E-Paper
Husharu 2 Teaser: యాక్షన్, కామెడీతో హుషారు 2 టీజర్- నక్సల్ నాయకుడిగా ఆర్ నారాయణమూర్తి సర్‌ప్రైజ్- ఈసారి టేకిలా బిజినెస్!
Husharu 2 Teaser Released: 2018 నాటి బ్లాక్‌బస్టర్ యూత్ ఎంటర్‌టైనర్ 'హుషారు'కు సీక్వెల్‌గా వస్తున్న 'హుషారు 2' టీజర్‌ను చిత్రబృందం తాజాగా విడుదల చేసింది. టేకిలా డిస్టిలరీ వ్యాపారం చుట్టూ తిరిగే కథతో, ఊహించని ట్విస్టులు, కామెడీ అడ్వెంచర్‌తో ఈ సినిమా ప్రేక్షకులను అలరించడానికి సిద్ధమైంది.
Prefer HTon Google
Husharu 2 Movie Teaser Released: తెలుగు తెరపై యూత్‌ఫుల్ ఎంటర్‌టైనర్ల ట్రెండ్‌ను సరికొత్తగా మలిచిన చిత్రాల్లో 2018లో వచ్చిన 'హుషారు' ఒకటి. బాక్సాఫీస్ దగ్గర మంచి విజయాన్ని సాధించిన ఈ సినిమా, యువతకు బాగా కనెక్ట్ అయింది. ఇప్పుడు అదే జోష్‌తో, మరింత వినోదాన్ని పంచుతూ 'హుషారు 2' ప్రేక్షకుల ముందుకు రానుంది.
హుషారు 2 టీజర్ రిలీజ్
రచయిత, దర్శకుడు శ్రీహర్ష కొనుగంటి హుషారు 2 సినిమాను డైరెక్ట్ చేశారు. తాజాగా హుషారు 2 సినిమా టీజర్‌ను మేకర్స్ ఇవాళ (అక్టోబర్ 27) విడుదల చేశారు. వినోదం, ఊహించని మలుపులు, అడ్వెంచర్‌తో నిండిన ఈ హుషారు 2 టీజర్ సోషల్ మీడియాలో బాగా ట్రెండ్ అవుతోంది.
‘‘ప్రతీ గడపకు ఓ క‌థ ఉంటుందంటారు.. కానీ ఈ చిత్ర‌గుంజ్‌లో ప్రతీ గడపకు ఒకే క‌థ... అంద‌రి ఇంటి పేరు ఒక్క‌టే భ‌యం. ఒక వైపు ర‌క్తంతో రాజ్యాన్ని ప‌రిపాలించే రాక్ష‌సుడు..మ‌రోవైపు అడవిలో క్రూరంగా వేటాడే సాయుధులు వీళ్ల మ‌ధ్య‌లో న‌లిగి పోతున్న ప్ర‌జ‌లు ఒక నాయ‌కుడి కోసం ఎదురు చూస్తున్నారు.. ఎవ‌రా నాయ‌కుడు’’ అనే ప‌వ‌ర్‌ఫుల్ డైలాగ్‌తో ‘హుషారు 2’ టీజర్ స్టార్ట్ అయింది.
అడవిలో అరుపులు సీజన్ 2
ఎంట‌ర్‌టైన‌ర్‌గా రూపొందిన హుషారుకు సీక్వెల్ ఇంత యాక్షన్ మోడ్‌లో రాబోతుందా! అనే డౌట్ అంద‌రికి వ‌చ్చేసే లోపే.. ‘అరే చంద్ర‌మోహ‌న్ ఆపు.. నీ స్టోరీకి, ఎమోష‌న్స్‌కి ఏమైనా సంబంధం ఉందా టోట‌ల్ డిస్‌క‌నెక్ట్?’ అని రాహుల్ రామ‌కృష్ణ గ‌ట్టిగా అర‌వ‌టంతో మొత్తం సీన్ మారిపోయింది.
