Tomato Price : మార్కెట్‌కు తగ్గిన టమాటా సరఫరా.. పెరిగిన ధర.. కేజీ ఎంత?

Tomato Price : పండుగ సీజన్‌కు ముందు ఆంధ్రప్రదేశ్‌లో టమాటా సరఫరా తగ్గడంతో ధరలు పెరిగాయి. దీంతో కొన్ని ప్రాంతాల్లో కిలో టమాటా రూ.50 వరకు అమ్ముతున్నారు.

అన్నమయ్య జిల్లాలోని మదనపల్లెలో ఉన్న అతిపెద్ద టమాటా మార్కెట్‌కు బుధవారం (సెప్టెంబర్ 30, 2026) సరకు రాక మరింత తగ్గడంతో రాయలసీమ జిల్లాల్లో టమాటా ధరలు పెరుగుతూనే ఉన్నాయి. మంగళవారం 88 టన్నుల టమాటాలు మార్కెట్‌కు రాగా బుధవారం కేవలం 62 టన్నులు మాత్రమే వచ్చాయని మదనపల్లె వ్యవసాయ మార్కెట్ కమిటీ తెలిపింది.

పెరిగిన టమాటా ధర

మొదటి రకం టమాటాలకు 10 కిలోలకు రూ.410 ధర పలకగా, రెండో రకానికి రూ.200 నుండి రూ.290 వరకు, చివరి రకానికి రూ.260 ధర నమోదైంది. సెప్టెంబర్ 29న మొదటి రకం టమాటాలు 10 కిలోలకు రూ.330కి, రెండో రకం రూ.250కి అమ్ముడయ్యాయి.

మదనపల్లె, కడప, తిరుపతి, కర్నూలు పరిసర ప్రాంతాల్లోని చిల్లర మార్కెట్లలో టమాటాలు కిలో రూ.45 నుండి రూ.50 చొప్పున విక్రయిస్తున్నారు. ఏటా సుమారు రూ.350 కోట్ల వ్యాపారం జరిగే మదనపల్లె మార్కెట్ యార్డ్‌లో సాధారణంగా గరిష్ట సీజన్‌లో రోజుకు 900 నుండి 1,300 టన్నుల సరుకు వస్తుంటుంది. అయితే ప్రస్తుతం సాగు ప్రాంతాల్లో ప్రతికూల వాతావరణ పరిస్థితులు, పండుగ సీజన్ కారణంగా కోతలు పెరగడం వంటి కారణాల వల్ల సరుకు రాక గణనీయంగా తగ్గింది.

ప్రతి వారం మదనపల్లె, పుంగనూరు నుండి తెలంగాణ, మహారాష్ట్ర, గుజరాత్, పశ్చిమ బెంగాల్, ఢిల్లీ, ఇతర రాష్ట్రాలకు వందల టన్నుల టమాటాలు రవాణా అవుతాయి. దసరా, దీపావళి, అయ్యప్ప దీక్షా కాలంలో ఇతర రాష్ట్రాల నుండి డిమాండ్ ఎక్కువగా ఉంటుందని, సరుకు రాక పెరగకపోతే స్థానిక ధరలు కిలోకు రూ.50 లేదా అంతకంటే ఎక్కువగానే ఉంటాయని వ్యాపారులు తెలిపారు.

టమాటా మార్కెట్ ధరలలో తీవ్రమైన హెచ్చుతగ్గులు ఉండటం సహజం. ఒక్కోసారి టమాటా ధరలు ఆకాన్నంటుతాయి. కొన్నిసార్లు పెట్టిన పెట్టుబడి కూడా రాకుండా పోతుంది. కొన్నిసార్లైతే అన్నదాతలు టమాటాలను రోడ్ల మీద పడేసి వెళ్లిన రోజులు కూడా ఉన్నాయి.

గతేడాదితో పోలిస్తే.. ప్రస్తుతం ఉన్న ధర లాభదాయకంగానే ఉందని రైతులు పేర్కొన్నారు. అయితే కమిషన్, రవాణా, వృథా ఖర్చులు పోను, చిల్లర విక్రయ ధర అయిన రూ.50లో పూర్తి వాటా తమకు దక్కడం లేదని చెబుతున్నారు.