సోషల్ మీడియా ఇన్‌ఫ్లుయెన్సర్లకు ప్రభుత్వం నుంచి డబ్బులు.. ఎంతమంది ఫాలోవర్స్ ఉండాలి?

ఆంధ్రప్రదేశ్‌ ప్రభుత్వం సోషల్ మీడియా ఇన్‌ఫ్లుయెన్సర్ల గుడ్‌న్యూస్ చెప్పింది. ప్రభుత్వం పథకాలను జనాల్లోకి తీసుకెళ్తే పారితోషికం అందించనుంది. అయితే దీనికి కొన్ని నియమాలు ఉంటాయి.

ఆంధ్రప్రదేశ్ ప్రభుత్వం ప్రజా సంక్షేమం, పారిశ్రామికాభివృద్ధిని సమతుల్యం చేస్తూ పలు కీలక నిర్ణయాలకు శ్రీకారం చుట్టింది. రాష్ట్ర మంత్రిమండలి సమావేశంలో సోషల్ మీడియా ఇన్‌ఫ్లుయెన్సర్ పాలసీకి గ్రీన్ సిగ్నల్ ఇచ్చింది. ప్రభుత్వ పథకాలను ప్రజలకు మరింత వేగంగా చేరవేయడం, పరిశ్రమల ద్వారా స్థానిక యువతకు ఉపాధి అవకాశాలు కల్పించడమే లక్ష్యంగా ఈ నిర్ణయాలు తీసుకున్నారు.

సోషల్ మీడియా ఇన్‌ఫ్లుయెన్సర్ పాలసీ

రాష్ట్ర ప్రభుత్వం అమలు చేస్తున్న పలు సంక్షేమ పథకాలు, అభివృద్ధి కార్యక్రమాలు క్షేత్రస్థాయిలోకి సమర్థవంతంగా చేరుకోవాలనే ఉద్దేశంతో డిజిటల్ మాధ్యమాలను వినియోగించుకోవాలని సర్కార్ భావించింది. అందులో భాగంగా సోషల్ మీడియాలో గుర్తింపు పొందిన ఇన్‌ఫ్లూయెన్సర్ల ద్వారా ప్రచారం నిర్వహించేందుకు ప్రత్యేక విధానాన్ని ఖరారు చేసింది.

ఈ విధానం కింద అర్హులైన, విశ్వసనీయమైన డిజిటల్ క్రియేటర్లను గుర్తించి పబ్లిక్ రిలేషన్స్ కేటగిరీ కింద ఎన్‌రోల్ చేస్తారు. ప్రతి క్రియేటర్ ఫాలోవర్ల సంఖ్య, వారు చేసే వీడియోల రీచ్ ఆధారంగా వివిధ విభాగాలుగా వర్గీకరించి పారితోషికం చెల్లిస్తారు. అయితే వారికి ఓ ఐడీ కార్డులాంటిది ఇచ్చే ఆలోచనలో కూడా ప్రభుత్వం ఉందని తెలుస్తోంది.

ఫాలోవర్ల సంఖ్య లక్షకుపైగా ఉంటే.. ప్రతీ వీడియోకి రూ. 15,000 ఇస్తారు.

50,000 నుండి 99,999 వరకు ఫాలోవర్లు ఉంటే.. రూ.7,500.

25,000 నుండి 49,999 వరకు ఫాలోవర్లు ఉంటే.. రూ.5,000.

10,000 నుండి 24,999 వరకు ఫాలోవర్లు ఉంటే రూ.2,500.

క్రియేటర్లు చేసే ప్రతి వీడియో ప్రచారానికి ప్రభుత్వం విధించిన నిర్దిష్ట నిబంధనలు, షరతులు వర్తిస్తాయి. దుర్వినియోగాన్ని అరికట్టేందుకు ఒక క్రియేటర్‌కు నెలకు గరిష్ఠంగా రూ.1.50 లక్షల మేరకే పరిమితి విధించారు. ప్రస్తుతం ఏపీ రాజకీయాల్లో డిజిటల్ వేదికలపై అధికార, ప్రతిపక్షాల మధ్య తీవ్ర స్థాయి పోటీ నెలకొంది. ఈ క్రమంలో ప్రతిపక్ష సోషల్ మీడియా దాడిని ఎదుర్కొంటూనే, ప్రభుత్వం వైపు నుండి సానుకూల దృక్పథాన్ని నిర్మించేందుకు కూటమి ప్రభుత్వం ఈ వ్యూహాన్ని ఎంచుకుంది.

మరోవైపు తీరప్రాంత అభివృద్ధిలో భాగంగా మచిలీపట్నంలో గోవా షిప్‌బిల్డింగ్ యూనిట్ నిర్మాణానికి క్యాబినెట్ ఆమోదం తెలిపింది. ఓడల నిర్మాణం, మరమ్మతుల రంగంలో ప్రతిష్టాత్మకమైన ఈ ప్రాజెక్టు ఏర్పాటు ద్వారా కృష్ణా జిల్లా వ్యాప్తంగా పారిశ్రామిక ప్రగతి వేగం పుంజుకోనుంది. ఈ పరిశ్రమ రాకతో ప్రత్యక్షంగా, పరోక్షంగా వేల సంఖ్యలో ఇంజనీరింగ్, సాంకేతిక మరియు నైపుణ్యం కలిగిన యువతకు ఉద్యోగావకాశాలు లభిస్తాయి.