Tirumala Navaratri Brahmotsavam 2026 Updates : కలియుగ ప్రత్యక్ష దైవం తిరుమల శ్రీవేంకటేశ్వరస్వామివారి నవరాత్రి బ్రహ్మోత్సవాలు అత్యంత వైభవంగా సాగుతున్నాయి. ఉత్సవాల్లో ఐదో రోజైన శుక్రవారం ఉదయం శ్రీ మలయప్పస్వామివారు జగన్మోహనాకారంలో మోహినీ అవతారాన్ని ధరించి భక్తులకు దివ్య దర్శనమిచ్చారు. సర్వాలంకార భూషితుడైన శ్రీవారి రూపాన్ని చూసి భక్తజనం మైమరిచిపోయారు. అదే సమయంలో, స్వామివారికి తోడుగా మరొక తిరుచ్చిపై శ్రీకృష్ణస్వామివారి అలంకారంలో మలయప్పస్వామి అభయం అందించారు.
మాడ వీధుల్లో భక్తి పారవశ్యం…..
కోలాహలంగా సాగిన ఈ పల్లకీసేవ ముందర గజరాజులు గంభీరంగా నడిచాయి. భక్తజన బృందాల శ్రావ్యమైన భజనలు, ఉత్సాహభరితమైన కోలాటాలు, జీయ్యంగార్ల వేద ఘోషలు, మంగళవాయిద్యాల దివ్య నాదాల నడుమ స్వామివారి ఊరేగింపు కన్నుల పండువగా సాగింది. తిరుమల మాడ వీధుల్లో అడుగడుగునా భక్తులు కర్పూర హారతులు పడుతూ స్వామివారిని దర్శించుకుని భక్తిపారవశ్యంలో మునిగితేలారు.
ఈ మోహినీ అవతారం వెనుక లోతైన ఆధ్యాత్మిక సందేశం ఉంది. జగత్తును ఆవహించిన మాయామోహాలకు అతీతంగా భగవంతుని నైజమైన తత్త్వాన్ని గ్రహించాలని ఈ అవతారం ప్రబోధిస్తుంది. సమస్త విశ్వం ఆ పరమాత్మ లీలా విలాసమేనని, ఆయన దివ్య అనుగ్రహం లభిస్తేనే మానవులు లౌకిక మాయలను అధిగమించి ఆధ్యాత్మిక ఉన్నతిని సాధించగలరని ఈ పూజ చాటిచెబుతోంది.
ఈ పవిత్ర కార్యక్రమంలో శ్రీశ్రీశ్రీ పెద్దజీయర్ స్వామి, శ్రీశ్రీశ్రీ చిన్నజీయర్ స్వామివార్లు పాల్గొని ఆధ్యాత్మిక శోభను ద్విగుణీకృతం చేశారు. టీటీడీ అధికారులలో ఈవో ముద్దాడ రవిచంద్ర, అదనపు ఈవో సీహెచ్ వెంకయ్య చౌదరి ఏర్పాట్లను పర్యవేక్షించారు. బోర్డు సభ్యులతో పాటు భక్తులు భారీ సంఖ్యలో ఈ వేడుకలో భాగమయ్యారు.