కాంతార ఛాప్టర్ 1 అందుకే ఇంత త్వరగా ఓటీటీలోకి.. థియేటర్లలోనూ ఆడుతుంది.. ఆ ఒప్పందం వల్లే ఇలా: నిర్మాత క్లారిటీ

కాంతార ఛాప్టర్ 1 ఊహించిన దాని కంటే చాలా త్వరగానే ఓటీటీలోకి రానుండటంపై మూవీ ప్రొడ్యూసర్లలో ఒకరైన చలువే గౌడ క్లారిటీ ఇచ్చారు. ఓటీటీలోకి వచ్చినా థియేటర్లలో ఆడుతుందని, హిందీ వెర్షన్ ఇప్పుడు రావడం లేదని స్పష్టం చేశాడు.

కాంతార ఛాప్టర్ 1 ఇప్పటికే బాక్సాఫీస్ దగ్గర రూ.800 కోట్లకుపైగా వసూలు చేసి ఈ ఏడాది అత్యధిక వసూళ్ల ఇండియన్ మూవీగా నిలిచింది. అయితే నాలుగు వారాలు కూడా కాకుండానే ఈ సినిమాను అక్టోబర్ 31 నుంచి ప్రైమ్ వీడియో స్ట్రీమింగ్ చేయనుంది. దీనిపై ప్రేక్షకులు ఆశ్చర్యం వ్యక్తం చేశారు. అంత అవసరం ఏంటన్న విమర్శల మధ్య ప్రొడ్యూసర్ చలువే గౌడ క్లారిటీ ఇచ్చారు.

ఆ ఒప్పందం వల్లే ఇలా..

కాంతార ఛాప్టర్ 1 అందుకే ఇంత త్వరగా ఓటీటీలోకి.. థియేటర్లలోనూ ఆడుతుంది.. ఆ ఒప్పందం వల్లే ఇలా: నిర్మాత క్లారిటీ

'కాంతార ఛాప్టర్ 1' మూవీ నిర్మాత చలువే గౌడ ఇండియా టుడేతో ప్రత్యేకంగా మాట్లాడాడు. ఈ సందర్భంగా సినిమాను చాలా త్వరగా ఓటీటీలోకి తీసుకువస్తుండటంపై స్పందించాడు. చలువే గౌడ మాట్లాడుతూ.. "ప్రస్తుతం సినిమా దక్షిణాది భాషల (తమిళం, కన్నడ, తెలుగు, మలయాళం) వెర్షన్లు మాత్రమే ఓటీటీలో విడుదల అవుతాయి. హిందీ వెర్షన్ కాదు.

హిందీ వెర్షన్ ఎనిమిది వారాల తర్వాత వస్తుంది. ఈ విడుదల విండోకు సంబంధించిన ఒప్పందం వాస్తవానికి మూడేళ్ల కిందటే జరిగింది. కాబట్టి ఇది మా వైపు నుంచి ఒక బాధ్యత మాత్రమే. అప్పట్లో ఈ ఒప్పంద పద్ధతులు భిన్నంగా ఉండేవి" అని అన్నాడు.

ఓటీటీ విండోలో మార్పులు

దక్షిణాది సినిమాల్లో ఇప్పుడు తక్కువ ఓటీటీ విండోలు సర్వసాధారణంగా మారాయని చలువే గౌడ అన్నాడు. "చాలా దక్షిణాది సినిమాలు ఇప్పుడు నాలుగు వారాల విండోను అనుసరిస్తున్నాయి. కొన్ని ఎక్కువ కాలం నడుస్తాయి. మరికొన్ని మూడు నుండి నాలుగు వారాలలో ముగుస్తాయి. ప్రతి సినిమాకు దాని సొంత ఒప్పందం, టైమ్‌లైన్ ఉంటుంది.

కోవిడ్‌కు ముందు అన్ని సినిమాలకు ఎనిమిది వారాలు ఉండేది. కోవిడ్ తర్వాత కూలీ వంటి పెద్ద సినిమాలు కూడా అన్ని భాషల్లో.. హిందీతో సహా నాలుగు వారాల తర్వాత ఓటీటీలోకి వస్తున్నాయి. కాబట్టి ఆ సమయంలో ఏది పనిచేస్తుందో దాని ఆధారంగా ఎప్పటికప్పుడు నిర్ణయం తీసుకుంటారు" అని వివరించాడు.

థియేటర్లలో రన్ కొనసాగుతుంది

రిషబ్ శెట్టి డైరెక్ట్ చేసి లీడ్ రోల్లో నటించిన మూవీ కాంతార ఛాప్టర్ 1. ఈ సినిమా అక్టోబర్ 2న థియేటర్లలో రిలీజైంది. అయితే నెల రోజులు కూడా గడవక ముందే అక్టోబర్ 31 నుంచి ప్రైమ్ వీడియోలో స్ట్రీమింగ్ కానుంది. తెలుగుతోపాటు కన్నడ, తమిళం, మలయాళం భాషల్లో ఈ సినిమా చూడొచ్చు.