మున్సిపల్ పోరులో జనసేన జోరు - విజయవాడ మేయర్ గా వంగవీటి రాధా భారీ విజయం

ఆంధ్రప్రదేశ్ పురపాలక ఎన్నికల ఫలితాల్లో అధికార ఎన్డీఏ కూటమి క్లీన్ స్వీప్ చేసింది. విజయవాడ మేయర్ స్థానాన్ని జనసేన అభ్యర్థి వంగవీటి రాధాకృష్ణ సొంతం చేసుకోగా… పోటీ చేసిన అన్ని స్థానాల్లో జనసేన విజయం సాధించినట్లు ఆ పార్టీ వర్గాలు తెలిపాయి.

ఆంధ్రప్రదేశ్ మున్సిపల్ ఎన్నికల్లో తెలుగుదేశం, జనసేన, బీజేపీలతో కూడిన అధికార ఎన్డీఏ కూటమి ప్రభంజనం సృష్టించింది. పట్టణ స్థానిక సంస్థల్లో అత్యధిక పీఠాలను దక్కించుకుని తిరుగులేని ఆధిపత్యాన్ని చాటుకుంది. ఇందులో భాగంగా జనసేన పార్టీ తమకు కేటాయించిన అన్ని మేయర్, మున్సిపల్ ఛైర్‌పర్సన్ స్థానాలను గెలుచుకుని 100 శాతం స్ట్రైక్ రేట్‌ను నమోదు చేసుకుంది.

విజయవాడ పీఠంపై జనసేన జెండా…

వంగవీటి రాధా

అత్యంత ఉత్కంఠ రేపిన విజయవాడ మున్సిపల్ కార్పొరేషన్ మేయర్ ఎన్నికల్లో జనసేన అభ్యర్థి వంగవీటి రాధాకృష్ణ రికార్డు స్థాయి మెజారిటీతో ఘనవిజయం సాధించారు. వైఎస్సార్ కాంగ్రెస్ పార్టీ అభ్యర్థి రాయన భాగ్యలక్ష్మిపై రాధాకృష్ణ 1,30,872 ఓట్ల భారీ వ్యత్యాసంతో విజయాన్ని అందుకున్నారు. పోలైన ఓట్లలో వంగవీటి రాధాకృష్ణకు 2,65,888 ఓట్లు రాగా, రాయన భాగ్యలక్ష్మికి 1,35,016 ఓట్లు దక్కాయి. స్వతంత్ర అభ్యర్థిగా పోటీ చేసిన మాజీ ఐపీఎస్ ఏబీ వెంకటేశ్వరరావు 11 వేలకుపైగా ఓట్లు దక్కాయి.

విజయవాడ కార్పొరేషన్‌లోని మొత్తం 86 డివిజన్లలో… కూటమి 72 డివిజన్లలో పాగా వేసింది. ఇందులో తెలుగుదేశం పార్టీ 53, జనసేన 19, బీజేపీ 4 డివిజన్లను కైవసం చేసుకున్నాయి. ప్రతిపక్ష వైఎస్సార్‌సీపీ 8 డివిజన్లకే పరిమితం కాగా… సీపీఐ(ఎం), ఒక స్వతంత్ర అభ్యర్థి తలో డివిజన్‌ను గెలుచుకున్నారు.

స్పష్టమైన తీర్పునిచ్చారు - వంగవీటి రాధా

ఈ ఘనవిజయంపై రాధాకృష్ణ స్పందిస్తూ…. విజయవాడ నగర అభివృద్ధికి ప్రజలు స్పష్టమైన తీర్పునిచ్చారని చెప్పారు. నిరంతరం కష్టపడి పనిచేసిన కూటమి నాయకులు, శ్రేణులకు విజయవాడ ఎంపీ కేశినేని చిన్ని ప్రత్యేక ధన్యవాదాలు తెలిపారు.

మరోవైపు రాష్ట్రంలో మొత్తం 13 మున్సిపల్ కార్పొరేషన్లకు గాను 12 కార్పొరేషన్లను ఎన్డీఏ కూటమి దక్కించుకోగా, వైఎస్సార్‌సీపీ కేవలం అనంతపురం కార్పొరేషన్‌కే పరిమితమైంది. ఎన్నికల తీర్పుతో రాష్ట్రంలోని అత్యధిక మున్సిపాలిటీలు, కార్పొరేషన్లపై ఎన్డీఏ కూటమి పూర్తి పట్టు సాధించగా… ప్రధాన ప్రతిపక్షం వైఎస్సార్‌సీపీ అనేక స్థానిక సంస్థల్లో తీవ్ర నిరాశకు గురైంది.