దిగ్గజ నటుడు, దర్శకుడు శ్రీనివాసన్ కన్నుమూత- విషాదంలో సినీ లోకం- హీరో ధ్యాన్ శ్రీనివాసన్ తండ్రి ప్రస్థానం ఇదే!

మలయాళ వెండితెర దిగ్గజం, విలక్షణ నటుడు, దర్శకుడు శ్రీనివాసన్ (69) శనివారం (డిసెంబర్ 20) ఉదయం కన్నుమూశారు. గత కొంతకాలంగా అనారోగ్యంతో బాధపడుతున్న ఆయన కొచ్చిలోని ప్రైవేట్ ఆసుపత్రిలో చికిత్స పొందుతూ ఇవాళ తుదిశ్వాస విడిచారు. దీంతో మలయాళ చిత్ర పరిశ్రమ తీవ్ర దిగ్భ్రాంతికి లోనయింది.

మలయాళ చిత్ర పరిశ్రమలో విషాదం నెలకొంది. దిగ్గజ నటుడు, డైరెక్టర్, బహుముఖ ప్రజ్ఞాశాలి శ్రీనివాసన్ శనివారం (డిసెంబర్ 20) ఉదయం కొచ్చిలోని ఒక ప్రైవేట్ ఆసుపత్రిలో కన్నుమూశారు.

దిగ్గజ నటుడు, దర్శకుడు శ్రీనివాసన్ కన్నుమూత- విషాదంలో సినీ లోకం- హీరో ధ్యాన్ శ్రీనివాసన్ తండ్రి ప్రస్థానం ఇదే!

గత కొంతకాలంగా అనారోగ్యంతో బాధపడుతున్న ఆయన, పరిస్థితి విషమించడంతో మరణించినట్లు సినీ వర్గాలు వెల్లడించాయి. శుక్రవారం రాత్రి త్రిప్పుణితురలోని ఆసుపత్రిలో చేరిన శ్రీనివాసన్ శనివారం ఉదయం తుదిశ్వాస విడిచారు.

సామాన్యుడి గొంతుకగా శ్రీనివాసన్

కన్నూరుకు చెందిన శ్రీనివాసన్ గత కొన్నేళ్లుగా కొచ్చిలోనే నివసించారు. కేవలం నటుడిగానే కాకుండా దర్శకుడిగా, స్క్రీన్ ప్లే రచయితగా, డబ్బింగ్ ఆర్టిస్ట్‌గా, నిర్మాతగా మలయాళ సినిమా గమనాన్ని మార్చిన వ్యక్తిగా ఆయనకు పేరుంది.

మధ్యతరగతి ప్రజల కష్టాలను, సామాజిక వైరుధ్యాలను తన సినిమాల్లో ఎంతో సహజంగా, వ్యంగ్యంగా చూపించడం శ్రీనివాసన్ శైలి. శ్రీనివాసన్‌కు ఇద్దరు కుమారులు వినీత్ శ్రీనివాసన్, ధ్యాన్ శ్రీనివాసన్ కూడా సినీ రంగంలోనే రాణిస్తున్నారు. ధ్యాన్ శ్రీనివాసన్‌కు మాలీవుడ్‌లో హీరోగా సూపర్ క్రేజ్ ఉంది.

అపురూపమైన సినీ ప్రస్థానం

1976లో ‘మణిముజక్కమ్’ చిత్రంతో సినీ అరంగేట్రం చేసిన శ్రీనివాసన్ దాదాపు 200కు పైగా సినిమాల్లో నటించారు. చెన్నైలోని ఫిల్మ్ ఇన్‌స్టిట్యూట్‌లో శిక్షణ పొందిన ఆయన 1979లో వచ్చిన ‘సంఘగానం’తో హీరోగా మారారు. 80, 90వ దశకాల్లో మలయాళం చూసిన ఎన్నో క్లాసిక్ సినిమాలకు ఆయనే కర్త, కర్మ, క్రియ.

అవార్డుల పంట.. అరుదైన గుర్తింపు

దర్శకుడిగా కూడా శ్రీనివాసన్ తిరుగులేని గుర్తింపు తెచ్చుకున్నారు. ఆయన రాసి, దర్శకత్వం వహించిన 'వడక్కునొక్కియంత్రం' (1989) ఉత్తమ చిత్రంగా కేరళ రాష్ట్ర అవార్డును గెలుచుకుంది. అలాగే 'చింతవిష్టయాయ శ్యామల' (1998) సినిమాకు సామాజిక అంశాల విభాగంలో జాతీయ ఉత్తమ చిత్ర పురస్కారం లభించింది. స్క్రీన్ ప్లే రచయితగా శ్రీనివాసన్ రెండుసార్లు కేరళ రాష్ట్ర అవార్డులు అందుకున్నారు.

శ్రీనివాసన్ మృతి పట్ల కేరళ ముఖ్యమంత్రి, ఇతర మంత్రులు, దక్షిణాది సినీ ప్రముఖులు తీవ్ర సంతాపం వ్యక్తం చేస్తున్నారు. ఒక సాధారణ నటుడిలా కాకుండా, వ్యవస్థలోని లోపాలను వేలెత్తి చూపే ఒక సామాజిక విమర్శకుడిని తాము కోల్పోయామని అభిమానులు ఆవేదన వ్యక్తం చేస్తున్నారు.