతివనంలో సహజ్ మార్గ్ స్పిరిచువాలిటీ ఫౌండేషన్ ఆధ్వర్యంలో అంతర్జాతీయ ఆధ్యాత్మిక సదస్సు జరగనుంది. ఈ మహోత్సవానికి దేశవిదేశాల నుంచి వేలాదిమంది భక్తులు, ఆధ్యాత్మిక ప్రేమికులు తరలివచ్చే అవకాశం ఉంది. భక్తుల రద్దీని దృష్ట్యా వారి సౌకర్యార్థం వికారాబాద్, షాద్‌నగర్ రైల్వే స్టేషన్లలో పలు కీలక ఎక్స్‌ప్రెస్ రైళ్లకు తాత్కాలికంగా ఒక నిమిషం పాటు నిలుపుదల (హాల్టింగ్) కల్పిస్తున్నట్లు రైల్వే అధికారులు ఒక ప్రకటనలో వెల్లడించారు.

పలు రైళ్లకు తాత్కాలిక హాల్టింగ్!

వికారాబాద్ స్టేషన్‌లో ఆగనున్న రైళ్లు:

• సీఎస్‌టీ ముంబై - భువనేశ్వర్ కోణార్క్ ఎక్స్‌ప్రెస్ (రైలు నంబరు: 11019) : ఈ రైలు 2026 సెప్టెంబరు 24, 25 తేదీల్లో ప్రారంభమయ్యే సర్వీసులకు సంబంధించి వికారాబాద్ స్టేషన్‌కు అర్థరాత్రి దాటిన తర్వాత 01.56 గంటలకు చేరుకుని, 01.57 గంటలకు బయలుదేరుతుంది.
• రాజ్‌కోట్ - సికింద్రాబాద్ ఎక్స్‌ప్రెస్ (రైలు నంబరు: 22717): 2026 సెప్టెంబరు 24న రాజ్‌కోట్‌లో బయలుదేరే ఈ రైలు ఉదయం 05.09 గంటలకు వికారాబాద్ చేరుకుని, 05.10 గంటలకు బయలుదేరుతుంది.
• భువనేశ్వర్ - సీఎస్‌టీ ముంబై కోణార్క్ ఎక్స్‌ప్రెస్ (రైలు నంబరు: 11020) : ఈ రైలు 2026 సెప్టెంబరు 29, 30 తేదీల్లో గమ్యస్థానం నుంచి బయలుదేరి మధ్యాహ్నం 12.17 గంటలకు వికారాబాద్ చేరుకుని, 12.18 గంటలకు ప్రయాణమవుతుంది.
• సికింద్రాబాద్ - రాజ్‌కోట్ ఎక్స్‌ప్రెస్ (రైలు నంబరు: 22718) : 2026 సెప్టెంబరు 29న సికింద్రాబాద్‌లో ప్రారంభమయ్యే ఈ రైలు సాయంత్రం 16.17 గంటలకు వికారాబాద్ స్టేషన్‌కు చేరుకుని, 16.18 గంటలకు బయలుదేరుతుంది.

షాద్‌నగర్ స్టేషన్‌లో ఆగనున్న రైలు:

• అశోకాపురం - కాచిగూడ ఎక్స్‌ప్రెస్ (రైలు నంబరు: 12786) : 2026 సెప్టెంబరు 24, 25 తేదీల్లో ప్రయాణం ప్రారంభించే ఈ రైలు తెల్లవారుజామున 04.29 గంటలకు షాద్‌నగర్ స్టేషన్‌కు చేరుకుని, 04.30 గంటలకు బయలుదేరుతుంది.

కన్హా శాంతివనానికి వెళ్లే భక్తులు ఈ తాత్కాలిక సదుపాయాన్ని వినియోగించుకోవాలని అధికారులు సూచించారు. ప్రయాణికులు తమ ప్రయాణ ప్రణాళికను ఈ వేళలకు అనుగుణంగా సిద్ధం చేసుకోవాలని కోరారు.