E-Paper
బియ్యం ధరల నియంత్రణకు ప్రభుత్వం నిర్ణయం.. రకాల వారీగా గరిష్ఠ ధరలు ఫిక్స్!
Telangana Rice Prices : తెలంగాణలో బియ్యం ధరల నియంత్రణకు ప్రభుత్వం కీలక నిర్ణయం తీసుకుంది. రకాల వారీగా గరిష్ఠ ధరలు ఖరారు చేసింది.
Prefer HTon Google
ఎల్‌నినో ప్రభావంతో పెరిగిన నిత్యావసరాల ధరలకు అడ్డుకట్ట వేసేందుకు తెలంగాణ ప్రభుత్వం రంగంలోకి దిగింది. రాష్ట్రంలో బియ్యం ధరలను నియంత్రిస్తూ పౌరసరఫరాల శాఖ రకాల వారీగా ఎమ్మార్పీ ధరలను ఖరారు చేసింది. రాష్ట్రవ్యాప్తంగా నెలకొన్న వర్షాభావ పరిస్థితుల కారణంగా మార్కెట్‌లో బియ్యం ధరలు ఆకాశాన్ని తాకుతున్న నేపథ్యంలో తెలంగాణ ప్రభుత్వం వినియోగదారులకు ఊరట కలిగించేందుకు కీలక చర్యలు చేపట్టింది.
విచ్చలవిడిగా పెరిగిన బియ్యం ధరలను అదుపులోకి తెచ్చేందుకు రకాలను బట్టి కిలో బియ్యం రూ. 66 నుండి రూ. 79 వరకు మాత్రమే విక్రయించాలని పౌరసరఫరాల శాఖ స్పష్టమైన మార్గదర్శకాలు జారీ చేసింది. కృత్రిమ కొరత సృష్టించి ఎక్కువ ధరలకు విక్రయించే రైస్ మిల్లర్లు, వ్యాపారులపై కఠిన చర్యలు తప్పవని ప్రభుత్వం హెచ్చరించింది.
రకాల వారీగా నిశ్చయించిన గరిష్ఠ బియ్యం ధరలు(MRP per Kg)ప్రజా ప్రయోజనాలను దృష్టిలో ఉంచుకొని పౌరసరఫరాల శాఖ బియ్యం రకాలను బట్టి గరిష్ఠ విక్రయ ధరలను నిర్ధారించారు. బీపీటీ/కేఎన్ఎం రకాలు రూ.66, ఆర్ఎన్ఆర్/ తెలంగాణ సోనా రూ.74, హెచ్ఎంటీ/జేఎస్ఆర్ రకాలు రూ.79గా నిర్ణయించారు.
రాష్ట్రంలో బియ్యం కొరత ఉందంటూ వస్తున్న వార్తలు పూర్తి అసత్యమని తెలంగాణ చీఫ్ రేషనింగ్ ఆఫీసర్ జి.వి. శ్యామ్ ప్రసాద్ లాల్ వెల్లడించారు. వినియోగదారుల నుంచి అధిక ధరలు వసూలు చేసినా, నిల్వలను దాచిపెట్టి కృత్రిమ కొరత సృష్టించినా ఉపేక్షించేది లేదని తేల్చిచెప్పారు. దళారులు, బ్లాక్ మార్కెటీర్లపై పౌరసరఫరాల శాఖ ప్రత్యేక నిఘా ఏర్పాటు చేసింది.
పదేపదే నిబంధనలను ఉల్లంఘిస్తూ అక్రమాలకు పాల్పడే వ్యాపారులపై పీడీ యాక్ట్ నమోదు చేస్తామని అధికారులు స్పష్టం చేశారు. 25 కిలోల సంచిపై 26 కిలోల స్టిక్కర్ వేయడం లేదా వ్యాపారులు నకిలీ ఎంఆర్‌పీ స్టిక్కర్లతో అధిక ధరలకు బియ్యం అమ్మడం చట్టరీత్యా నేరమని, అటువంటి వారిపై క్రిమినల్ కేసులు నమోదు చేస్తామని హెచ్చరించారు.
మార్కెట్‌లో దళారుల ప్రమేయాన్ని తగ్గించి ధరలను అదుపులో ఉంచేందుకు ప్రభుత్వం సరికొత్త విధానాన్ని అమలు చేస్తోంది. రైస్ మిల్లర్ల నుంచి నేరుగా రిటైల్ వ్యాపారులకే బియ్యం సరఫరా అయ్యేలా చర్యలు చేపట్టింది. దీనివల్ల మధ్యవర్తుల కమీషన్ తగ్గి వినియోగదారులకు నిర్దేశించిన ప్రభుత్వ ధరలకే బియ్యం లభిస్తాయి.
సరిగ్గా అమలు జరుగుతున్నాయో లేదో పరిశీలించేందుకు పౌరసరఫరాల శాఖ ఆధ్వర్యంలో ప్రత్యేక తనిఖీ బృందాలు రాష్ట్రవ్యాప్తంగా సోదాలు నిర్వహించనున్నాయి. మార్కెట్‌లో ఏ వ్యాపారి అయినా ప్రభుత్వం నిర్ణయించిన ధరల కంటే ఎక్కువకి బియ్యం విక్రయిస్తున్నా, లేదా తూకాల్లో మోసాలకు పాల్పడినా వినియోగదారులు వెంటనే పౌరసరఫరాల శాఖ అధికారులకు ఫిర్యాదు చేయాలని చీఫ్ రేషనింగ్ ఆఫీసర్ శ్యామ్ ప్రసాద్ లాల్ ప్రజలకు విజ్ఞప్తి చేశారు.
