కలియుగ వైకుంఠమైన తిరుమల దివ్యక్షేత్రంలో శ్రీ ఆండాళ్ (గోదాదేవి) అమ్మవారి తిరువాడిపురం శాత్తుమొరను పురస్కరించుకుని శుక్రవారం పురుశైవారి తోట ఉత్సవాన్ని అత్యంత వైభవంగా నిర్వహించారు. ప్రతిఏటా సాంప్రదాయబద్ధంగా జరిగే ఈ వేడుకలో తిరుమల తిరుపతి దేవస్థానం (టీటీడీ) అధికారులు, అర్చకులు, భక్తులు విశేషంగా పాల్గొన్నారు.
పురాణ విశేషాలు…
వైష్ణవ సాంప్రదాయం మరియు పురాణాల ప్రకారం, పాండ్య దేశంలో పరమ విష్ణుభక్తుడైన శ్రీ విష్ణుచిత్తుడు (పెరియాళ్వార్)కు చెందిన పవిత్ర తులసీవనంలో భూదేవి అంశగా శ్రీ ఆండాళ్ అమ్మవారు ఆవిర్భవించారు. అమ్మవారు ఆవిర్భవించిన ఈ పవిత్ర దివ్య సమయాన్ని పురస్కరించుకుని టీటీడీ ప్రతి సంవత్సరం తిరువాడిపురం శాత్తుమొర ఉత్సవాన్ని అత్యంత భక్తిశ్రద్ధలతో నిర్వహిస్తోంది.
శాస్త్రోక్తంగా పూజా కార్యక్రమాలు…
ఈ వేడుకల్లో భాగంగా శుక్రవారం ఉదయం టీటీడీ శ్రీశ్రీశ్రీ పెద్దజీయర్ స్వామి, శ్రీశ్రీశ్రీ చిన్నజీయర్ స్వామి ఆధ్వర్యంలో పురుశైవారి తోటలో శ్రీ ఆండాళ్ తిరువాడిపురం శాత్తుమొరను శాస్త్రోక్తంగా నిర్వహించారు. జీయర్ స్వాములు ప్రత్యేక ప్రార్థనలు చేసి అమ్మవారికి నివేదనలు సమర్పించారు.
సాయంత్రం వేళల్లో స్వామివారి ఊరేగింపు…
సాయంత్రం శ్రీవారి ఆలయంలో సహస్రదీపాలంకరణ సేవ పూర్తయిన అనంతరం, శ్రీదేవి, భూదేవి సమేతంగా శ్రీమలయప్పస్వామివారు పురుశైవారి తోటకు వేంచేసారు. అక్కడ స్వామి, అమ్మవార్లకు వివిద రకాల నైవేద్యాలు సమర్పించారు. అనంతరం స్వామి, అమ్మవార్లు ఊరేగింపుగా తిరిగి ఆలయానికి బయల్దేరారు.
మార్గమధ్యంలో ప్రత్యేక పూజలు…
ఊరేగింపు మార్గమధ్యంలో ఉన్న పవిత్ర పొగడ చెట్టు వద్ద స్వామివారికి విశేషంగా హారతి ఇచ్చి, పుష్పమాలలతో పాటు శఠారిని సమర్పించారు. అనంతరం శఠారికి పవిత్ర అభిషేకం నిర్వహించారు. ఈ ఆధ్యాత్మిక ఘట్టం పూర్తయిన తర్వాత, స్వామివారు మరియు అమ్మవార్లు ఆలయ మాడ వీధుల గుండా వైభవంగా ఊరేగుతూ తిరిగి శ్రీవారి ఆలయానికి చేరుకున్నారు.