Chiranjeevi: 48 ఏళ్ల సినీ ప్రయాణం..విజయాలకంటే అదే గొప్పది..చిరంజీవి అనేది నాకు దక్కిన గుర్తింపు: చిరంజీవి ఎమోషనల్ ట్వీట్

Chiranjeevi: మెగాస్టార్ చిరంజీవి.. పరిచయం అక్కర్లేని పేరు. సామాన్యుడి నుంచి స్టార్ గా ఎదిగిన వ్యక్తి ఆయన. ఆయన కేవలం వ్యక్తి మాత్రమే కాదు అభిమానుల గుండెల్లో కొలువైన దేవుడు. కొణిదెల శివ శంకర వరప్రసాద్.. చిరంజీవిగా మారడానికి అడుగుపడ్డ రోజు ఇదే.

Chiranjeevi: సినీ ఇండస్ట్రీలో ఎంతో మంది స్టార్లు ఉన్నారు. ఎంతో మంది వస్తారు, పోతారు. కానీ.. సినీ ఇండస్ట్రీకే స్పెషల్ క్రేజ్ తెచ్చేవాళ్లు, ప్రత్యేక ఆకర్షణగా నిలిచే వాళ్లు కొంతమంది మాత్రమే ఉంటారు. అలాంటి వాళ్లలో మన మెగాస్టార్ చిరంజీవి టాప్ లో ఉంటారు. ఆయన సినీ కెరీర్ ఇప్పటిది కాదు.

48 ఏళ్ల సినీ ప్రయాణం..విజయాలకంటే అదే గొప్పది..చిరంజీవి అనేది నాకు దక్కిన గుర్తింపు: చిరంజీవి ఎమోషనల్ ట్వీట్ (x/KChiruTweets)

చిరంజీవి 48 ఏళ్లు

చిరంజీవి అంటే కేవలం హీరో మాత్రమే కాదు. ఆయన ఓ శక్తి. కోట్లాది మంది అభిమానులను తన డ్యాన్స్, యాక్టింగ్ తో ఉర్రూతలూగించే సమ్మోహన శక్తి ఆయన. తన ఉనికితోనే శాసించే పవరే ఆయన. సరిగ్గా ఇదే రోజున (సెప్టెంబర్ 22) 1978లో చిరంజీవి సినీ కెరీర్ ప్రారంభమైంది. ప్రాణం ఖరీదు మూవీ రిలీజైంది. ఈ సందర్భంగా చిరంజీవి చేసిన ఎమోషనల్ ట్వీట్ వైరల్ గా మారింది.

ఎన్నో విజయాలు చూశా

‘‘22 సెప్టెంబర్ 1978.. ఆ రోజు మొదలైన నా సినీ ప్రయాణం నేటితో 48 వసంతాలు పూర్తి చేసుకుంది. ఈ 48 ఏళ్లలో ఎన్నో పాత్రలు పోషించాను. ఎన్నో విజయాలను చూశాను. ఎన్నో అవార్డులు, గౌరవాలు అందుకున్నాను’’ అని చిరంజీవి తన ఎక్స్ పోస్టులో పేర్కొన్నారు.

వాళ్లందరికీ ధన్యవాదాలు

‘‘ఈ సుదీర్ఘ ప్రయాణంలో నన్ను నమ్మి అవకాశాలు ఇచ్చిన ప్రతి నిర్మాతకు, నాలోని నటుడిని కొత్త కొత్త కోణాల్లో ఆవిష్కరించిన ప్రతి దర్శకుడికి, నా ప్రతి సినిమా వెనుక అహర్నిశలు శ్రమించిన నటీనటులకు, సాంకేతిక నిపుణులకు, ప్రతి ఒక్కరికీ నా హృదయపూర్వక కృతజ్ఞతలు. మీ అందరి సహకారమే నన్ను ఈరోజు ఈ స్థాయిలో నిలబెట్టింది’’ అని చిరంజీవి తన గ్రాటిట్యూడ్ ను చాటుకున్నారు.

అదే గొప్పది

‘‘అయితే ఆ విజయాలన్నింటికంటే గొప్పది.. మీరు నాపై చూపించిన ప్రేమ. ఆ గౌరవాలన్నింటికంటే విలువైనది.. మీ హృదయాల్లో నాకు ఇచ్చిన స్థానం. నన్ను మీ కుటుంబ సభ్యుడిగా భావించి, ఇంతటి అపూర్వమైన ప్రేమాభిమానాలను అందించిన ప్రతి ఒక్క అభిమానికి నా హృదయపూర్వక ధన్యవాదాలు’’ అని చిరంజీవి పేర్కొన్నారు.

అది నా గుర్తింపు

‘‘ఆ రోజు ‘చిరంజీవి’ అనేది నేను పెట్టుకున్న పేరు. నేడు మీ ప్రేమతో అది నాకు దక్కిన శాశ్వతమైన గుర్తింపు. మీ ప్రేమకు, అభిమానానికి ఎప్పటికీ కృతజ్ఞతలతో.. మీ చిరంజీవి’’ అని మెగాస్టార్ తన పోస్టును ముగించారు.

సినిమా కెరీర్ లో 48 వసంతాలు పూర్తి చేసుకున్న సందర్భంగా చిరంజీవి పెట్టిన ఈ ఎమోషనల్ పోస్టు సోషల్ మీడియాలో తెగ వైరల్ గా మారింది. చిరు గొప్పతనాన్ని చెప్తూ ఫ్యాన్స్ కామెంట్లు చేస్తున్నారు.