విద్యాసంస్థల్లో సినిమా ప్రమోషన్లు నిషేధం.. తెలంగాణ ప్రభుత్వం కీలక మార్గదర్శకాలు!

తెలంగాణలోని విద్యాసంస్థల్లో సినిమా ప్రమోషన్లు, ప్రైవేట్ కార్యక్రమాలను నిర్వహించకుండా నిషేధం విధించాలని ప్రభుత్వం ఆలోచనలు చేస్తోంది. ఇందుకోసం స్పష్టమైన మార్గదర్శకాలను రెడీ చేస్తోంది.

పాఠశాలలు, కళాశాలల ప్రాంగణాల్లో సినిమా ప్రమోషన్లు, ఇతర వ్యాపార ప్రకటనలు, రాజకీయ సంబంధిత కార్యక్రమాలపై సంపూర్ణ నిషేధం విధించాలని ప్రభుత్వం తీవ్రంగా ఆలోచిస్తోంది. ఇటీవలి కాలంలో విద్యాసంస్థల్లో అనుమతి లేకుండా నిర్వహించిన పలు కార్యక్రమాలు, ప్రమాదాలు, భద్రతా లోపాలు వివాదాస్పదంగా మారడంతో ప్రభుత్వం ఈ దిశగా అడుగులు వేస్తోంది.

సీఎం రేవంత్ రెడ్డి

కళాశాల ప్రాంగణాల్లో చట్టబద్ధంగా ఎలాంటి కార్యక్రమాలు నిర్వహించవచ్చు? దేనిపై నిషేధం విధించాలి? అనే అంశాలపై విద్యాశాఖ ఉన్నతాధికారులు క్షుణ్ణంగా పరిశీలిస్తున్నారు. విద్యార్థుల భద్రత, చదువుకు ఎలాంటి విఘాతం కలగకుండా తగిన నియమావళిని రూపొందించాలని ఉన్నతాధికారులను ప్రభుత్వం ఆదేశించింది.

ఇటీవల కొన్ని ప్రైవేటు విద్యాసంస్థలు సినిమా ప్రమోషన్ ఈవెంట్ల కోసం తరగతులను రద్దు చేసి, ఏకంగా సెలవు ప్రకటించడం తీవ్ర కలకలం రేపింది. అంతేకాకుండా విద్యార్థులు ఆయా సినిమాలను తప్పనిసరిగా చూడాలని సిఫార్సు చేయడం, కొన్ని ప్రైవేటు సంస్థలు తమ స్వార్థం కోసం విద్యార్థులను రాజకీయ లేదా ఇతర ప్రచార కార్యక్రమాలకు ఉపయోగించుకుంటున్నాయనే ఆరోపణలు వెల్లువెత్తాయి.

ఈ తరహా ధోరణులపై విద్యావేత్తలు, తల్లిదండ్రులు తీవ్ర నిరసన వ్యక్తం చేస్తున్నారు. విద్యాబుద్ధులు నేర్పించాల్సిన ప్రాంగణాలను వ్యాపార ప్రచార వేదికలుగా మార్చడంపై మండిపడుతున్నారు.

కేవలం చదువుకు విఘాతం కలగడమే కాకుండా, ఈవెంట్ల నిర్వహణలో తగిన జాగ్రత్తలు తీసుకోకపోవడం వల్ల విద్యార్థుల ప్రాణాలు గాలిలో కలవడం ఆందోళన కలిగిస్తోంది. ఇటీవల ఒక విద్యాసంస్థ ప్రాంగణంలో నిర్వహించిన కార్యక్రమంలో తాత్కాలికంగా ఏర్పాటు చేసిన వేదిక ఒక్కసారిగా కూలిపోయిన ఘటనలో ఒక విద్యార్థి దుర్మరణం చెందగా, పలువురు తీవ్రంగా గాయపడ్డారు. ఇటువంటి విషాదకర సంఘటనల నేపథ్యంలోనే ప్రభుత్వం కఠిన నిబంధనలు తీసుకురావడానికి నిశ్చయించుకుంది.

ప్రభుత్వం రూపొందిస్తున్న నూతన నిబంధనల ప్రకారం, విద్యాసంస్థలు భారీ ఎత్తున అకడమిక్, క్రీడా లేదా సాంస్కృతిక ఈవెంట్లను నిర్వహించాలనుకుంటే ముందస్తు అనుమతులు తప్పనిసరి కానున్నాయి. ఈవెంట్ నిర్వహణకు ముందే స్థానిక విద్యాశాఖ అధికారులకు, పోలీసులకు పూర్తి వివరాలు సమర్పించాలి. కార్యక్రమంలో పాల్గొనే అంచనా విద్యార్థుల సంఖ్య, స్టేజ్ నిర్మాణం నాణ్యత, ఎంట్రీ, ఎగ్జిట్ పాయింట్లు, జనసమీకరణ, ఫైర్ సేఫ్టీపై చర్యలపై ముందస్తు సమాచారం ఇవ్వాల్సి ఉంటుంది.

విద్యార్థుల్లోని నైపుణ్యాలు, క్రీడలు, కళాత్మక తాపత్రయాన్ని ప్రోత్సహించే చిన్న తరహా ఈవెంట్లకు.. అకడమిక్ సమయాన్ని వృథా చేసే భారీ వ్యాపార సమావేశాలకు మధ్య స్పష్టమైన తేడాను చూపిస్తూ నిబంధనలు సవరించనున్నారు.

విద్యార్థుల్లో నైపుణ్యాలు, ఆవిష్కరణలు, ఔత్సాహిక పారిశ్రామికవేత్తల సామర్థ్యాన్ని పెంచేందుకు ప్రభుత్వం గడిచిన మూడేళ్లలో అనేక కార్యక్రమాలను ప్రారంభించింది. కళలు, సంస్కృతిని ప్రోత్సహించేందుకు ప్రభుత్వం ఎల్లప్పుడూ సిద్ధంగా ఉందని అధికారులు స్పష్టం చేశారు. అయితే విద్యాసంస్థల పేరుతో నిర్దిష్ట సినిమాలను ప్రచారం చేయడం, అందుకోసం తరగతులు రద్దు చేసి సెలవులు ఇవ్వడం వంటి చర్యలను ఎంతమాత్రం సహించేది లేదని తేల్చిచెప్పారు.