E-Paper
Netflix OTT: ఓటీటీ రారాజుగా నెట్ఫ్లిక్స్- పదేళ్లలో 11 లక్షల 34 వేల కోట్ల పెట్టుబడులు- 32.5 కోట్ల పెయిడ్ సబ్స్క్రైబర్స్
Netflix OTT Investment In 10 Years: గ్లోబల్ ఓటీటీ దిగ్గజం నెట్ఫ్లిక్స్ వినోద రంగంలో సరికొత్త మైలురాళ్లను అధిగమించింది. గత పదేళ్ల కాలంలో సినిమాలు, ఓటీటీ సిరీస్ల కోసం ఏకంగా 135 బిలియన్ డాలర్ల భారీ పెట్టుబడులు పెట్టడమే కాకుండా ప్రపంచవ్యాప్తంగా లక్షలాది ఉద్యోగాలను సృష్టించినట్లు సంస్థ వెల్లడించింది.
Netflix OTT Investment In 10 Years: ప్రపంచవ్యాప్తంగా వినోద రంగాన్ని శాసిస్తున్న ఓటీటీ దిగ్గజం నెట్ఫ్లిక్స్ తన పదేళ్ల ప్రస్థానానికి సంబంధించిన ఆసక్తికర నివేదికను విడుదల చేసింది. గత దశాబ్ద కాలంలో సినిమాలు, వెబ్ సిరీస్ల నిర్మాణంలో ఏకంగా 135 బిలియన్ డాలర్లకు పైగా పెట్టుబడులు పెట్టినట్లు సంస్థ ప్రకటించింది.
కేవలం వినోదాన్ని అందించడమే కాకుండా అంతర్జాతీయ ఆర్థిక వ్యవస్థను సైతం ఈ సంస్థ ఎంతగానో ప్రభావితం చేస్తోంది. భారతదేశంలో, ప్రత్యేకించి తెలుగు రాష్ట్రాల్లో కూడా ఈ ఓటీటీ ప్రభావం స్పష్టంగా కనిపిస్తోంది. ఒకప్పుడు థియేటర్లకే పరిమితమైన ప్రాంతీయ సినిమాలు ఇప్పుడు ఈ ఓటీటీ స్ట్రీమింగ్ వేదికల ద్వారా ప్రపంచవ్యాప్త గుర్తింపు తెచ్చుకుంటున్నాయి.
లక్షలాది ఉద్యోగాలు.. గ్లోబల్ ఎకానమీకి బూస్ట్
గత పదేళ్ల కాలంలో నెట్ఫ్లిక్స్ అంతర్జాతీయ ఆర్థిక వ్యవస్థకు 325 బిలియన్ డాలర్ల (రూ. 11,34,000 కోట్లు- పదకొండు లక్షల ముప్పై నాలుగు వేల కోట్ల రూపాయలు) కంటే ఎక్కువ కాంట్రిబ్యూషన్ అందించింది. వివిధ దేశాల్లో షూటింగులు, నిర్మాణ రంగ పనుల ద్వారా సుమారు 4,25,000 ఉద్యోగాలను సృష్టించింది. కాలిఫోర్నియాలోని లాస్ గాటోస్ ప్రధాన కేంద్రంగా పనిచేస్తున్న ఈ సంస్థకు 2025 ముగిసే సమయానికి ప్రపంచవ్యాప్తంగా 32.5 కోట్లు (325 మిలియన్లు) మంది పెయిడ్ సబ్స్క్రైబర్లు ఉన్నారు.
"ఈ రోజు మేము 'నెట్ఫ్లిక్స్ ఎఫెక్ట్' నివేదికను లాంచ్ చేస్తున్నాం. మా సినిమాలు, సిరీస్లు ఆర్థిక, సాంస్కృతిక, సామాజిక రంగాలపై ఎలాంటి ప్రభావం చూపుతున్నాయో, పరిశ్రమలను ఎలా మారుస్తున్నాయో ఇందులో సమగ్రంగా వివరించాం" అని నెట్ఫ్లిక్స్ కో-సీఈఓ టెడ్ సరాండోస్ పేర్కొన్నారు.
ప్రాంతీయ భాషల హవా.. ఇంగ్లీష్ చిత్రాలను దాటి!
దాదాపు 3000 కంటే ఎక్కువ పబ్లిక్ బ్రాడ్కాస్టర్లు, ప్రొడక్షన్ కంపెనీల నుంచి నెట్ఫ్లిక్స్ కంటెంట్ లైసెన్సులను పొందింది. ప్రస్తుతం నెట్ఫ్లిక్స్ చూసే వారిలో ఇంగ్లీష్ కాకుండా ఇతర ప్రాంతీయ భాషల కంటెంట్ను ఇష్టపడే వారు భారీగా పెరిగారు. మొత్తం వీక్షణల్లో (Viewing) మూడో వంతు కంటే ఎక్కువ వాటా నాన్-ఇంగ్లీష్ సినిమాలదే కావడం విశేషం.
దశాబ్దం క్రితం ఇది కేవలం పదో వంతు మాత్రమే ఉండేది. 'మనీ హైస్ట్', 'స్క్విడ్ గేమ్', 'కే-పాప్ డీమన్ హంటర్స్' వంటి అంతర్జాతీయ ఓటీటీ సిరీస్లు ప్రపంచవ్యాప్తంగా కోట్ల మందిని ఆకట్టుకున్నాయి. ఈ ధోరణి వల్ల భారతీయ, ముఖ్యంగా దక్షిణాది సినిమాలు కూడా అంతర్జాతీయ వేదికపై సత్తా చాటుతున్నాయి.
కొత్త సవాళ్లు.. గేమింగ్ వైపు అడుగులు
ఒకవైపు అద్భుతమైన వృద్ధి సాధిస్తున్నా, మరోవైపు చందాదారుల చేరిక మందగించడంతో నెట్ఫ్లిక్స్ కొత్త ఆదాయ మార్గాలను వెతుకుతోంది. గత నెలలోనే సంస్థ కో-ఫౌండర్, చైర్మన్ రీడ్ హేస్టింగ్స్ సంస్థ నుంచి తప్పుకున్నారు.
ప్రస్తుతం కంపెనీ కేవలం సినిమాలకే పరిమితం కాకుండా లైవ్ ఎంటర్టైన్మెంట్, ఆన్లైన్ గేమింగ్ రంగాల్లోకి అడుగుపెడుతోంది. రాబోయే రోజుల్లో ఈ విభాగాల్లో మరిన్ని పెట్టుబడులు పెట్టేందుకు ప్రణాళికలు సిద్ధం చేస్తోంది. మొత్తానికి వినోద ప్రపంచాన్ని థియేటర్ల నుంచి స్మార్ట్ఫోన్ స్క్రీన్ల వరకు మార్చేసిన క్రెడిట్ నెట్ఫ్లిక్స్కే దక్కుతుంది. భవిష్యత్తులో ఈ ఓటీటీ దిగ్గజం ఎలాంటి సంచలనాలు సృష్టిస్తుందో చూడాలి.