బాయ్స్ ఆర్ బ్యాక్ అనే క్యాప్ష‌న్‌తో సినిమా షూటింగ్ లొకేష‌న్‌లో సీన్ మొద‌ల‌వుతుంది. అడవిలో అరుపులు సీజన్ 2 అనే సినిమాను చేస్తున్న‌ట్లు చూపించారు. రాహుల్ రామ‌కృష్ణ త‌న న‌లుగురు బాయ్స్‌తో క‌లిసి ఓ క్రేజీ ఐడియాను నిజం చేసుకోవ‌టం కోసం చిత్ర‌గుంజ్‌కు చేరుకుంటాడు.
సర్‌ప్రైజ్ చేసిన ఆర్ నారాయణమూర్తి
అక్క‌డ నుంచి క‌థ ఎన్నో మలుపులు తిరుగుతుంది. ఓ వైపు విలన్స్.. మ‌న క్రేజీ కుర్రాళ్ల గ్యాంగ్‌ను చంప‌టానికి ప్ర‌య‌త్నాలు చేస్తుంటారు. వీళ్లేమో త‌ప్పించుకుని పారిపోతుంటారు. చివ‌ర‌కు వాళ్లు న‌క్స‌లైట్స్ చేతికి చిక్కుతారు. అక్క‌డ న‌క్స‌ల్స్ నాయ‌కుడు పాత్ర‌లో పీపుల్స్ స్టార్ ఆర్. నారాయణమూర్తి పాత్ర‌ను ప‌రిచ‌యం చేసి సర్‌ప్రైజ్ ఇచ్చారు మేకర్స్.
‘త‌మ్ముళ్లు వేట మొద‌లెడ‌దామా!’ అనే ఆయన ప‌వ‌ర్‌ఫుల్ డైలాగ్‌తో టీజర్ ముగిసింది. టీజర్ చూస్తుంటే హుషారు 2లో కావాల్సినంత ఎంటర్టైన్మెంట్, యాక్షన్ పార్ట్ కూడా ఉండ‌బోతుంద‌నేది తెలుస్తుంది. ఇంత‌కీ విలన్స్ మ‌న హీరో బ్యాచ్‌ను ఎందుకు చంపాల‌నుకుంటారు? అనే విష‌యం తెలియాలంటే మాత్రం సినిమా చూడాల్సిందేనంటున్నారు మేకర్స్.
ఈసారి టేకిలా
అయితే, హుషారు సినిమాలో కబూమ్ అనే బీర్ తయారుచేస్తే హుషారు 2లో టేకిలాను రెడీ చేయడం ఇంట్రెస్టింగ్‌గా ఉంది. రెట్టింపు ఫన్, మ్యాడ్‌నెస్, నాన్‌స్టాప్ యూత్‌ఫుల్ ఎంటర్‌టైన్‌మెంట్‌తో ‘హుషారు 2’ మ‌న ముందుకు రానుందీ చిత్రం.
ప్రస్తుతం పోస్ట్ ప్రొడ‌క్ష‌న్ కార్య‌క్ర‌మాలు శ‌ర‌వేగంగా జ‌రుగుతున్నాయి. త్వ‌ర‌లోనే ఈ సినిమాను రిలీజ్ చేయ‌టానికి మేకర్స్ స‌న్నాహాలు చేస్తున్నారు. ఇక హుషారు 2లో రాహుల్ రామ‌కృష్ణ, అశోక్ గ‌ల్లా, ర‌వి అంథోని, దినేష్ తేజ్‌, శ‌శిధ‌ర్ కోచ‌ర్ల‌కోట, విధి యాద‌వ్‌, అభిజ్ఞ ఉతులూరు, భ‌గ‌వాన్ తివారి, జతిన్ గోసామి, ర‌జ‌య్ రోవన్ త‌దిత‌రులు నటించారు.
